BaFilipi 1 - BAIBULO INONGWA INUNU

Uluponio

¹ Yo une Pauli na Timoti, twe batumwa ba Kristi Yesu, tukubasimbila mwesa mwe bandu ba Kyala mwe muli nkipanga kya Filipi pamopene na balindililakipanga nabadikoni.

² Ilipyana liyege nanumwe nulutengano ulu lukufuma kwa Kyala Tata, na kuNtwa Yesu Kristi.

Pauli ikubiputila aba ikubasimbila

³ Nikugwa ulupi kwa Kyala gwangu pakabalilo kosa apa nikubakumbuka umwe;

⁴ na pakabalilo kosa apa nikubiputila umwe mwesa, po nikwiputa nulusekelo

⁵ panongwa ya bulilanisi bwinu mu Nongwa Inunu, nukufuma pisiku lya kwanda, ukwisa kufika na kulilino kuno.

⁶ Nikusubila ukuti, uyu alyandile imbombo inunu mmyinu, yo isakusimalisyaga ukwakufika pisiku lya Kristi Yesu.

⁷ Namanga syo nunu itolo kumyangu ukubinogonela umwe sisisi, papo umwe muli mundumbula yangu, buno mbupinyigwa bwangu, na nkusinokesya nukusisisimikisya Inongwa Inunu mwesa mukulilanila nanine mwipyana lilili.

⁸ Namanga Kyala yo nketi gwangu, na muno nikubasyukilwa umwe nkibabilisi kya Yesu Kristi.

⁹ Isi syo nikwiputa ukuti ulugano lwinu lukindililege itolo ukuya lwingi, palikimo nubumanyi bwa kusyaganikisya syosa;

¹⁰ ukuti musisalege inunu, ko kuti muyege belu abasitakalema pisiku lya Kristi,

¹¹ bo mwiswile niseke sya bugolofu, isi sikwisila mwa Yesu Kristi, isya kumwimikila nukuntukifya Kyala.

Ukuya bumi yo yu Kristi

¹² Loli mwe bamyitu, nikulonda ukuti mumanye ukuti syosa isi sinyagile une, syo sikindilepo ukusibasya Inongwa Inunu.

¹³ Bunobuno ukupinyigwa kwangu panongwa ya Kristi, kubonike itolo pabwelu mosa nnyumba sya bulindililakisu, na kubangi bosa itolo,

¹⁴ kangi bingi itolo abamyitu muNtwa balwagile ulusubilo mbupinyigwa bwangu, bakindilile itolo ukuya bakifu ukulifumusya ilisyu lya Kyala kisitalutende.

¹⁵ Bamo, bo naloli bikumfumusya Kristi panongwa ya bufi nukulwana, abangi loli, bo bikumfumusya ninyinogono inunu;

¹⁶ aba bo bikumfumukisya ndugano, bamenye ukuti mbikigwe ukuya gwa kusilwila Inongwa Inunu,

¹⁷ loli abatasi bala, bikumfumusya Kristi ndukani, momma mundumbula inyelu, bikwinogona ukongelapo ubukamandanigwa bwa mbupinyigwa bwangu.

¹⁸ Yikaya nongwa! Une nhobwike nalinga mo mbusyobi, nalinga mo mbwanaloli Kristi ikufumusigwa, po nikwikyelaga bwila itolo.

¹⁹ Papo menye ukuti sisisi sisakwipelaga ukuya bupoki bwangu panongwa ya nyiputo syinu, napanongwa ya butuli bwa Mbepo gwa Yesu Kristi,

²⁰ bo apa nikusyukwa fiyo, nikusubila ukuti ndisakukosigwamo isoni, loli mbukifu bosa itolo, bo apa Kristi ikwimikigwa bwila, nalilino isakwimikigwaga mumbili gwangu, nalinga mo mbumi nalinga mo mbufwe.

²¹ Namanga ubumi bwangu une yo Kristi ukufwa ko kukaba.

²² Loli linga ukuya mumi mbagile ukubabombela umwe imbombo iyi yibagile, po kundolile itolo ukwisalila.

²³ Syo ngamandanigwe nasyo syo ibili sisisi, nikunyonywa ukubuka ukwakuya na Knsti, namanga ko kukindilile fiyo itolo ubununu;

²⁴ loli ukuya mumi kukulondigwa fiyo panongwa yinu.

²⁵ Apa ndi nulusubilo lululu, menye ukuti nisakuyangako, nisakuyaga palikimo nanumwe mwesa bwila, ukuti mukulege nukusekela ndwitiko,

²⁶ ko kuti mukindililege itolo ukwitukifya mmyangu mwa Kristi Yesu, papo nisakuyaga mmyinu kangi.

²⁷ Loli ulwendo lwinu lubagisaniege ni Nongwa Inunu sya Kristi, ukuti bo nisile kukubaketa, napa linga ngayapo, mbilikege isya kuti mwimile itolo mwa Mbepo yumo, mukulwila palikimo nindumbula yimoyene ndwitiko lwa mu Nongwa Inunu.

²⁸ Mungabatilaga abalugu binu muli simo, bwila muyege bakifu sisisi kyo kimanyilo kya bupyutigwa bwabo, loli kumyinu bo bupoki ubu bukufuma kwa Kyala.

²⁹ Namanga mupegigwe ukumbombela Kristi mukapegwa kwene ku kumwitika, loli na kukukubilwa panongwa yake.

³⁰ Namanga bo bu bwite bubo mwabubwene mmyangu, ubu nalilino mupilike ukuti ngali ndi nabo.