Lʉʉka 1 - BAIBULO INONGWA INUNU

Amasyu ga bwandilo

¹ Bo papa ba bingi bagelile ukusimba mongwa sya isi sibonike mmyitu muno,

² ukufwana na isi batulekile aba bali baketi, kangi bali babombi ba isyu ukufuma mu mbwandilo,

³ nanine bo nsyanisye fiyo syosa ukufuma kubwandilo, nagile ukuti nunu ukukusimbila muno sikonganile, gwe mwimikigwa gwe nkundwe Teofili,

⁴ ukuti ubumanye ubwanaloli bwa nongwa sila gwamanyisigwe.

Ukuyobela ngani isya kupapigwa kwa Yobani Umosi

⁵ Pakabalilo aka Herodi ali malafyale gwa kisu kya Yudai, aliko umputi yumo uyu ali yo Zekaria ingamu, ugwa nkiyabo kya Abiya; unkasi gwake ali yo Elizabeti ingamu, ugwa nkikolo kya Aroni.

⁶ Loli bosa bo babili bali bagolofu nkyeni mwa Kyala, balinkukonga mungomelesyo na mundagilo syosa isya Ntwa, abasitakuyobigwamo nalimo ilibibi.

⁷ Loli bakali numwana, namanga Elizabeti ali ngumba; kangi bosa bo babili bafikilepo pabukangale.

⁸ Lumo lela bo Zekaria ali pakubomba imbombo ya buputi Nnyumba ya Kyala, ndubatiko lwa kiyabo kyake nkyeni mwa Kyala,

⁹ bo mumo lwayilile ulwiho lwa buputi, ubulagusi bulinkunkola Zekaria ukwingila Nnyumba ya Kyala nkufukisya,

¹⁰ abandu ikilundilo kyosa bali panja biputaga pakabalilo ka kufukisya.

¹¹ Popapo ugwandumi gwa Ntwa alinkunsetukila, alyimile ku kiboko ikililo kya kigemo kya kufukisya.

¹² Umwene Zekaria bo ambwene alinkunyomoka, ulutende lulinkumwaga.

¹³ Loli ugwandumi alinkumbula alinkuti, “Ungatetemaga Zekaria, buno ukusuma kwako kupilikigwe, unkasigo Elizabeti isakukupapilaga umwana undumyana, yo gwise umpege ingamu ya Yohani;

¹⁴ nanugwe kwisakuyaga nulusekelo nubwikyele, nabandu ba bingi bisakukusekelelaga ukupapigwa kwake.

¹⁵ Namanga isakuyaga nkulumba nkyeni muNtwa, atisakunwaga ubwalwa bwa mafilu nifingi fyosa ifi fikumpelela ukugala umundu; umwene isakwisulaga Mbepo Mwikemo ukufuma mu munda munna.

¹⁶ Abandu bingi mbanya Israeli aba isakubagomolelega kuNtwa Kyala gwabo.

¹⁷ Yo isakwendaga nkyeni muNtwa, mumbepo na mmaka ga Eliya; indumbula sya bisabo isakusigomolelaga kubanabo, abamwilo isakubagomolelaga kumahala ga bugolofu, nukumbikila ngani uNtwa abandu aba batendekesigwe.”

¹⁸ Popapo Zekaria alinkundalusya ugwandumi alinkuti, “Syo nikusimanyaga bulebule sisisi? Buno une ndi nkangale, yope nunkasi gwangu afikilepo pabukangale.”

¹⁹ Umwene ugwandumi alinkumwamula alinkuti, “Une ne Gabrieli ne nikwima nkyeni mwa Kyala, ndumigwe kukuyoba nanugwe, nukukutwalila mongwa inunu isi.

²⁰ Keta, kuyaga kinunu itolo kisitakuyoba, ukufika pisiku lilyo sisakubonekelaga sisisi, papo ukagitika amasyu gangu, aga gisakwisaga pakabalilo kake.”

²¹ Abene abandu bangulilaga Zekaria, balinkuswiga fiyo bo bagile akabile Nnyumba ya Kyala.

²² Lelo bo asokile, alinkutoligwa ukuyoba nabo, balinkusyagania ukuti akibwene ikisetuka Nnyumba ya Kyala; alinkubanangikisya ki kiboko, alinkuya kinunu itolo.

²³ Bo gamalike amasiku ga bubombeli bwake, popapo alinkubuka kumyake.

