Salmane 1 - Bibelen – Bibelselskapets omsetjing 2011

Første boka Salme 1–41

¹ Sæl er den som ikkje følgjer råd frå lovlause, ikkje går på syndarveg og ikkje sit i spottarlag,

² men har si glede i Herrens lov og grundar på hans lov dag og natt.

³ Han er lik eit tre planta ved rennande vatn. Det gjev frukt i rett tid, og lauvet visnar ikkje. Alt han gjer, skal lukkast.

⁴ Slik er det ikkje med dei lovlause. Dei er lik agner som spreiest for vinden.

⁵ Difor kan ingen skuldige bli ståande i dommen, ingen syndarar i flokken av rettferdige.

⁶ For Herren kjenner vegen dei rettferdige går, men vegen dei urettferdige går, fører vill.