Ndanịelị 1 - BAIBULO INONGWA INUNU

INONGWA SYA DANIELI NA BANINE ( 1.1—6.28 ) Abalumyana abatubwa pakitangalala kya Nebukadinezara

¹ Nkyinja kya butatu ikya bulagili bwa Yehoyakimu umalafyale gwa kisu kya Yuda, mo muno alisile Nebukadinezara umalafyale gwa kisu kya Babeloni, alinkulwa ubwite na bakaya ka Yerusalemu, alinkukasyungutila akaya.

² Untwa alinkumbika Yehoyakimu mmaboko gake, bunobuno Nebukadinezara alinkwega ifyela fimo ifya Nnyumba ya Kyala alinkubuka nafyo nkisu kya Babeloni alinkwakufibika mfipinda fya nyumba yake ya kwiputilamo.

³ Umalafyale Nebukadinezara alinkumbula Ashipenazi umbombi gwake unkulumba pa nyumba yake, ukuti asalepo bamo abalumyana bamo ukufuma mbanya Israeli abakoligwa, aba ba nkikolo kya bunyafyale na aba bafumile mbandu bafikolo ififumuke.

⁴ Alinkuti, Bayege balumyana abamogi kangi abamahala, abalumyana aba bamanyisigwe bununu, kangi bengo ukumanyila, aba bakaya nikilema nakimo mumbili, ukuti bise bamanyisigwege ko kuti bise babombege imbombo pa kitangalala kya malafyale. Ashipenazi yo ayaga pakubamanyisya ukubala nukusimba mu njobelo ya bandu ba ku Babeloni.

⁵ Kangi umalafyale yula alinkulagila ukuti, ilisiku lyosa abalumyana bababa balyege ifindu ifi bikulya aba pa kitangalala nubwalwa ubu bikunwa. Alinkuti bamanyisigwege ifyinja fitatu, po lelo bisakwakubonekaga nkyeni mmalafyale.

⁶ Nkati mbalumyana bababa, balimo abalumyana aba bafumile nkisu kya Yuda: Danieli, Hananiya, Mishayeli, na Azariya, bosa bababa bafumile nkikolo kya Yuda.

⁷ Umbombi unkulumba nnyumba ya Nebukadinezara alinkubapa ingamu imbya: Danieli alinkumpa iya Beletishezara, Hananiya alinkumpa iya Shadereki, Mishayeli alinkumpa iya Mesheki, Azariya alinkumpa iya Abedinego.

⁸ Loli Danieli yo alinkusitumulila ngani mundumbula alinkuti, ngabagila ukwinyasya pakulya ifindu fya pa kitangalala nukunwa ubwalwa bwa pa kitangalala. Bunobuno alinkunsuma Ashipenazi ukuti antule.

⁹ Kyala alinkumpa Ashipenazi indumbula ya kisa kwa Danieli.

¹⁰ Loli papo Ashipenazi antilaga umalafyale, popapo alinkumbula Danieli alinkuti, “Yo yu malafyale uyu atendekisye sisisi isya findu ifi mubagile ukulya mfyakunwa ifi mubagile ukunwa, kangi linga imibili gyinu gitikuboneka ubununu bo ba bininu, po umalafyale isakungoga une.”

¹¹ Popapo Danieli alinkubuka ku mundu uyu Ashipenazi amwimike ukunketelela Danieli palikimo na binake batatu bala.

¹² Alinkumbula alinkuti, “Natigi utugele uswe ku masiku kalongo. Utupege lyene li liseke lya mani na misi gakunwa.

¹³ Po lelo gwise utufwanikisye nabalumyana abinitu aba bikulya ifya kulya fya pa kitangalala, po gwise usitumulege bo uketile muno tuyilile imibili.”

¹⁴ Umwene uyu abaketelelaga alinkwitika ukubagela ku masiku kalongo.

¹⁵ Lelo bo gafikilepo amasiku gala, balinkwaga ukuti bikuboneka ukuya nubumi ukununupo kangi nukuya bamaka ukukinda abinabo bosa aba balyaga ifya pakitangalala.

¹⁶ Bunobuno ukufuma pakabalilo kalakala uyu abaketelelaga alinkubitikisya ukuti bendelelege ukulya iliseke lya mani mbuyo bwa fyakulya ifi umalafyale abapele.

¹⁷ Kyala alinkubapa abalumyana bana bala ubumanyi na mahala ukugagania amasimbo na mahala ga luko losa. Ukongelelapo alinkumpa Danieli ubu maganyi bwakusanukisya ifisetuka ninjosi.

¹⁸ Bo fikindilepo ifyinja fitatu ifi umalafyale abapimile, Ashipenazi alinkubatwala abalumyana bosa bala kwa Nebukadinezara.

¹⁹ Umwene umalafyale alinkuyoba nabo bosa, po lelo Danieli, Hananiya, Mishayeli na Azariya balinkunkyela fiyo ukukinda bosa abangi. Bunobuno balinkuya ba bombi ba pa kitangalala kya malafyale.

²⁰ Ilalusyo lyosa ili umalafyale alalwisye, pamo inongwa simo imbalapala, abalumyana bana bala bakindilepo kalongo ukwamula, ukubakinda abalagusi pamo abamanjele aba bali nkisu kyake kyosa.

²¹ Umwene Danieli yo alinkuya pa pakitangalala kya malafyale, ukwisa kufika pa kabalilo kala umalafyale Sairasi, umPeresia yula akilambikilege ikisu kya Babeloni.