²⁴ Lelo bo pagonilepo, Elizabeti unkasi alinkwinoga; popapo alinkwibilila imyesi mihano

²⁵ alinkuyoba alinkuti, “Buno syo isi ambombile uNtwa, mmasiku gala angetelengemo, apa akusosyaga ukobeligwa kwangu nkyeni mbandu.”

Ukuyobela ngani isya kupapigwa Yesu

²⁶ Popapo lela mmwesi gwa buhano nagumo, ugwandumi Gabrieli alinkutumigwa na Kyala ukubuka nkaya kamo aka mu Galilai, aka batigi Nazareti ingamu,

²⁷ kundindwana uyu asingiligwe numundu yumo uyu ali yo Yosefu ingamu, uyu ali gwa kikolo kya Davidi, undindwana yula ingamu yake ali yo Maria.

²⁸ Umwene ugwandumi alinkwingila nnyumba, alinkuyoba naMaria alinkuti, “Nikukuponia gwe upegigwe ilipyana, uNtwa ali nanugwe.”

²⁹ Umwene Maria alinkunyomoka fiyo kumasyu aga, alinkwilusama alinkuti, “Lo luponio luki lululu?”

³⁰ Popapo ugwandumi alinkumbula alinkuti, “Ungatetemaga Maria, buno ulyagile ilipyana kwa Kyala.

³¹ Keta, kwisakwinogaga umwana munda mmyako, kwisakupapaga umwana undumyana, yo gwise umpege ingamu ya Yesu.

³² Yo isakuyaga nkulumba, kangi isakuyobigwaga ukuya yo Mwana gwa yu Nkinde, uNtwa Kyala isakumpa ga ikikota kya bunyafyale bwa gwise Davidi;

³³ isakuyaga ndagili panyumba ya Yakobu bwila na bwila, bope nubunyafyale bwake butisakuyaga na pabumalikilo napamo.”

³⁴ Loli Maria alinkundalusya ugwandumi yula alinkuti, “Syo sikuyaga bulebule sisisi, bo ngaya nunnyambala nayumo?”

³⁵ Umwene ugwandumi alinkwamula alinkuti, “Mbepo Mwikemo isakukwisilaga, gope namaka ga yu Nkinde gisakukukupikilaga; ko kuno Umwana Umwikemo uyu isaku papigwaga, isakuyobigwaga ukuya Mwana gwa Kyala.

³⁶ Keta, yope nunkamugo Elizabeti inogile umwana undumyana mbukangale bwake, ugu go mwesi gwake gwa buhano nagumo uyu batigi ngumba.

³⁷ Namanga likayako limo ilisyu lya Kyala ilisitamaka.”

³⁸ Popapo Maria alinkuyoba alinkuti, “Keta une ndi mbombi gwa Ntwa, asinyisilege bo sisyo usiyobile.” Popapo ugwandumi alinkundeka, alinkubuka.

Maria ikubuka kwa Elizabeti

³⁹ Popapo mmasiku gago Maria alinkusumuka, alinkubuka mbibimbibi nkisu kya mfyamba, alinkwakufika nkaya kamo aka mwa Yuda;

⁴⁰ alinkwakwingila nnyumba ya Zekaria, alinkumpoma Elizabeti.

⁴¹ Lelo bo Elizabeti apilike uluponio lwa Maria, popapo akana kalinkukina munda mmyake; umwene Elizabeti alinkwisula Mbepo Mwikemo,

⁴² alinkukolela ilisyu ilikulumba alinkuti, “Uli nsayigwa ugwe mbakikulu bosa, sayigwa yope nimbeyu iyi yili munda mmyako.

⁴³ Syo sinyagile bulebule sisisi, ukuti unna gwa Ntwa gwangu anyisilege une?

⁴⁴ Keta, bo uluponio lwako lufikile mumbulukutu syangu, akana kalinkukina nulusekelo munda mmyangu.

⁴⁵ Nsayigwa uyu itike, namanga sikumwisilaga sisyo abuligwe nuNtwa.”

Ulwimbo lwa Maria ulwa lutufyo

⁴⁶ Popapo Maria alinkuyoba alinkuti, “Umoyo gwangu gukunjumbika uNtwa,

⁴⁷ imbepo syangu sili nubwikyele mwa Kyala uMpoki gwangu,

⁴⁸ papo abuketile ubupimba bwa ne ntumwa gwake; buno ukwanda lilino, ingulilo syosa sikunjobaga ubusayigwa;

⁴⁹ papo ugwa maka ambombile ingulumba, yope ningamu yake nyikemo;

⁵⁰ ikisa kyake kikuyako kungulilo ningulilo, muli aba bikuntila.

