Salmane 1 - Norsk ovesettelse 1978/85 nynorsk

Dei to vegane

¹ Sæl er den som ikkje fylgjer råd frå gudlause menneske og ikkje slår inn på syndarveg eller sit i lag med spottarar,

² men har si glede i Herrens lov og grundar på hans lov dag og natt.

³ Han er lik eit tre, planta ved rennande bekker: Det gjev si frukt i rette tid, og lauvet visnar ikkje på det. Alt det han gjer, skal lukkast.

⁴ Så er det ikkje med dei gudlause. Dei er lik agner som spreiest for vinden.

⁵ Difor skal ingen gudlaus stå seg når domen fell, og ingen syndar vera med der dei rettferdige samlast.

⁶ For Herren kjenner vegen åt dei rettferdige, men vegen åt dei gudlause fører til undergang.