Mika 1 - BAIBULO INONGWA INUNU

¹ Aga go masyu ga Ntwa Kyala aga galisile kwa Mika, uyu itugalaga nkaya ka Moresheti, nkabalilo ka Yotamu, Ahazi na Hezekiya aba bali banyafyale ba nkisu kya Yuda. Go masyu aga alyambilile mfisetuka ifi fikulingania nisya kaya ka Samaria na ka Yerusalemu.

Isya kukalilila akaya ka Samaria na ka Yerusalemu

² Amupilikisye amasyu aga mwe bandu, bafikolo fyosa; amupilikisyege amasyu aga mwesa mwe mukwitugala pakisu kya pasi. Untwa Kyala yo ikuya pakubasisimikisya umwe pakuyoba inongwa. Amupilikisyege bo ikuyoba nnyumba yake inyikemo iyi yili kumwanya.

³ Keta, Untwa ikwisa ukufuma mbuyo bwake ubwikemo, ikuya pakwikilila nukwenda pamwanya pafyamba bo ga misi aga gikonekela pa lutananda nkisu kya pasi.

⁴ Bo ikwenda ifyamba fisakwengukaga itolo bo gu mpulya ugu guli mmoto, fisakonekelaga mfikoga.

⁵ Syosa sisisi sisakubombigwaga panongwa ya butulanongwa bwa banya Israeli, napanonga yakusambuka kwabo. Ngimba inongwa ya Yakobu yikuyaga yani? Kali yitikuyaga pa kaya ka Samaria? Ngimba ywani uyu abapelile abannyumba ya Yuda Ukwiputa kufifwani? Ngimba akaya yo Yerusalemu?

⁶ Bunobuno Untwa ikuyoba ikuti, “Nikuya pakukabulutulania akaya ka Samaria nukukapela ukuya fisame ifi inyalo syake sili pa bwelu itolo, ukuya bo buyo bwakubyalamo amafilu amagengelemya gake nisakugabungulukisya nkikoga.

⁷ Fyosa ififwani fyake ifya ntengo fisakukonyoligwa tunanditunandi, fyosa ifi babapaga panongwa ya baputi abakikulu fisakupyaga mmoto, kangi fyosa ififwani fisakwipela ibungila lya mfisame. Namanga aba nkaya ka Samaria bafikabile fyosa fififi pambombo ya bakikulu abalogwe abalugu bake bisakubakola abakikulu abalogwe bala nukubuka nabo ukuti bakiputege kubungi.”

⁸ Popapo Mika alinkuyoba alinkuti, “Bunobuno nikulila nukukuta inguto ukunangisya ubusulumanie bwangu, po lelo nikwendaga itolo ne nsita filato ku malundi kangi ne nsita kufwala imyenda. Nikukutaga bo ba kambwe nukulila bo sindibatiba.

⁹ Namanga ifilonda fya kaya ka Samaria fikamanya ukuganguligwa bububo itolo kyope nikisu kya Yuda. Ulupyuto luyile kufika na pa kipata kya Yerusalemu, nkaya aka abandu bangu bikwitugalamo.”

Abalugu bikusegelela ku Yerusalemu

¹⁰ Komma ukusifumusya inongwa sya kutoligwa kwitu nkaya ka Gati, kangi komma ukubitikisya ukuti bababonege bo mukulila. Mwe bandu ba nkaya ka Bet Leafra, munangisye ubusulumanie pakubunguluka ndufumbi!

¹¹ Mwe mukwitugala nkaya ka Shafiri, amubukege mbukoligwa bo mukafwala nakamo, bo muli nisoni. Abandu ba nkaya ka Zaanani bo bangasokangamo nkaya kabo. Apa linga mukupilika ukulila kwa bandu ba pa buyo bwa Betezele po mwise mumanyege ukuti ububopelo bukayako kulakula.

¹² Namanga aba bikwitugala pa buyo bwa Maroti bikubugulila ubutuli nukusyukwa mundumbula, bikugulila ubutuli, papo Untwa atwele ulupalaganiko pa bupipi na Yerusalemu.

¹³ Umwe mwe mukwitugala nkaya ka Lakishi ifalasi syinu musipinye ku mageleti. Mulinkubomba imbibi isi babombile abanya Israeli popapo mulinkubapelela naba mu Yerusalemu ukutula inongwa.

¹⁴ Bunobuno lelo mwe kisu kya Yuda mulaganege nako akaya ka Moresheti-gati, namanga umalafyale gwa kisu kya Israeli atisakwambilila ubutuli nabumo ukufuma nkaya ka Akizibi.

¹⁵ Umwe mwe bandu ba nkaya ka Maresha Untwa Kyala ababikile mmaboko ga balugu binu, bo bikuya pakupoka akaya kinu. Abalongosi mbanya Israeli bisakwakwibililaga mu mbako ya Adulamu.

¹⁶ Mwe bandu ba nkisu kya Yuda, mumwege inywili ku mitu gyinu bo mukubalilila abaninu aba mubaganile muyege nifipata bo gi mibimba namanga isakubapoka abaninu nukubatwala mbutumwa.