1 तीमुथियुस 1 - नोयरी नोवलू नियम

शुभकामना

¹ पौला वोलरोत जे आमाआ उद्धारकर्ता परमेश्वर अने आमाआ आशाआ आधार मसीह येशुउ आज्ञा मेहे मसीह येशुउ प्रेषित होय,

² तीमुथियुस नावापो जो विश्वासामेहे माआ खोरो पोऱ्या होय आमाआ बाह्हू परमेश्वर अने प्रभू येशु ख्रिस्त येशुप रोत ताहु कृपा अने दया अने शांती मिलीअलो रोनारु.

ठोगोओ शिक्षाआ विरुद्ध चेतावनी

³ जेहलो आय मकिदुनिया जाआत्लू ताहु होमजाडयोहो ओते का इफिसा मेहेरोत केते मांहोहो आज्ञा आपीली का दिहरा प्रकारो हिकवन आपुहू कायना,

⁴ अने तिया गोठीपो अने सार्वकालिक वंशावळीपो मोन लागाडहु कायना ज्यापोरोत वाद उत्पन्न ओये अने परमेश्वरोओ तियाअ व्यवस्थेनुसार नाहा जी विश्वास कोओ आधारित होय तेहलूज फासी कोत्लू.

⁵ आज्ञा मुद्दा ओ होय का शुद्ध मोन अने हाजो विचार अने कपट नेसलेल्या विश्वासा प्रेम निर्माण उवे.

⁶ याहा सोडीत केतो मांहे बडबड कोअत्ले वोलीत गोये होय,

⁷ अने शास्त्री ओवुहू पालल्ते पोन ज्या गोठी कोतेहे अने मजबुते गोगत्ले तियाहा तोज होमजाडीत पोन नाहा.

⁸ पोन आमाहा मालुम होय का जर कोडु नियमह योग्य प्रकारे कामोम लेत आवलू ताहा ते हाजो होय.

⁹ ओ मालुम ओमेत का व्यवस्था नितीमानाकाजे नाहा पोन अधर्मी, अनावर, भक्ति नि कोत्लू, पापी, अपवित्र, अशुद्ध, याह्ही बाह्हाहा नी माननारे, अने हत्या कोअनारे,

¹⁰ जारकर्मे, पुरुषगामि, मांहोहो वेचनारे, खोटो गोगनारे अने झुटी शपथ खाणारा अने याआ व्यतिरिक्त खोरो उपदेशकाच्या आखे विरोधकाचे मेकल्यी गोयी होय.

¹¹ ओ धन्यावादीत परमेश्वरोओ गौरवाआ तियाअ सुवार्ता नुसार होय जी माहु सोपी होय.

पौलुसोओ गवाही

¹² आय आपाआ प्रभू येशुउ जीआ माहु सामर्थ्य आप्लु होय धन्यवाद कोअत्लू का तिये माहु विश्वासयोग्य होमजीत आपाआ सेवा कोअता निवडोत लेदू.

¹³ आयताहा पेल्लु निंदा कोअनारू छळ कोअनारू अने खुन कोअनारू ओतू तेबी मापो दया उवी काहाके आय अविश्वासोवाही ते काम कोले.

¹⁴ अने आमू प्रभूऊ कृपा तिया विश्वास अने प्रेमो वोरिजे जो ख्रिस्त येशुमेहे होय विपुलतेने उवी.

¹⁵ ए गोठी खोरी अने अनेक प्रकाराने मानिलो योग्य होय का ख्रिस्त येशु पापोआ तारण कोइला कोअता जगात आवयू ज्यामेहे आखाम वोडू आय होय.

¹⁶ पोन मापो याकोअता दया उवी मापो आखाप रोत वोडो पायोमेहे येशु ख्रिस्ताने आपाआ पुरो सहनशीलता देखल्यी काजे मांहे तियापो सार्वकालिक जीवना कोअता विश्वास कोअनारू त्यांकोअता आय एक उदाहरण उवे.

¹⁷ ओमे सार्वकालिक राजा म्हणजे केधी नाश उवे नाहा अने अदृश्य एकुच परमेश्वरोओ सन्मान अने गौरव कायम ओवती रोय आमेन.

तिमुथियुसोओ उत्तर दायित्व

¹⁸ ऐ पोऱ्या तीमुथियुस, तिया भविष्यद्वाणी कोअता जी पेल्ली ताआ बारामे कोअयी गोयी ओती आय ए आज्ञा ताआ आथे आपोहो का तू तियाआ नुसार हाजी लोढाई कोईत रो,

¹⁹ अने विश्वास अने तिया हाजा विवेक तोईत रो ज्याहा सेटे कोअत्लू तेहलाम केताके विश्वास कोअनारू जाहाजे बुडीत गोयी.

²⁰ तियामेहे रोत हुमीनयुस अने सिकन्दर होय ज्याहा आय शैतानाला होपित आप्लु होय का तिये परमेश्वरोओ निंदा कोअला हिकुहू कायना.