1 थिस्लोनी 1 - नोयरी नोवलू नियम

शुभकामना

¹ पौलुस अने सिलवास अने तीमुथियुसो वोलरोत थिस्सलुनीकि मंडली नावे जी परमेश्वर बाह्हाआ अने प्रभु येशु ख्रिस्तमेहे होय अनुग्रह अने शांती तुमाहा जोडती रोय.

थिस्सल्निकियो हाजो उदाहरण

² आमू आमा प्रार्थनाम तुमाहा ओर कोअत्लू अने हर एक टायमे तुमु आखा विषयी परमेश्वरोओ धन्यवाद आपत्ले,

³ अने आपाआ परमेश्वर अने बाह्हाआ आगाडी तुमाआ विश्वासाआ काम अने प्रेमाआ मेहनत अने आमू प्रभू येशु ख्रिस्तामेहे आशेने धीरजला हमेशा ओर कोईत रोतलू.

⁴ ऐ पाही, परमेश्वरोओ प्रिय माहु, तुमामे मालुम होय का तुमु परमेश्वरोओ निवडाविले होय.

⁵ काहाके आमाआ सुवार्ता तुमापोओ फक्त शब्दामे नाहा ताहा पवित्र आत्माम अने वोडो सामर्थ मेहे पुगीतगोयू होय जेहलो तुमु समजीलो का आमू तुमा कोअता तुमामे एहलो बोणीत गोये ओते.

⁶ तुमु वोडो दुखो मेहे पवित्र आत्माम आनंदा आरी वचनाआ माणीत आमाईही प्रभु कोअता चाल चालीलो होय.

⁷ इहिंजा तुमू मकिदुनिया अने अखयातील आखे विश्वास मिकीलापोओ तुमु नमुना बोन्यो.

⁸ काहाके तुमाआ ईहिरोत फक्त मकिदुनिया अने अखया मध्येच प्रभूऊ वचन कोयु गोये एहलो नाहा ताहा तुमाआ विश्वास जो परमेश्वरोओ होय हर एक जाग्तली एह्ली चर्चा फैलावीत गोयी होय का आमाहा कोअला आवश्यकता नाहा.

⁹ काहाके ते स्वतः आमू विषयी कोतला का तुमापोओ आमाहा आविला केहलो उवे अने तुमु मूर्ती परमेश्वराही केहलो वोलोलो म्हणजे जिवंत अने खोरो परमेश्वाराची सेवा कोईली,

¹⁰ अने तियाआ पोऱ्याहा होर्गामरोत आविलाआ वाट जुवता रोवा ज्याहा तिये मोल्यामरोत जिवंत कोल्यु, काहाके येशुउ जो आमाहा आवनाराआ संकटा मेहे सोडवित्लो.