Juuta 1 - BAIBULO INONGWA INUNU

Uluponio

¹ Yo une Yuda untumwa gwa Yesu Kristi, kangi ugwamyabo gwa Yakobu. Nikubasimbila aba Kyala ababilikile, aba bali ndugano lwa Kyala uGwise, aba kangi bubatiligwe na Yesu Kristi.

² Ikisa, ulutengano, nulugano, fyo fibalege mmyinu.

Abamanyisi ba lusyobo

³ Mwe baganigwa, bo nikwiyula fiyo ukubasimbila isya bupoki ubu bo bwitu twesa, po ndinkwaga kumbagile ukubasimbila isya kubasukania, ukuti mululwilege ulwitiko ulu bapegigwe kamokene itolo abikemo;

⁴ namanga bamo abandu aba bikumwila Kyala, abandu aba basimbiligwe ngani ukuya ba kuyobigwa ububibi; abene ilipyana lya Kyala balipindwile ukuya lya kubombelamo ubulogwe, bikunkana Umwenefyosa uyu ali yumo-ywene itolo, nuNtwa gwitu Yesu Kristi.

⁵ Loli napapo linga musimanyile ngani syosa, nikulonda ukubakumbusya ukuti uNtwa abasosisye abandu bake nkisu kya Egiputi, loli ulwa nyuma alinkubapyuta abasitakwitika;

⁶ bope na nabandumi aba bakapalindilile bununu bapulagili bwabo, loli balinkubuleka ubuyo bwabo, bo alinkubabika mbupinyigwa bwa bwila na bwila nkati mungisi, ukwisakufika pisiku ilikulumba ilya bulongelo.

⁷ Kangi bope naba nkaya ka Sodomu na ka Gomora, naba ntwaya utu twabasyungutile, balinkubomba itolo bo balabala, balinkubomba isya bulogwe, balinkunyonywa ukulogwa nimibili igingi itolo; abene bipelile ukuya ka kuketelamo, bo bikukubilwa ndufundo lwa moto gwa bwila na bwila.

⁸ Bunobuno bope na bababa, mbugogwanjosi bwabo, bikuginyasya imibili, bikugasyokela amaka ga Kyala nukubahelula aba mbukulumba.

⁹ Mikaeli ugwandumi unkulumba akabombile bo sisisi lula akanikanaga nagwe umohesi, apa bagulwilaga umbili gwa Mose, alinkutila ukundongela mmahelu, mma, loli alinkuti, “UNtwa yo akukemele ugwe!”

¹⁰ Abene loli bababa bikusituka amahelu nisi bakasimanya; kangi syosa isi basimanyile munyibonelo syabo bo fi finyamana ifisitamahala, syo isi sikubonanga sisyo.

¹¹ Sya butolwe kuli bababa! Buno bendile munjila ya Kaini, bitagile itolo mbusobi bwa Balamu panongwa ya kwambilila ifihombigwa. Bapyutiligwe lumo nagwe Kora nkusambuka kwake.

¹² Abene mibabye itolo pafyakulya fya alusekelo lwa bumanyani bwinu, apa ikulya nanumwe kisitalutende; bikwipakisya bene itolo. Bali bo ga mabingu amasitafula aga gikukagigwa numbelo. Bali bo gi mipiki imisitaseke, igi gifwile kabili, igi gikupwike nimisi.

¹³ Bali bo ga mayiga ga munyanja panongwa ya mbombo syabo ingosyasoni isi sikuboneka bo gu ntotofula. Bali bo si ndondwa isi sisobile injila yabo, bo aba Kyala ababikile ingisi isisya fiyo isitakumalika siku.

¹⁴ Bo aba Enoki, ugwa buhano na bubili ukufuma pa Adamu, asololaga apa atigi, “Keta, uNtwa isile nifilundilo fya bikemo bake fi fingi itolo,

¹⁵ kukubalonga bosa, nukubatobesya bosa aba bikumwila Kyala panongwa ya mbombo syabo isi babombile, napanongwa ya masyu gosa amasisya aga banjobile umwene abasitakuntila Kyala.”

¹⁶ Abandu bababa bwila bikwibunesya, nukubayoba ububibi abangi, bikukonga mu mfinyonyo fyabo; undomo gwabo gukuyoba isya lwiyumbiko; bikubimikila abandu mbundu, ukuti bakabege fimo.

Isya kusoka kangi nisya kubasukania

¹⁷ Umwe loli mwe baganigwa, mugakumbukege amasyu aga bayobile iyolo abatumigwa ba Ntwa gwitu Yesu Kristi.

¹⁸ Namanga bababulile ukuti, “Nkabalilo ka kusulo, bisakuyangako abobeli, abandu aba bisakufikongaga ifinyonyo fyabo fya bila-Kyala.”

¹⁹ Abandu aba bikupela indapukano, aba bikwinogona si sya nkisu itolo, kangi bakaya nagwe Mbepo.

²⁰ Loli umwe mwe baganigwa, amwiyengege ndwitiko lwinu ulwikemo, kangi mwiputilege mwa Mbepo Mwikemo,

²¹ kangi muyege ndugano lwa Kyala, bo mukukigulila ikisa kya Ntwa gwitu Yesu Kristi, ukubapa umwe ubumi bwa bwila na bwila.

²² Bamo aba bikwilamwa bo mubapakisyege, abangi bo mubapokege bo mukubanyaka itolo mmoto;

²³ kangi abangi bo mukubapakisya monganiege nulutende, bo mukugibenga gyope na gi myenda igi figinyasisye ifinyonyo fyabo fya butulanongwa.

Ulwiputo lwa lutufyo

²⁴ Umwene loli uyu amenye ukububatila umwe ukuti mungagwaga, uyu amenye nukubatwala nkyeni mbukulumba bwake mwe basitamababye, kangi mwe muli ndusekelo,

²⁵ kwa Kyala uyu ali mwene itolo, uMpoki gwitu, mwa Yesu Kristi uNtwa gwitu; yo ubukulumba, ubusisya, amaka, nubulagili fiyeko kumyake, ukufuma mfyinia fyosa ifi fikindile, nalilino, nukwakufika nakubusitakumalika siku na siku. Amen.