Joelị 1 - BAIBULO INONGWA INUNU

¹ Aga go masyu ga Ntwa aga ayobile kwa Yoeli umwana gwa Petueli.

Abandu bikukuta panongwa yakonangika kwa fyakulya

² Amupilikisyege mwe bandu, umwe muli bakusi. Amutegege imbulukutu mwe muli nkisu kya Yuda. Ngimba sibombigwemo isya bunobuno nkabalilo kinu nankabalilo ka bisemwe?

³ Mubabulege abaninu inongwa sisisi. Abene bo bisakubabulaga abanabo, bope nabanabo bisakubabulaga abangulilo iyi yikwisaga.

⁴ Amapalalila aga mingi itolo galinkwakugwa mmigunda gya fyakulya, ifi amatasi gafilekile ukulya, agamunyuma galinkwisa kulya.

⁵ Amusumuke lelo mulilege; mwe bagalabwalwa umwe, amukutege inguto mwe banwa-bwalwa bwa mafilu umwe; buno amafilu aga mukutendekesya ubwalwa ubupya gonangike.

⁶ Amapalalila aga gali mingi itolo gonangile ikisu kyitu; gali gamaka fiyo kangi gali mingi fiyo, kangi amasita kubaligwa. Amino gabo mugi fiyo, gali bo ga mino ga ngalamu.

⁷ Gonangile imipiki gyitu gya mafilu, kangi galile imipiki gyitu igya mikuyu, galile na gi mipatu, isamba sisyele nyelu itolo.

⁸ Mwe bandu, amuketege inguto bo yu mwana undindwana uyu ikundilila ifwa umundu uyu ayaga pakumwega.

⁹ Yikayako ingano pamo ubwalwa bwa mafilu ukuti fitwaligwe nnyumba ya Ntwa ukuya ikemo; abaputi bikulila papo bakaya nafyo ifya kwikemesya ku Ntwa.

¹⁰ Mmigunda muli swe itolo; umfu gukulila papo imbeyu syonangike, imipiki gya mafilu gyumile fiyo, gyope nimisyunguti gikukofuka.

¹¹ Musulumaniege, mwe balimi; amulilege, mwe mukulindilila imigunda gya mafilu, papo ingano palikimo namapemba fyonangike, nimbeyu syosa isingi.

¹² Imipiki gya mafilu nimipiki gya mikuyu gikofwike; gyosa imipiki igi gikupa iseke gikukofuka nukuma. Ubwikyele bumalike mbandu.

¹³ Amufwalege ifigunila kangi mulilege, mwe baputi mwe mukubomba pafigemo! Amwingilege Nnyumba ya Kyala mukalilege mumo ikilo kyosa! Ingano yikayako pamo ubwalwa bwa mafilu, ukuti tuntwalile Kyala amakemo.

¹⁴ Amubabule abandu ukuti bafipikege ifindu; mubakolelege abandu ukwisa ku lukomano! Mubabunganie abalongosi nabandu bosa ba nkisu kya Yuda, ukwingila Nnyumba ya Kyala gwinu, po mwende nukulila kumyake!

¹⁵ Ilisiku lya Ntwa lisegelile, apa Umwenemaka gosa ikuya pakutwala ulupyuto. Bo bupelalutende buki ilisiku lila!

¹⁶ Tukuboneka ukuya bapela kisa bo imbeyu syitu sikonangika. Bukayamo nubwikyele Nnyumba ya Kyala gwitu.

¹⁷ Imbeyu sikumila mu mmigunda, fikayamo ifyakulya ifi tubagile ukubika mfituba. Bunobuno mfituba ifi mukayamo ifyakulya fikubulutuka itolo.

¹⁸ Ko kutamigwa kuki imitimo gya ng'ombe! Apa gikaya nindeka! Gyope nimitimo gya ng'osi gikufwa.

¹⁹ Nikukuta kumyako, gwe Ntwa, papo indeka nimipiki fyumile, fikufwana bakosisye numoto.

²⁰ Fyope nifinyamana fya ndisu fikukuta kumyako, papo inyisi syumile, kangi umoto gonangile ilisu ndukubo.