Vailimun 1 - V'nen P'as iv'i Turanien Trtarep' m'a Turanien M'dah

A Pul ivr ip'as an a Vailimun

¹ Kana nv'i a Pul kap'resin sanan a Iesu Kristu, m'ei a Timuti, iv'i tv'ald, nrtep'a ruplet laha asnm, Vailimun, karlap'as anh, sena ti kv'i tv'elm'em' arna m'akarienad.

² Kartep'a ruplet laha asnr Apvia la nrlap'as ani ha, m'ei Arkipas, iv'i tv'elm'em' kav'i m'rnur m'a kam'em' kartap'ei asn sas avlak al nmaham.

³ Nrn ti Atua, iv'i a Tetiad, m'ei a Iesu Kristu, iv'i a Mlinad, apartu vtmien m'a tamat a kam'i.

Vailimun, nvr ip'as an Atua sena vtmienam m'a v'ahien p'asam

⁴ Nvr ip'as an Atua naran nvrurh nakl arna tamatak,

⁵ Sena ti nrn v'nen ivrur ti klap'as an a Iesu, iv'i a Mlinad, kav'ahi, kalap'as a m'ertu p'asan udlani.

⁶ Ntu tamat a ti nakm pav'iv'en v'ahien p'asam, a ti m'ertu apavrndu si p'as udlanian a Iesu Kristu la iter a nlm ha.

⁷ Sena ti nrrn ip'as karlak p'as sena vtmienam, sena ti nakm, tv'elm'em', kmhmah a m'ertu p'asan Atua nakl.

A Pul imiman an a Vailimun a ti ipalev' a Unisimas ipamam'alet ml asnn

⁸ Sena si lera, narn ti p'etu v'nen hua anh arna nahan a Kristu, a ti pan sei ipaviviln,

⁹ V'eti nrn p'emiman anh uaki ipahua arna vtmien. Kana nv'i a Pul, kav'i dui tarep', kap'resin hilaha sanan a Iesu Kristu.

¹⁰ Kana nmiman anh ihua sanan a natk, iv'i a Unisimas, la ima kav'i a natk naran np'resin ha.

¹¹ Tituei, hin iamhmah anh, v'eti hilaha irndu ti ipamhmah anh karndu ti ipamhmah a kana.

¹² Kana ntap'ei ml iv'a asnm. Sena si lera, nrn ti palav'i ipama ml asnm. Naran palav'i, ipanep'a ti klev' nlk.

¹³ Kana m'rn ip'as idvr ti idlak m'a kana kaua m'lnam, kamhmah a kana naran np'resin sena v'nen p'as.

¹⁴ V'eti narn ti p'en si kinkin ipavr ti narndu v'ahienam. Narn ti p'etp'h a ti pamhmah a kana, v'eti nrn ti pan si lera sena ti krn ip'as ani uaki.

¹⁵ Sena ti nsarei hin iruh asnm isusupa, a ti nakm palev'm'alet ani ml ipalak asnm ikahiris naran.

¹⁶ Hilaha, ikav'i m'ertu na m'akarienam ml, v'eti ipasiv' m'ertu na m'akarien, kav'i tv'ald nvlap'as ani. Kana nlap'as ani istudau, v'eti nsarei nakm palap'as ani ipastudau mau, sena ti iv'i m'ertu na m'akarienam arna p'akn, kav'i tv'alm sanan a Mlin Lilad.

Nrndu mamh a ti nakm pan sei nvri

¹⁷ Sena si lera, ipavr ti kv'ah ti kana nv'i tv'alm, palav'i inep'a ti iv'i kana uaki.

¹⁸ Ipavr ti hin iutakm anh v'aha ikaun asnm, pulul ani arna ruplet a ti kana p'etu m'lnen.

¹⁹ Kana, nv'i a Pul, nulul ani hilaha arna lm'ak uaki, kana p'etu m'lnen. V'eti navr anh a ti nakm ktkaun sarei asnk sena silv'ienam.

²⁰ Aau, tv'alk, nrn ti nakm pamhmah a kana, a ti p'ern ipap'as aranan a Mlin Eia. Nakm pani ti nlk iparn ipap'as aranan a Mlin Eia.

²¹ Nulul a ruplet laha asnm, sena ti nrndu mamh ti nakm pan sei nvri. Aau, nrndu ti pani kasiv' sei nmiman anh.

²² Aranan a si lera ml, pandedp' m'lnak al nmaham, sena ti nsarei Atua ipavrpren tamatam'i kani ti p'em'alet kadama ml asnm'i.

²³ Hin a Epavras la nrp'resin m'ei sanan a Kristu Iesu ha, ivr ip'as anh.

²⁴ Hir a Mak, Aristakas, a Timas, m'ei a Luk la nvm'akar m'er ha, hir udlani avvr ip'as anh.

²⁵ Nrn ti vtmienan a Mlin Lilad Iesu Kristu, ipater asn m'im'ilm'i. Amen.