Matai 1 - BAIBULO INONGWA INUNU

Aba nkikolo kya Yesu

¹ Ululo lubatiko lwaluko ulwa bankikolo kya Yesu Kristi, unnya Davidi, unnya Abrahamu.

² Abrahamu alinkumpapa Isaka; Isaka alinkumpapa Yakobu; Yakobu alikumpapa Yuda nabamyabo;

³ Yuda alinkumpapa Perezi na Zera mwa Tamara; Perezi alinkumpapa Hezironi; Hezironi alinkumpapa Aramu;

⁴ Aramu alinkumpapa Aminadabu; Amunadabu alinkumpapa Nashoni; Nashoni alinkumpapa Salimoni;

⁵ Salimoni alinkumpapa Boazi mwa Rahabu; Boazi alinkumpapa Obedi mwa Ruti; Obedi alinkumpapa Yese;

⁶ Yese alinkumpapa umalafyale Davidi. Davidi alinkumpapa Solomoni munka Uriya.

⁷ Solomoni alinkumpapa Rehoboamu; Rehoboamu alinkumpapa Abiya; Abiya alinkumpapa Asa;

⁸ Asa alinkumpapa Yehoshafati; Yehoshafati alinkumpapa Yoramu; Yoramu alinkumpapa Uziya;

⁹ Uziya alinkumpapa Yotamu; Yotamu alinkumpapa Ahazi; Ahazi alinkumpapa Hezekiya;

¹⁰ Hezekiya alinkumpapa Manasi; Manasi alinkumpapa Amosi; Amosi alinkumpapa Yosia;

¹¹ Yosia alinkumpapa Yekoniya nabamyabo, pakabaliloka kukoligwa ukubuka nkisu kya Babeloni.

¹² Panyuma bo balimbukoligwa nkisu kya Babeloni, Yekoniya alinkumpapa Shetiele; Shatiele alinkumpapa Zerubabeli;

¹³ Zerubabeli alinkumpapa Abihudi; Abihudi alinkumpapa Eliakimu; Eliakimu alinkumpapa Azori;

¹⁴ Azori alinkumpapa Zadoki; Zadoki alinkumpapa Akimu; Akimu alinkumpapa Ehudi;

¹⁵ Ehudi alinkumpapa Eliyazara; Eliyazara alinkumpapa Matani;

¹⁶ Matani alinkumpapa Yakobu; Yakobu alinkumpapa Yosefu undume gwa Maria, muli uyu apapigwemo Yesu uyu ikuyobigwa iya Kristi.

¹⁷ Popapo lelo ingulilo syosa ukufuma pa Abrahamu ukufika pa Davidi sili kalongo na ina (14), ukufuma pa Davidi ukufika apa bakoligwege ukubuka nkisu kya Babeloni sili kalongo na ina (14); kangi ukufuma apa bakoligwege nkisu kya Babeloni ukufika paKristi sili kalongo na ina (14).

Ukupapigwa kwa Yesu

¹⁸ Ukupapigwa kwa Yesu Kristi kwali bo ulu: Bo unna Maria asingiligwe na Yosefu, bo bakali nukwegana, alinkuboneka ukuya nikifubammaka ga Mbepo Mwikemo.

¹⁹ Loli Yosefu undume, papo alimundu ungolofu, kangi papo akaliganile ukunjwelula, alinkulonda ukundekela mbutitu.

²⁰ Umwene bo ikwinogona sisisi, alinkwaga ugwandumi gwa Ntwa ikunsetukila munjosi ikumbula ikuti, “Yosefu gwe nnya Davidi, ungatilaga ukumwega Maria unkasigo; namanga ikifuba kyake kya mmaka ga Mbepo Mwikemo.

²¹ Umwene isakupapaga umwana undumyana, yo gwise umpege ingamu ya Yesu, buno yo yuyo isakubapokaga abandu bake kumbibi syabo.”

²² Syosa sisisi sisaga ukuti mo simalikilegesisyo uNtwa asiyobelege munsololi ukuti,

²³ “Keta undindwana isakuyaga nikifuba, isakupapaga umwana undumyana, yo isakubilikiligwaga ingamu ya Imanueli;” (ko kuti, “Kyala ali nanuswe”).

²⁴ Umwene Yosefu bo alembwike ntulo, alinkukonga bomumo andagilaga ugwandumi gwa Ntwa, alinkumwega unkasi;

²⁵ loli alinkusita nukummanya tasi, ukwisakufika papo apapege umwana, yo alinkumpa ingamu ya Yesu.