Esela 1 - BAIBULO INONGWA INUNU

Ukufumusya kwa malafyale Sairasi

¹ Mwali mo nkyinja kya kwanda ikya Sairasi umalafyale gwa kisu kya Peresia, apa Untwa Kyala asimalisyege isi asiyobile mu ndomo gwa Yeremiya. Untwa Kyala alinkuyisumusya indumbula ya Sairasi umalafyale gwa kisu kya Peresia, ukuti afumusye kosa kosa nkisu kyosa ikya bunyafyale bwake, isi asisimbile alinkuyoba alinkuti,

² “Yo une Sairasi umalafyale gwa kisu kya Peresia, nikuyoba nikuti: Untwa Kyala gwa kumwanya, ambele une ubunyafyale bosa ubwa nkisu kya pasi, kangi ambele une amaka ukuti nunjengele inyumba mu Yerusalemu, nkisu kya Yuda.

³ Lilino nikumbula umundu gwesa mbandu bake aba bali mmyinu nikuti, Kyala ayege nagwe, kangi amwitikisyege ukuti afyukege ku Yerusalemu, nkisu kya Yuda, ukwakuyiyenga kangi inyumba ya Ntwa Kyala gwa Israeli; uyu ubwitugalo bwake buli mu Yerusalemu.

⁴ Umundu gwesa mba Yuda aba basyeleko, mbuyo bosa mumo bipelile ukuya baponi, yo asumege ubutuli ku mpalamani gwake ubwa ndalama sya Siliva nisya golide, ni fyuma fyosa ifingi, ning'ombe, ukongelelapo pa fyabupe ifya kutwala ku Nnyumba ya Kyala iyi yili mu Yerusalemu.”

⁵ Popapo balinkusumuka abakulumba nnyumba sya bisabo mbakikolo kya Yuda, nikya Benjamini, mbaputi, na mbanya Levi, palikimo numundu gwesa itolo uyu Kyala ayisumwisye indumbula yake ukufyuka nukwakuyiyenga kangi Inyumba ya Kyala mu Yerusalemu.

⁶ Po lelo abapalamani babo bosa balinkwenda nukubatula nifyabupe ifya luko nu luko, indalama sya Siliva nifya golide, nifyuma kangi ning'ombe, palikimo ni findu fi fingi itolo ifya ntengo, ukongelelapo pali fyosa ifi bapelaga mbwigane itolo.

⁷ Yope nu malafyale Sairasi alinkufisosya ifibombelo fya Nnyumba ya Kyala, ifi Nebukadinezara alisile nafyo ukufuma ku Yerusalemu, ifi afibikile nnyumba ya bakyala bake.

⁸ Sairasi, umalafyale gwa kisu kya Peresia alinkufibika ifibombelo fififi mmaboko ga Mitiredati, umweneleli gwa kyuma, kya bunyafyale, yo alinkwakufibala nkyeni mwa Sheshibazara, undindililakisu nkisu kya Yuda.

⁹ Ubwingi bwake fyali bo bunobuno: Amabeseni ga golide amalongo matatu (30), amabeseni ga Siliva elifu yumo (1,000); inyangabya sya Siliva isyakubikamo utwakufukisya, amalongo mabili na ihano, na ina (29).

¹⁰ Inyangabya sya golide amalongo matatu (30), inyangabya sya Siliva aba mia amalongo mana ninyangabya kalongo (410), nifibombelo ifingi fya golide ifya luko nu luko, elifu yumo (1,000).

¹¹ Ifibombelo fyosa fya Siliva palikimo fyali aba elifu bahano, naba mia bana (5,400). Fyosa fififi Sheshibazara alinkugomoka nafyo bo abakoligwa bikugomokela ku Yerusalemu ukufuma nkisu kya Babeloni.