Usia 1 - V'nen P'as iv'i Turanien Trtarep' m'a Turanien M'dah

V'nenan a Mlin Eia ima asn a Usia

¹ V'nen laha iv'i v'nenan a Mlin Eia, ima asn a Usia, iv'i a natn a Peri. V'nen laha ima naran a Usaia, a Sutam, Ahas, m'ei a Esekaia avv'i mlin a Suta, Sarei, ima naran a Serupuam, iv'i a natn a Suas, iv'i mlin a Isrel.

Nl nam'elan a Usia

² Naran a Mlin Eia iendinei ti ipav'ana m'ei a Usia, a Mlin Eia ivr an a Usia, kavr ti a, “Pav'a kalev' a naum, ipav'i tav'et na navanel ipamk. Sarei, a natm apavv'i net tav'et na navanel, sena ti v'anu iten sera pari na tav'et na navanel, sena ti itruh sarei asn a Mlin Eia.”

³ Sarei, iv'a kalev' a Kuma, iv'i a natn tav'etan a Tiplaim. Sarei, itkar, katau a natn dui ani.

⁴ Sarei, a Mlin Eia iv'ana m'ei, kavr ti a, “Patu nahan ipav'i a Sesril, sena ti, ikap'arei, Kana p'etum'alet a sei arna nl nam'elan a Sihu, sena ti itkasr sera din a Sesril. Laha, p'ani ti nl nam'el a Isrel, la avv'i mlin ha, ipahiris.

⁵ Laha, ipatu hin arna napn lera, p'erdus tenpauian a Isrel, al m'ihualan a Sesril.”

⁶ Sarei, tav'etan lera itkar katu a natn tav'et iamk ani. Sarei, Atua ivr ani, kavr ti a, “Patu nahan ipav'i a Lu Ruhama, sena ti Kana nkarn istu a nl nam'el a Isrel ml, aau, p'elev'lar udlani.

⁷ V'eti p'ern istu a nl nam'elan a Suta, aau, p'elev'lar arm'ertu lera--a Mlin Eia, iv'i Atuar, ipalev'lar. V'eti nkalev'lar m'a tenpaui, v'aha tali han, v'aha naur, v'aha hus, v'aha ardu avua hus.”

⁸ Laha, naran a Lu Ruhama lera itln sera nunu, a naun a Usia itkar ml, kalev' dui pa iamk.

⁹ Sarei, Atua iv'ana, kavr ti a, “Patu nahan ipav'i a Lu Ami, sena ti kam'i kaavv'i m'ertuak, Kana nkav'i Atuam'i.

Atua ipamhmah an a Isrel

¹⁰ V'eti apaspanr arm'ertu a Isrel uam, apavstudau kavnep'a sera nun al nata, la akatinei, v'aha akaspandri ha. Laha, ipatu hin, arna nut atvr sarei anr, kavr ti a, ‘Kam'i kaavv'i m'ertuak,’ aau, arna nut lera apavr ti a, ‘Kam'i kvv'i a natn Atua, la isilv' ha.’

¹¹ Naran lera, arm'ertu a Suta m'er arm'ertu a Isrel apavp'lt ml, kavtaui ti mlin ipamk ipap'aurr. !Laha, apavv'el dan arna v'anu, sena ti napn na ti a Sesril ipap'tir ipav'i napn p'as ipamk!