Imbalilo 1 - BAIBULO INONGWA INUNU

Abanya Israeli bikubaligwa pa kyamba kya Sinai

¹ Pisiku lyakwanda mmwesi gwa bubili, nkyinja kya bubili, ukufuma lula abanya Israeli basokege nkisu kya Egiputi, Untwa alinkuyoba na Mose mu hema ya kwaganilamo, ndungalangala mula, alinkumbula alinkuti,

² “Ugwe na Aroni mubale ikilundilo kyosa kya banya Israeli ukukonga mfikolo fyabo na nnyumba sya bisabo. Musimbege ndubatiko ingamu ya mundu gwesa,

³ ukwanda pa bafyinja amalongo mabili (20), ukufyuka pamwanya, abandu aba babagile ukulwa ubwite.

⁴ Musalengemo undongosi yumo mbandu ba kikolo iki na iki ugwakubatula.

⁵ Isi syo ngamu sya bandu aba bakukutulaga ugwe: Mbandu ba nnyumba ya Rubeni, usalemo Eliyezara umwana gwa Sheduru;

⁶ mbandu ba nnyumba ya Simeoni, usalemo Shelumieli, umwana gwa Zurishadayi;

⁷ mbandu ba nnyumba ya Yuda, usalemo Nashoni, umwana gwa Aminadabu;

⁸ mbandu ba nnyumba ya Isakara usalemo Natanieli umwana gwa Izuari;

⁹ mbandu ba nnyumba ya Zebuloni, usalemo Eliyabu, umwana gwa Heloni;

¹⁰ Mbandu ba nnyumba ya Yosefu, usalemo aba bafumile mwa Efraimu, Elishama, umwana gwa Amihudu; aba bafumile mwa Manasi, usalemo Gamalieli umwana gwa Pedazuru;

¹¹ mbandu ba nnyumba ya Benjamini, usalemo, Abedani, umwana gwa Gidioni;

¹² mbandu ba nnyumba ya Dani, usalemo Ahiyezeri umwana gwa Amishadayi;

¹³ mbandu ba nnyumba ya Asheri, usalemo Pagiyeli umwana gwa Okorani;

¹⁴ mbandu ba nnyumba ya Gadi, usalemo Eliyasafu umwana gwa Ruweli;

¹⁵ mbandu ba nnyumba ya Nafutali, usalemo Ahira, umwana gwa Enani.”

¹⁶ Bababa bo balongosi aba basaligwe ukufuma mfikolo fyabo, ikilundilo kyosa kilinkubasala ukubomba imbombo iyi.

¹⁷ Popapo Mose na Aroni balinkubasala abandu bababa aba ingamu syabo siyobigwe,

¹⁸ po lelo pisiku lyakwanda, mmwesi gwa bubili alinkukibungania ikilundilo kyosa kya bandu aba basimbigwe aba nnyumba iyi na iyi ukufwana ni nnyumba sya bisabo, ukwanda pa ba fyinja amalongo mabili (20) ukufyuka pamwanya,

¹⁹ balinkusimbigwa nukubaligwa yumoyumo, bo mumo Untwa alimbulile Mose. Bunobuno Mose alinkubabala bosa Ndungalangala lwa Sinai.

²⁰ Aba nnyumba ya Rubeni, umwana gwa Israeli ugwakipanda, muno basimbiligwe abanyambala bosa nnyumba sya bisabo, aba babagile ukulwa ubwite, ukwanda pa ba fyinja amalongo mabili (20) ukufyuka pamwanya, balinkusimbigwa ingamu syabo ikikolo ni kikolo.

²¹ Ubwingi bwabo bosa abanya Rubeni bali aba elifu amalongo mana na mahano nalimo, pamwanya abamia bahano (46,500).

²² Aba nnyumba ya Simeoni, muno basimbiligwe mu nnyumba sya bisabo, abanyambala bosa aba babagile ukulwa ubwite, ukwanda pa ba fyinja amalongo mabili (20) ukufyuka kumwanya, balinkusimbigwa ingamu syabo ikikolo ni kikolo.

²³ Ubwingi bwabo bosa bali aba elifu amalongo mahano pamwanya bahano na bana, kangi na bamia batatu (59,300).

²⁴ Aba nnyumba ya Gadi, muno basimbiligwe mu nnyumba sya bisabo, abanyambala bosa aba babagile ukulwa ubwite, ukwanda pa ba fyinja amalongo mabili (20) ukufyuka ku mwanya, balinkusimbigwa ingamu syabo ikikolo ni kikolo.

²⁵ Ubwingi bwabo bosa, bali aba elifu amalongo mana pamwanya bahano, na bamia bahano nayumo, pamwanya amalongo mahano (45,650).

²⁶ Aba nnyumba ya Yuda, muno basimbiligwe mu nnyumba sya bisabo, abanyambala bosa aba babagile ukulwa ubwite, ukwanda pa ba fyinja amalongo mabili (20) ukufyuka kumwanya, balinkusimbigwa ingamu syabo ifikolo ni fikolo.

²⁷ Ubwingi bwabo bosa bali aba elifu amalongo mahano na mabili pamwanya bahano na bamia bahano nayumo (74,600).

²⁸ Aba nnyumba ya Isakara, muno basimbiligwe nnyumba sya bisabo, abanyambala bosa aba babagile ukulwa ubwite, ukwanda pa ba fyinja amalongo mabili (20) ukufyuka kumwanya, balinkusimbigwa ingamu syabo ifikolo ni fikolo.

²⁹ Ubwingi bwabo bosa bali aba elifu amalongo mahano pamwanya bana na bamia amalongo mana (54,400).

