1 Timoti 1 - BAIBULO INONGWA INUNU

¹ Yo une Pauli ne ndi ntumigwa gwa Kristi Yesu, ukufwana nululagilo lwa Kyala uMpoki gwitu, na Kristi Yesu uyu yo lusubilo lwitu.

² Nikukusimbila gwe Timoti gwe mwanangu gwa naloli ndwitiko. Ilipyana, ikisa, nulutengano, ifi fikufuma kwa Kyala Tata na kwa Kristi Yesu uNtwa gwitu, fyo fiyege nanugwe.

Isya kutusoka ku bamanyisi ba butungulu

³ Bo sisyo nakusumile bo nikubuka nkisu kya Makedonia, ukuti uyege nkaya ka Efesi, ubakanisyege abandu bamo aba bikumanyisya isingi,

⁴ kangi ubabulege ukuti bangabikangapo umoyo patupango, na pangamu sya fikolo muno sikonganile isitakupela napamo, buno sikutwala inyinogono isya itolo, sitikukonga ulubatiko lwa Kyala ulu luli ndwitiko.

⁵ Inongwa yangu yoyakusumusya mmyako ulugano ulu lukufuma mundumbula inyelu na mmabyebye unnunu, na ndwitiko ulusitabusyobi,

⁶ muli isi bamo bapagwike, balabile kumasyu ga itolo.

⁷ Abene bikulonda ukwipela ukuya bamanyisi ba ndagilo, napa bakasyagania isi bikuyoba, nisi bikusisimikisya nubukifu.

⁸ Loli uswe tumenye ukuti indagilo syo nunu itolo, linga umundu ikubomba muno sikulondeligwa;

⁹ bo asimenye ukuti indagilo sikabikigwe panongwa ya mundu ungolofu, loli syabikigwe panongwa ya bilangomelesyo, nabasitakwilambika, nabasitakuntila Kyala nabatulanongwa, nabasitabwikemo, nabasitakwiputa, abagogabisabo nabagogabannabo, nabagoga bandu,

¹⁰ nabalogwe, naba bikulogwa nabanyambala abinabo, bahiyabandu, nabatungulu, naba bikulapa isyabutungulu, nisingi syosa isi sikindene nulumanyisyo ulwa naloli,

¹¹ ukufwana nubukulumba bwa Nongwa Inunu ya Kyala umwimikigwa, iyi mbegigwe une.

Pauli ikugwa ulupi pakisa kya Kyala

¹² Nikugwa ulupi kuli uyu ambele amaka, yu Kristi Yesu uNtwa gwitu, papo ambwene ukuya nsubiligwa, apa ambikege pambombo,

¹³ napa tyolo nali ntukamahelu, nali mfwimabandu, kangi nali gwa matingo. Loli Kyala alinikisa kumyangu namanga nabombelaga mbusitakumanya, na mbusitalwitiko.

¹⁴ Loli ilipyana lya Ntwa gwitu lilinkubala itolo pamyangu, alinkumba ulwitiko nulugano, ifi fili mwa Kristi Yesu.

¹⁵ Ilisyu lilili lyo isubiligwa, kangi libagile ukwambililigwa itolo, ili likuti, Kristi Yesu alisile nkisu nkubapoka abatulanongwa; aba nipelile ukuya ne ntasi gwabo.

¹⁶ Loli panongwa yiyiyi nalwagile ulupakisyo, ukutimmyangu une ne ntasi, mo bubonekelege ubufisalyoyo bosa bwa Yesu Kristi, ko kuti njege ka kuketelamo ka aba bisakumwitikaga, ukuti babwage ubumi ubusitakumalika.

¹⁷ Umwene loli uNtwa uyu aliko bwila na bwila, unsitakufwamo, unsitakuboneka, Kyala yumoywene itolo, yo ulwimiko nubukulumba fiyeko kumyake bwila na bwila. Amen.

¹⁸ Gwe mwanangu Timoti, nikubika ululagilo lululu mmyako, ukufwana nubusofoli ubu bakusololile ngani, ukuti mmasyu gagaga mo ulwilege ubwite ubununu.

¹⁹ Uyege nalo ulwitiko namabyebye amanunu, isi syo bamo basitagile, bendile ukugwa ndwitiko;

²⁰ muli aba balimo ba Himenaya na Aliksandara, aba numpele Setano, sisisi syo sisakubamanyisya ukuti baleke ukuyoba amahelu.