Malika 1 - BAIBULO INONGWA INUNU

Yohani Umosi nubulumbilili bwake

¹ Ubwandilo bwa Nongwa Inunu isi sikunjoba Yesu Kristi, uMwana gwa Kyala.

² Sili bo mumo syasimbigwe mwa Yesaya unsololi, ukuti: “Keta nikuntuma ugwandumi gwangu nkyeni mmyako, uyu isakutendekesyaga injila yako.

³ Ilisyu lya nkoleli likukolela mmatengele likuti, Amutendekesyege injila ya Ntwa, mugolosyege imisebo gyake.”

⁴ Mo mumo abonekile Yohani ukosya mmatengele nukulumbilila ulosyo lwa lupinduko, ulu lukutwala ubuswe bwa nongwa.

⁵ Popapo balinkunkulukila abandu nkisu kyosa kya Yudai nabosa abankaya ka Yerusalemu balinkosigwa Ndusoko lwa Yordani, bo bikwilata imbimbi syabo.

⁶ Umwene Yohani afwalaga unselekesye gwa lusyoya lwa ngamila, numpango gwa lukoba munsana; kangi alyaga amapalalila nuluki lwa mmatengele.

⁷ Alinkulumbilila alinkuti, “Panyuma pamyangu po ikwisa uyu angindile amaka une, uyu ngababila nukwinama pakwabula utukoba twa mfilato fyake.

⁸ Une ne mbosisye namisi, umwene isakubokesyaga na Mbepo Mwikemo.”

Ukosigwa kwa Yesu nukugeligwa kwake

⁹ Lelo popapo mmasiku gala, Yesu alinkwisa ukufuma nkaya ka Nazareti nkisu kya Galilai, alinkosigwa na Yohani ndusoko lwa Yordani.

¹⁰ Nakalinga itolo bo ikufyuka mmisi, alinkwaga kumwanya kukwiguka, Mbepo ikunsololokela ukuti ngunde;

¹¹ ilisyu lilinkufuma kumwanya lilinkuti, “Ugwe gwe Mwanangu unkundwe, mmyako mo nikyelile.”

¹² Nakalinga itolo Mbepo alinkwakumbika ndungalangala, mo alinkuya amasiku amalongo mana (40), alinkugeligwa na Setano.

¹³ Alinkuya pamopene nifinyamana, abandumi ba Kyala balinkumbombela.

Yesu ikubabilikila abalobi bana

¹⁴ Panyuma bo Yohani apinyigwe, Yesu alinkwisa nkisu kya Galilai, alinkulumbilila Inongwa Inunu sya Kyala, alinkuti,

¹⁵ “Akabalilo kafikile, Ubutwa bwa Kyala busegelile; amupindukege nukusitika Inongwa Inunu.”

¹⁶ Lelo bo Yesu ikwenda pambali panyanja ya Galilai, alinkubabona baSimoni na Andrea ugwamyabo gwa Simoni, bo bikusopa ulwelo munyanja; namanga bali balobi.

¹⁷ Yesu alinkubabula alinkuti, “Isaga mungongege, nikubapelaga ukuya balobi ba bandu.”

¹⁸ Nakalinga itolo balinkusileka inyelo syabo, balinkunkonga.

¹⁹ Lelo bo akindilepo panandi, alinkubabona baYakobu unnya Zebedai na Yohani ugwamyabo bali mwiboti, bikutendekesya inyelo syabo.

²⁰ Nakalinga itolo alinkubabilikila; balinkundeka ugwisabo Zebedai mwiboti pamopene nababombi, balinkunkonga.

Umundu gwa Mbepo Inyali

²¹ Balinkwenda balinkwakufika nkayaka Kapernaumu. Lelo pisiku lya Sabati Yesu alinkwingila nnyumba yakwiputilamo alinkumanyisya.

²² Abandu balinkuswiga fiyo na mumo amanyikisyaga, namanga bo ikubamanyisya inongwa abonekaga ukuya yo mwenenasyo uyo, akali bo abamanyandagilo.

