Filimoni 1 - BAIBULO INONGWA INUNU

Amasyu ga bwandilo

¹ Yo une Pauli umpinyigwa gwa Kristi Yesu, na Timoti ugwamyitu. Tukukusimbila gwe Filemoni gwe nganigwa kangi gwe mbombanisi umwinitu,

² na gwe Apiya gwe ilimbu gwitu, na Arkipo unsikali mwinitu, nikipanga iki kili nnyumba yako.

³ Ilipyana liyege nanumwe, nulutengano ulu lukufuma kwa Kyala Tata na kuNtwa Yesu Kristi.

Ulugano lwa Filemoni nulwitiko lwake

⁴ Gwe gwamyitu Filemoni, bwila itolo nikugwa ulupi kwa Kyala gwangu, bo nikukukumbuka munyiputo syangu,

⁵ papo nikupilika isya lugano lwako, nisya lwitiko ulu uli nalo kuNtwa Yesu na kubikemo bosa,

⁶ nikwiputa ukuti Ubulilanisi bwa lwitiko lwako ulu luli mmyitu bo butupelelege ukusimanya inunu syosa isya lusayo, isi tuli nasyo mwa Kristi.

⁷ Namanga ulugano lwako gwe gwamyitu lumbelile ukusekela fiyo kangi lusubisye, indumbula sya bikemo sihobwike panongwa yako.

Isya kunsuma Filemoni mbuyo bwa Onesimo

⁸ Ko kuno natigi nikifyege itolo mwa Kristi ukukulagila isi sikulondigwa.

⁹ Loli panongwa ya lugano, po nikukindilila itolo ukukupyelesya, une ne Pauli ne mwimilili gwa Yesu Kristi, ne lilino nipelile ukuya mpinyigwa panongwa yake.

¹⁰ Nikupyelesya kumyako panongwa ya mwanangu Onesimo, uyu numpapile mbupinyigwa bwangu,

¹¹ uyu iyolo ali gwa itolo kumyako, loli lilino abagile kumyako na kumyangu.

¹² Yo uyu nungomolile kumyako, ikugomoka ukwisa palikimo nindumbula yangu.

¹³ Une nalondaga ukutinjege nagwe, ambombelege mbuyo bwako mbupinyigwa bwangu bwa mu Nongwa Inunu,

¹⁴ loli ngigana ukubomba simo bo ugwe ukitika, namanga ngabagila ukukufimbilisya itolo pakumbombela isya kisa, loli siyege sya kwigana gwimwene.

¹⁵ Namanga pamo syo sisyo syalimpelile Onesimo ukwepukapo pamyako kukabalilo akanandi itolo, ukuti uyege nagwe bwila itolo;

¹⁶ ukufuma lilino alekile ukuya ntumwa, loli akindilepo na pantumwa, ipelile gwamyitu unganigwa; akindilile kumyangu, kali po ikupelaga poki ukuya gwamyinu ulwa bundu nulwa muNtwa!

¹⁷ Linga umbwene une ukuya ne ndilanisi mwinako naloli, po umwambililege itolo ukuti yo yuyune.

¹⁸ Loli linga onangile simo kumyako, pamo ikumeleligwa fimo, fyo umbalilege yuyune;

¹⁹ yo une Pauli ne nikusimba nikiboko kyangu yuyune, ukuti nisakukuhombaga yuyune; syo ndikusiyoba isya kuti nanugwe uli gwakumeleligwa ubumi bwako kumyangu.

²⁰ Ena gwamyitu, nikulonda ukuti unangisye une ulugano lwako nukusosyapo ukwiyaya kwangu, ukuya gwamyinu mwa Kristi.

²¹ Apa nikukusimbila kalata uyu po nikusubila ukuti kwisakumbombelaga isi nsumile, kangi menye ukuti kwisakubombaga ukukinda pali isi njobile.

²² Pamwanya pali isi, natigi undendekesyege ubugono; namanga nikusubila ukuti Kyala isakupilikaga inyiputo syinu nukungomokesya kangi kumyinu.

Uluponio lwa kumalikisya

²³ Ikukuponia Epafra uyu yo mpinyigwa mwinangu panongwa ya Kristi Yesu;

²⁴ aba bope bikukuponia: Marko, Aristarki, Dema, na Luka, ababombanisi binangu.

²⁵ Ilipyana lya Ntwa Yesu Kristi lyo liyege nanumwe mwesa.