2 Timoti 1 - BAIBULO INONGWA INUNU

Uluponio

¹ Yo une Pauli ne ndi ntumigwa gwa Kristi Yesu, mbwigane bwa Kyala, natumigwe ukubufumusya kubandu bosa ubumi ubu Kyala afingile ukutupa uswe mwa Kristi Yesu.

² Nikukusimbila ugwe gwe Timoti umwanangu unganigwa. Ilipyana, ikisa nulutengano, ifi fikufuma kwa Kyala tata, na kwa Kristi Yesu uNtwa gwitu, fyo fiyege nanumwe.

Isya kugwa ulupi, nisya kunsubisya

³ Nikugwa ulupi kwa Kyala, uyu nikumbombela ninyibonelo inyelu ukufuma pabisukulu bangu, bo nikukukumbuka ugwe bwila itolo munyiputo syangu pamusi na pakilo.

⁴ Nikusyukwa fiyo ukwaganila nanugwe, bo nikugakumbuka amasosi gako, ukuti nisulege nulusekelo.

⁵ Namanga ndukumbwike ulwitiko lwako ulusitabusyobi, ulu lwatalile ukuya mmwisukulugo Loi, na munyoko Yunike; nanine singolile ukuti lulimo na mu mmyako.

⁶ Po apa nikukukumbusya ugwe ukuti ukakikubililege ikikungilwa kya Kyala, ukuti kyakege kangi iki gwambilile bo ngubikilepo amaboko gangu.

⁷ Namanga umwene Kyala akatupele Mbepo gwa boga, himma, loli atupele Mbepo gwa maka, ugwa lugano nugwa lwiyufyo.

⁸ Popapo lelo ungafwaga isoni ukunsisimikisya uNtwa gwitu, nalinga ko kusisimikisya une ne mpinyigwa gwake. Loli ukubilwege pamopene nanine pakufumusya Inongwa Inunu ukufwana namaka ga Kyala;

⁹ uyu atupokile, nulubilikilo ulwikemo. Namanga akatubilikile ukufwana nimbombo syitu, mma, loli bo mumo alinogonile nganiyuyo, kangi nipyana lyake, ili atupelile mwa Kristi Yesu ukufuma mu mbukulu.

¹⁰ Loli lilino ilipyana lilili libonekile nkwisa kwake uMpoki gwitu Kristi Yesu, uyu abuyosisye itolo ubufwe, mu Nongwa Inunu abubikile pabwelu ubumi nubusitakubolamo.

¹¹ Kyala anyimike une ukuya ntumigwa nukuya mmanyisi gwa kufumusya Inongwa Inunu.

¹² Pali sisisi po apa nikukubilwa, loli ndikufwa isoni, namanga nummenye uyu numwitike, kangi singolile ukuti isakukubatilaga aka ambele une ukufika pisiku lila.

¹³ Ugumililege amasyu amumi aga upilike kumyangu, gayege ka kuketelamo ugwe, uyege mu ndwitiko na ndugano, ifi tuli nafyo mwa Kristi Yesu.

¹⁴ Akanunu aka upegigwe, ko ukubatilege mwa Mbepo Mwikemo, uyu ali mu mmyitu.

¹⁵ Umenye ukuti bosa aba nkisu kya Asia balisambukile une, palikimo na Figeli na Hermogene.

¹⁶ Umwene loli uNtwa abapakisyege abannyumba ya Onesifori, namanga umwene kabilikabili Onesifori, namanga umwene kabilikabili ayisangalusyaga indumbula yangu, gope nunnyololo gwangugulinkusita nukumpelela isoni;

¹⁷ loli bo isile nkaya ka Roma, nakalinga itolo alinkwanda ukundonda abuya anyaga.

¹⁸ UNtwa ampege ulupakisyo lwake mwisiku lila! — Syo nanugwe usimenye fiyo isi alimbombile nkaya ka Efesi.