²³ Mulamula nnyumba yabo yakwiputilamo, alimo umundu ugwa mbepo inyali, yo alinkukolela alinkuti,

²⁴ “Tuli buki nanuswe nanugwe, gwe Yesu gwa mu Nazareti? Gwisile nkutupyuta itolo? Ngumenya ugwe uli Mwikomo gwa Kyala.”

²⁵ Umwene Yesu alinkuyikemela, imbepo inyali alinkuti, “Batama, usokemo mmundu uyu!”

²⁶ Popapo imbepo inyali yilinkunkwabila kosakosa umundu yula, yilinkusoka bo yikukuta inguto ingulumba.

²⁷ Balinkuswiga itolo bosa, balinkulalusania balinkuti, “Fyo fiki fififi? Ngimba lumanyisyo lupya? Buno na si mbepo inyali ikusilagila namaka, isyene sikwenda nukumwitika.”

²⁸ Nakalinga itolo ukufumuka kwake kulinkufika kosakosa, mfisu ifi fipalamene nikya Galilai.

Yesu ikubabumbulusya abandu babingi

²⁹ Lelo bo basokile nnyumba yakwiputilamo, balinkwakwingila nnyumba ya ba Simoni na Andrea. Bali pamopene na ba Yakobu na Yohani.

³⁰ Loli unko gwa Simoni unkikulu alambalele, abinile isekema. Balinkusita nukuhaba ukumbula.

³¹ Bo Yesu asegelile kumyake, alinkunkola ikiboko alinkunsumusya. Popapo isekema yilinkundeka, alinkubabombela.

³² Namayolo bo liyongile ilisuba, balinkuntwalila bosa ababine, naba mbepo inyali;

³³ bope naba nkaya mumo bosa balinkubungana pakifigo.

³⁴ Umwene Yesu alinkubabumbulusya ababine ba bingi imbungo syosa, nukusisosya imbepo inyali si nyingi itolo. Alinkusikanisya imbepo inyali bo sikuti tuyobe, namanga syalimmenye.

Yesu ikulumbilila nkisu kya Galilai

³⁵ Nulubunju bo bukali nukukya Yesu alinkulembuka, alinkusoka alinkubuka ndukubo, mo alinkwakwiputa.

³⁶ Popapo Simoni nabanine balinkundonda.

³⁷ Lelo bo bamwagile, balinkumbula balinkuti, “Abandu bosa bakubingilile.”

³⁸ Umwene Yesu alinkubabula alinkuti, “Tubuke kubungi ntwaya utungi utwa mbupipi muno, ukuti mope ngalumbililege; buno syo isi nisile.”

³⁹ Popapo alinkulumbilila nnyumba syabo syakwi putilamo nkisu kyosa kya Galilai, nukusisosya imbepo inyali.

Yesu ikumbumbulusya ugwa mbungo yabukoma

⁴⁰ Isiku limo umundu gwa mbungo ya bukoma alinkwisa kwa Yesu, alinkufugama nukupyelesya alinkuti, “Linga gwiganile, ubagile ukunyelusya.”

⁴¹ Umwene Yesu bo ikisa kimwagile, alinkugolosya ikiboko kyake, alinkumpalamasya alinkuti, “Niganile, elukaga.”

⁴² Nakalinga itolo ubukoma bulinkundeka, alinkweluka.

⁴³ Umwene Yesu bo andagilile fiyo umundu yula, alinkunsosya mbibimbibi,

⁴⁴ alinkumbula alinkuti, “Keta, ungayakumbulaga yumo umundu, loli bukaukibonesye kumputi; kangi ukasosyege ifya kwiyelukisya fifyo alagile Mose, fyo fiyege fya kumanyilamo abene.”

⁴⁵ Umwene loli bo asokile alinkwanda ukulumbilila nukusifumusya inongwa sisisi; fyobene Yesu alinkusita nukwingila nkaya pabwelu, alinkuya pabusitabandu. Popapo abandu balinkufuma mosamosa ukubuka apa alipo.