1 पतरस 1 - नोयरी नोवलू नियम

शुभकामना

¹ पतरसाआ वोलरोत जो येशु ख्रिस्त प्रेषित होय ते परदेशिया नावे जे पुन्तुस गलतियों कप्पदूकिया आसिया अने बितुनिया मेहे वेरा सेर ओत रोते ओते,

² अने देव बाह्हाआ भविष्य ज्ञानानुसार, आत्माआ पवित्र कोइलाआ व्दारे आज्ञा मानोहो अने येशु ख्रिस्ताआ रक्ताआ हिपडीलो निवडील्यो गोये होय तुमाहा कृपा अने शांती विपुल जोळे.

एक स्वर्गोओ विरासत

³ आमू प्रभू येशु ख्रिस्ताआ देव अने बाह्हाआ धन्यवाद होय जिये ख्रिस्ताआ मोल्यामरोत जिवतो उठलो आशा व्दारे, आपाआ महा दयानुसार आपाहा जीवतु एहलाकाजे नवो जोल्मो आप्लु,

⁴ म्हणजे एक अविनाशी, अने निर्मळ, अने अक्षय वतन मिलीविलोकाजे जे तुमा कोअता होर्गांम मेक्ल्ये होय;

⁵ ज्याआ राखनारू देवाआ सामर्थवाही विश्वासाआ व्दारे तिया उद्धारो कोअता, जो आविलो टाईमापो जोडयो उवे होय, का कोअयी जाहो.

⁶ तिया विषयी तुमु उल्हास होआता, यधापी गरजेए होय का ओमे कोयो दिहे पोरोत जुदाजुदा परीक्षामुळे दु:ख सहन कोअला;

⁷ अने ते याकोअता होय का तुमाआ पारखिलो विश्वास, जो आगीवाही नाश उवानारो होनोरोत जाखा मूल्यवान होय, येशु ख्रिस्ताआ प्रगट होय प्रशंसा अने गौरव अने मान याहा कारणी उवे.

⁸ तिये तुमाआ पोल्यु नाहा बिना प्रेम कोअता, अने ओमे ताहा तियापो बिना पाल्यी विश्वास कोईत एहलो खुशिमेहे अने मग्न ओये जो वर्णन अने गौरवाआ वाणी पोअल्ये;

⁹ अने आपाआ विश्वासो प्रतीफोल म्हणजे आत्माआ तारण जोडयो कोअता.

नबीई साक्षी

¹⁰ याज उद्धारो विषयीमी तिया संदेशष्टाआ जास्तीज होद अने तपास कोअयी होय, जाअलो तिया अनुग्रह विषयी जो तुमापो उवे होय, भविष्यवाणी कोअयी ओती.

¹¹ तिये ऐ गोठीई होद कोअयी का ख्रिस्ताआ आत्माआ जो तियाआ माय ओतु, अने पहिलुच पोरोत ख्रिस्ताआ दुखिलो तियाआ हाजो गौरवची साक्ष, आपित ओतु, तो कोडले अने केहलो टाईमापो संकेत कोईत ओतु.

¹² त्यापोरोत ओ प्रगट कोअल्यो गोये का ते आपाहा नाहा पोन तुमाआ सेवा कोअता ए गोठी कोयु रोत ओते, ज्याआ सुवार्ता ओमे तुमामे तियाआ व्दारे जोडयेहे जिये पवित्र आत्माआ व्दारे, जो होरगापोरोत मोकोल्या गोल्यो, तुमामे सुवार्ता होम्लाडी; अने आव गोठी कोअता स्वर्गदूत बी लक्ष आपित पालीलो लोभ कोअता.

पवित्र जीवन जीवलो बुलाहट

¹³ या कारनो कोईत आपाआ-आपाआ बुद्धी कोमोर बाधित, अने सावध रोत, तिया कृपाआ पुरो आशा मेका जी येशु ख्रिस्ताआ प्रगट होऊला टायमोमें तुमामे मिले होय.

¹⁴ आज्ञाकारी पोऱ्याहोस, आपाआ आज्ञा नाव स्थेमेहे आपाआ पूर्वीई वासना नुसार वागू वर्तुक नाहा.

¹⁵ पोन एहेलू तुमाआ हादनारो पवित्र होय, तेहलूज तुमु पोन आपाआ आखे आचरण मेहे पवित्र बन्यो.

¹⁶ काहाके लेखिलो होय, “पवित्र बन्यो, काहाके आय पवित्र होय”

¹⁷ अने जाहा का तुमु ओ बाह्हा गोगीत तियाहा प्रार्थना कोअता, जे विना पक्षताप हर एक जमाहा कामा नुसार न्याय कोअत्लू ताहा आपाआ प्रवासोओ कालामे बिक सी वागा.

¹⁸ जाहा तुमामे मालुम होय का तुमाआ निरर्थक वागणूक जी वाडवडील्या रुडीई चालते आवल्या होय, तियआ तुमाआ छुटकारु चांदी-होनो म्हणजे नाश उवानारो वस्तूउ द्वारा नाहा ओवये;

¹⁹ पोन निर्दोष अने निष्कलंक कोकरू, म्हणजे ख्रिस्ताआ मूल्यवान रक्ताआ व्दारे उवे.

²⁰ तियाआ ज्ञान ताहा जुगाआ उत्पतिच्या पहीले पोरोत होमज्ये ओते पोन ओमे आव शेवटच्या युगामेहे तुमाआ याकोअता प्रगट ओयो.

²¹ तियाआ व्दारे तुमु देवापो विश्वास कोअता, जिये तियाहा मोल्यामरोत जिवंत कोयु अने गौरव आप्लु का तुमाआ विश्वास अने आशा देवा को होय.

²² आखिर जाहा का तुमु पाही प्रेम याकोअता निष्कपट प्रेमो कोअताआ खाओलओ मानिताईही आपाआ मनाहे पवित्र कोयु होय, ताहा तन मोन लागाडी एक दिहरापो प्रेम कोआ.

²³ कोयु तुमु नाश उवानारो नाहा पोन अविनाशी बीज सी, देवाआ जीवोन अने कायम टिक्नारो वचनाआ व्दारे नवो जोल्मो जोडल्यो होय.

²⁴ काहाके “हर एक प्राणी खोडो होस होय, अने तियाआ पुरो होबाडीलो खोडो होसे फुलाहोस होय खोड हुकी जाहो, अने फुल गोलीत जाहो,

²⁵ पोन प्रभूऊ वचन कायम स्थिर रोनारे” अने ओच सुवार्ताआ वचन होय जो तुमामे होमलाड्यू ह्यू.