Kolossarane 3 - Norsk oversettelse 1938 nynorsk

Dei truande skal ikkje hava hugen sin vend til det som er på jordi, men til det som er i himmelen, av di dei hev døytt frå verdi og hev livet sitt einast i Kristus, 1-4. Dei skal meir og meir leggja av dei udygdene og lastene som dei hadde i heidenskapen, avkleda seg det gamle mennesket og iklæda seg det nye, 5-11. Difor skal dei leggja vinn på kjærleik i all si ferd, lata Kristi ord bu rikeleg hjå seg og gjera alt i hans namn, 12-17. So syner Paulus korleis eit slikt heilagt liv skal levast av ektefolk, 18.19, born og foreldre, 20.21, tenarar og husbondsfolk, 22-4,1.

¹ Er de då uppreiste med Kristus, so søk det som er der uppe, der Kristus sit ved Guds høgre hand!

² Hav hug til det som er der uppe, ikkje til det som er på jordi!

³ For de er hev døytt, og dykkar liv er løynt med Kristus i Gud.

⁴ Når Kristus, vårt liv, vert openberra, då skal de og verta openberra med han i herlegdom.

⁵ So døyd då dykkar jordiske lemer: utukt, ureinskap, ovhug, vond lyst og havesykje, som er avgudsdyrking!

⁶ for desse ting kjem Guds vreide yver dei vantruande;

⁷ millom dei ferdast de og fordom, den tid de levde i desse ting;

⁸ men no skal de og leggja dei alle av: vreide, illska, vondskap, spotting, skamleg tale av dykkar munn.

⁹ Ljug ikkje mot kvarandre, de som hev avklædt det gamle mennesket med dei gjerningar det gjer,

¹⁰ og iklædt dykk det nye, som vert uppnya til kunnskap etter sin skapars bilete;

¹¹ her er ikkje grekar og jøde, umskjering og fyrehud, barbar, skyte, træl, fri man, men Kristus er alt og i alle.

¹² Iklæd dykk då, som er Guds utvalde, heilage og kjære, hjarteleg miskunn, godleik, audmykt, spaklynde, langmod,

¹³ so de toler kvarandre og tilgjev kvarandre, um nokon hev kjæremål mot noko; som Kristus tilgav dykk, soleis de og!

¹⁴ Men attåt alt dette iklæd dykk kjærleiken, som er bandet um fullkomenskapen!

¹⁵ Og Kristi fred råde i dykkar hjarto, den som de og vart kalla til i EIN lekam, og ver takksame!

¹⁶ Lat Kristi ord bu rikleg hjå dykk, so de lærer og påminner kvarandre i all visdom med salmar og lovsongar og åndelege visor og syng yndeleg i dykkar hjarto for Gud,

¹⁷ og alt som de gjer i ord eller gjerning, gjer det alt i Herren Jesu namn, med takk til Gud Fader ved han!

¹⁸ De konor, ver mennene dykkar undergjevne, so som det sømer seg i Herren!

¹⁹ De menn, elska konone dykkar og ver ikkje beiske imot dei!

²⁰ De born, lyd foreldri dykkar i alle ting! for det er til hugnad for Herren.

²¹ De fedrar, arga ikkje borni dykkar, so dei ikkje skal missa modet!

²² De tenarar, ver lydige i alle ting mot herrane dykkar etter kjøtet, ikkje med augnetenesta, som slike som strevar etter å tekkjast menneske, men i hjartans einfelde, med di de ottast Herren!

²³ Det de gjer, gjer det av hjarta, so som for Herren og ikkje for menneske,

²⁴ for de veit at de skal få arven til løn av Herren. Ten Herren Kristus!

²⁵ For den som gjer urett, skal få den urett att som han gjorde, og det vert ikkje gjort skil på folk.