BaEfesi 1 - BAIBULO INONGWA INUNU

¹ Yo une Pauli ne ndi ntumigwa gwa Kristi Yesu mbwigane bwa Kyala. Nikubasimbila abitiki aba bali nkaya ka Efesi aba bikumwitika Kristi Yesu.

² Ilipyana liyege nanumwe, nulutengano ulufuma kwa Kyala Tata na kuntwa Yesu Kristi.

Ulusayo lwa mwaMbepo ulu luli mwa Kristi

³ Atugwege ulupi kwa Kyala uGwise gwa Ntwa gwitu Yesu Kristi, uyu mwa Kristi atusayile nulusayo losa lwa Mbepo ulwa kumwanya;

⁴ buno umwene atusungulile mmyake bo kikali nukwalisigwa ikisu, ukuti tuyege bikemo, kangi basitakilema nkyeni mmyake,

⁵ ndugano atusungulile ngani ukuti twipelege banake mwa Yesu Kristi, bo sisyo syalinkyelile umwene pabwigane bwake;

⁶ ko kuti bwimikigwege ubukulumba bwa ipyana lyake, ili atonelile Munkundwe gwake yula.

⁷ Buno mu mbufwe bwa Kristi twabuligwe nukuswegigwa ingilanio syitu. Bo bwingi buki ilipyana lyake,

⁸ ili likindilile ukutulefukila. Mmahala gake gosa na nkusyagania syosa;

⁹ bo atubulile isya mbutitu isya bwigane bwake, ukufwana nubwikyele bwake, ubu abubatikile ngani muli yuyo,

¹⁰ ko kuti isi atendekekisye ngani ise asibombege bo akabalilo kisile, ukufibungania fyosa mwa Kristi, ifya kumwanya nifya pasi.

¹¹ Mmyake mo twipelile benekilingo, twe atusalile ngani liyolo, akufwana nisi alinogonile ngani, uyu ikusibomba syosa ukufwana nulutumulilo lwa bwigane bwake.

¹² Oko lelo tubutufyege ubukulumba bwa Kyala, twe twatalile ukubika ulusubilo lwitu mwa Kristi.

¹³ Nanumwe mulinkwipela ukuya bandu bake bo mupilike ilisyu lya naloli, syo Nongwa Inunu isi sibatwalile ubupoki. Mulinkumwitika Kristi, po Kyala alinkubika ikikolekelo kyake pamyinu apa abapaga umwe Mbepo Mwikemo uyu afingile ukubapa.

¹⁴ Umwene Mbepo yuyuyu kyo kikole kyakunangisya ukuti twisakwambilila ifi Kyala afingile ukubapa abandu bake, sisisi syo sikusisimikisya ukuti Kyala isakubabulaga bosa aba bo bandu bake. Oko lelo tubutufyege ubukulumba bwake!

Ulwiputo lwa Pauli

¹⁵ Ko kuno nanine, bo mbilike ulwitiko lwinu muNtwa Yesu, nulugano lwinu kubitiki bosa,

¹⁶ ndinkusita nukuleka ukubagwila ulupi. Nikubakumbuka munyiputo syangu

¹⁷ nukunsuma Kyala gwa Ntwa gwitu Yesu Kristi, uGwise gwa bukulumba, ukuti abapege Mbepo uyu isakubapa umwe amahala nukubanangisya Kyala ukuti mummanyege.

¹⁸ Nikusuma ukuti amaso ga mundumbula syinu gamulikigwege, ko kuti mulumanyege ulusubilo muli ulu ababilikilemo. Bo bwingi buki ubukulumba bwa lusayo ulu afingile ukubapa abikemo bake,

¹⁹ kangi bo bukulumba buki ubukindilisi bwa maka gake aga gikubomba muli uswe twitike! Amaka aga gikubomba mmyitu gafwene itolo na maka amakulumba

²⁰ aga abombile bo ikunsyusya Kristi mbafwe, nukumbika kukiboko kyake ikililo kumwanya,

²¹ kulakula ko Kristi ikulagila pabulagili, pabamaka napabutwa, ali ningamu iyi yisikindile ingamu syosa isi sikuyobigwa, momma mwene nkisu iki, loli na nkisu iki kikwisaga.

²² Kyala afibikile fyosa pasi pamalundi gake, kangi amwimike umwene ukuya ntu gwa tundu tosa utwa kipanga,

²³ iki go gu mbili gwake, bwa uyu ubwingi bwake bufwene mosamosa itolo ntundu tosa.