⁵¹ Abombile isya maka nikiboko kyake, abapalagenie abamatingo munyinogono sya mundumbula syabo;

⁵² aba maka abisisye pafikota fyabo; abafyusisye ba bapimba,

⁵³ abanjala abaswilile ifinunu, abakabi abakagile kisitakubapa nafimo.

⁵⁴ Antulile Israeli umbombi gwake, bo ikukikumbuka ikisa kyake;

⁵⁵ bo lilyo ayobile kwa batata, kwa Abrahamu na kuluyungu lwake bwila na bwila.”

⁵⁶ Umwene Maria alinkutugala na Elizabeti imyesi mitatu, popapo alinkugomoka ukubuka kumyake.

Ukupapigwa kwa Yohani Umosi

⁵⁷ Popapo Elizabeti akabalilo kake ka kupapila umwana kalinkwisa, alinkupapa umwana undumyana.

⁵⁸ Abene abapalamani nabakamu bake balinkupilika ukuti uNtwa ambakisye ikisa, popapo balinkusekela nagwe.

⁵⁹ Lelo pisiku lya buhano nabutatu, balinkwakumbutako umwanike; balinkuti tumpege ingamu iya gwise Zekaria.

⁶⁰ Umwene unna alinkwamula alinkuti, “Mma, loli ayege yo Yohani.”

⁶¹ Abene balinkumbula balinkuti, “Akayamo yumo nkikolo kyako ugwa ngamu yiyiyi.”

⁶² Balinkundalukisya ugwise nkimanyilo, ukuti bamanye muno iganile ukumbilikilila umwanike.

⁶³ Umwene alinkusuma aka kusimbilapo, alinkusimba alinkuti, “Ingamu yake yo Yohani.” Bosa balinkuswiganika.

⁶⁴ Nakalinga imilomo gyake gilinkwiguka, nululimi lwake lulinkwabuka, alinkuyoba alinkuntufya Kyala.

⁶⁵ Popapo ulutende lulinkubaga bosa abapalamani babo; inongwa isi silinkufumuka mosa nkisu kya mfyamba fya muYudai.

⁶⁶ Bosa aba basipilikaga sisisi, balinkusibika mundumbula syabo balinkuti, “Umwanike uyu kali ikuyaga mfiki?” Namanga ikiboko kya Ntwa kyali pamyake.

⁶⁷ Popapo Zekaria ugwise alinkwisula Mbepo Mwikemo, alinkusolola alinkuti,

⁶⁸ “Atufigwege uNtwa, Kyala gwa Israeli; papo abaketile abandu bake, nukubapelela ukutabuligwa,

⁶⁹ atwimikile umpoki gwa maka nnyumba ya Davidi umbombi gwake;

⁷⁰ bo mumo ayobelege nkanwa mbasololi bake abikemo aba mbukulu,

⁷¹ ukuti isakutupokaga kubalugu bitu, na kukiboko kya bosa aba batubengile;

⁷² alinkuyoba ukuti isakunangisya ikisa kwa batata, kangi nukukumbuka ulwitikano lwake ulwikemo;

⁷³ ulufingo ulu afingile na tata Abrahamu, ukutwitikisya uswe

⁷⁴ ukuti, bo tupokigwe kukiboko kya balugu, twise tumbombelege yuyo kisita lutende,

⁷⁵ mbwikemo na mbugolofu nkyeni mmyake, mmasiku gitu gosa.

⁷⁶ Loli nanugwe mwanike, kwisakuyobigwaga ukuya nsololi gwa yu Nkinde; namanga kwisakulongolelaga nkyeni muNtwa gwako ukutendekesya injila syake;

⁷⁷ ukubapelela abandu bake ukubumanya ubupoki, mbuswe bwa nongwa syabo;

⁷⁸ panongwa ya kibabilisi kya ipyana lya Kyala gwitu, mo mumo ubwelu bwisa kutubalilaga ukufuma kumwanya,

⁷⁹ ukubamulika aba batugele mungisi na munsyungulu gwa bufwe, ukugalongosya amalundi gitu munjila iya lutengano.”

⁸⁰ Umwene umwanike alinkukula alinkukaka mumbepo, alinkuya muma tengele ukwisakufika pisiku ili inangikisyaga kwa Israeli.