2 यूहन्ना 1 - नोयरी नोवलू नियम

डाया वोलरोत निवडीलाहा अभिवादन

¹ आय डायाआ वोलरोत ती निवडली बुई अने तीई पोर्याआ नावे ज्याआ आय खोरो प्रेम मेकेहो अने फक्त आयुज नाहा ते आखे बी प्रेम मिकत्ले जे खोराआ जाअत्ले होय,

² ते सत्य जे आमामेहे स्थिर रोत्लो, अने अटल आमारी कायम रोही;

³ परमेशवर बाह्हू अने बाह्हाआ सूऊ येशु ख्रिस्ताआ त्यापोरोत कृपा, दया ऐने शांती, सत्य अने प्रेमो सहित आमारी रोय.

मसीह आज्ञा मेहे साल्लोओ

⁴ आय जाखो खुशिमेहे होय का आयताआ किबी पोऱ्याहा तिया आज्ञा नुसार, जे आमाहा बाह्हासी जोड़ी ओती, सत्य पोओ सालीत प्राप्त कोअया.

⁵ ओमे ओ बुई, आय ताहु कोडली नवो आज्ञा नाहा, पोन तेज जी पेल्लो पोरोत आमा आरी होय, लेखत्लू होय; अने ताहु विनंती कोअत्लू का आमू एक दिहरापो प्रेम मेका.

⁶ अने प्रेम ओ होय का आमू तियाआ आज्ञनेच्या नुसार सालीलो; एती आज्ञा होय तुमु पेल्लो पोरोत कोअयु होय, अने तुमामे त्यापोरोत चालुला कोअता पोन जोवे.

मसीह विरोधीई धोका सी सावधान

⁷ काहाके का जाअखो जोओ भटकाडनारे जगात निहित आव्ये होय, जे ओ नाहा मानते का येशु ख्रिस्त देहाने आवनारू आवयू; ठगनारू अने ख्रिस्त विरोध कोनारो आ ए होय.

⁸ आपाआ विषया माय सावधान रो, का जो परिश्रम आमू कोअयु होय तियाहा तुमु निष्फळ उवहू नाहा आपुहू नहाते तियाआ पुरो प्रतीफोल मिलवा.

⁹ जो कोडु सिकाडीला मेहे आगाडी वोडी जात्लू अने मसीही तीयाम लटकिट नाहा रोत, तियाआ जागे परमेशवर नाहा; जी कोडु तियाआ सिकाडीला मेहे स्थिर रोतलू, तियाआ जागे बाह्हू बी होय अने पुत्र बी.

¹⁰ केधी कोडु तुमाआ जागे आवे अने ओ शिक्षण नि आपे, तियाहा निते कोअमे आवूहू देवा निते तियाहा नमस्कार को.

¹¹ काहाके जो कोडु जेलाह जोह नमस्कार कोअत्लू, तो तियाआ वाईट कामा मेहे भागिदार ओतलु होय.

आखरी अभिवादन

¹² माहु जाअखो किबी गोठी तुमामे लेखिलो होय, पोन कागद अने शाहीने लेखिलो नाहा इच्छितो, पोन आशा होय का तुमाआ जागे आवे अने सामने आगाडी गोठी कोअही, ली होय तुमाआ खुशीने पुरो उवे.

¹³ ताआ निवाडल्या बोईहही पोऱ्ये ताहु नमस्कार कोतेहे.