³⁰ Aba nnyumba ya Zebuloni, muno basimbiligwe nnyumba sya bisabo, abanyambala bosa aba babagile ukulwa ubwite, ukwanda pa ba fyinja amalongo mabili (20) ukufyuka kumwanya, balinkusimbigwa ingamu syabo ifikolo ni fikolo.

³¹ Ubwingi bwabo bosa bali aba elifu amalongo mahano pamwanya bahano na babili, na bamia bana (57,400).

³² Aba nnyumba ya Yosefu, aba bikuyobigwa ukuti banya Efraimu, muno basimbiligwe nnyumba sya bisabo, abanyambala bosa, aba babagile ukulwa ubwite, ukwanda pa ba fyinja amalongo mabili (20) ukufyuka kumwanya, balinkusimbigwa ingamu syabo mfikolo mfikolo.

³³ Ubwingi bwabo bosa bali aba elifu amalongo mana, na bamia bahano (40,500).

³⁴ Aba nnyumba ya Manasi, muno basimbiligwe nnyumba sya bisabo, abanyambala bosa, aba babagile ukulwa ubwite, ukwanda pa ba fyinja amalongo mabili (20) ukufyuka kumwanya, balinkusimbigwa ingamu syabo mfikolo mfikolo.

³⁵ Ubwingi bwabo bosa bali aba elifu amalongo matatu pamwanya babili na bamia babili (32,200).

³⁶ Aba nnyumba ya Benjamini, muno basimbiligwe nnyumba sya bisabo, abanyambala bosa, aba babagile ukulwa ubwite, ukwanda pa ba fyinja amalongo mabili (20) ukufyuka kumwanya, balinkusimbigwa ingamu syabo mfikolo mfikolo.

³⁷ Ubwingi bwabo bosa bali aba elifu amalongo matatu pamwanya bahano na bamia bana (35,400).

³⁸ Aba nnyumba ya Dani, muno basimbiligwe nnyumba sya bisabo, abanyambala bosa, aba babagile ukulwa ubwite, ukwanda pa ba fyinja amalongo mabili (20) ukufyuka kumwanya, balinkusimbigwa ingamu syabo mfikolo mfikolo.

³⁹ Ubwingi bwabo bosa bali aba elifu amalongo mahano nayumo pamwanya babili, na bamia bahano na babili (62,700).

⁴⁰ Aba nnyumba ya Asheri, muno basimbiligwe nnyumba sya bisabo, abanyambala bosa aba babagile ukulwa ubwite, ukwanda pa ba fyinja amalongo mabili (20) ukufyuka kumwanya, balinkusimbigwa ingamu syabo mfikolo mfikolo.

⁴¹ Ubwingi bwabo bosa bali aba elifu amalongo mana na elifu yumo, na bamia bahano (41,500).

⁴² Aba nnyumba ya Nafutali, muno basimbiligwe nnyumba sya bisabo, abanyambala bosa, aba babagile ukulwa ubwite, ukwanda pa ba fyinja amalongo mabili (20) ukufyuka kumwanya, balinkusimbigwa ingamu syabo mfikolo mfikolo.

⁴³ Ubwingi bwabo bosa, bali aba elifu amalongo mahano pamwanya matatu, na bamia bana (53,400).

⁴⁴ Bababa bo bandu aba babaligwe, aba Mose na Aroni alinkubabala bo bikwitugala na balongosi ba banya Israeli, abanyambala bala kalongo na babili (12), umundu gwesa muli bababa alinkwima mbuyo bwa bandu ba nkikolo kyake.

⁴⁵ Bunobuno abanya Israeli bosa, ubwingi bwabo muno bayilile nnyumba sya bisabo, ukwanda pa aba bali ni fyinja amalongo mabili (20) ukufyuka kumwanya,

⁴⁶ umundu uyu abagile ukulwa ubwite, bali aba elifu amalongo mahano nalimo pamwanya batatu, na bamia bahano pamwanya amalongo mahano (603,550).

⁴⁷ Loli abanya Levi nnyumba sya bisabo syosa balinkusita nu kubaligwa.

⁴⁸ Namanga Untwa alimbulile Mose ukuti,

⁴⁹ “Bo kubabala abanya Israeli komma ukubabalila lumo na banya Levi.

⁵⁰ Loli ubimike ukuti bayege beneleli ba hema ya kwaganilamo, kangi ni fibombelo fyake fyosa, ni findu fyosa ifi filimo mumo, bo bikupimbaga ihema palikimo ni fibombelo fyake fyosa, bo bikuyaga bakuyipakisya, abene bikuyengaga amasasa gabo ukuyisyungutila ihema ya kwaganilamo.

⁵¹ Apa linga bikusosyapo ihema yila abanya Levi bobikuyipangulaga, kangi linga bikulonda ukuyiyenga bo babo bikuyimikaga ihema ya kwaganilamo. Linga umundu yumo uyungi itolo ikusegelela kubupipi ku hema yo agogigwege.

⁵² Bosa abanya Israeli abangi bo bikuyengaga amasasa gabo aba kikolo iki na iki mfilundilo mfilundilo, umundu gwesa pa ba nkilundilo kyake apa yilipo indembela yake.

⁵³ Loli abanya Levi bo amasasa gabo gikuyisyungutilaga ihema ya kwaganilamo nukuyilindilila, ukuti nayumo umundu angasegelelaga kubupipi nukumbelela une ubukali ukuti mbafunde aba nkilundilo kya Israeli.”

⁵⁴ Bunobuno abanya Israeli balinkubomba isi Untwa alindagilile Mose.