Tklien 1 - V'nen P'as iv'i Turanien Trtarep' m'a Turanien M'dah

A Serusalem ilak arna der

¹ !V'anu lil ilak mamk uaki, Aau, v'anu lil, la ilini a m'ertu ha! !Ilak kanep'a sera tvtanu, V'eti itauamu iv'i v'anu lil iamk asnr v'anu uraur nakl! !Nki iv'i a natn a hau lil, naran iv'el kadav'a aranar pruvins nakl, Itama sarei kav'i tav'et na parei!

² Naran iv'i lihat, ivalau istudau, Ui m'aten irs arna pla nahn. Asnr ardu, la itm'atr sarei m'er ha, Nki iamk ihei ml, a ti ipalak kamhmah ani. Tv'aln udlani atvhap'il sarei m'ei, katvutakm sarei ani, Atvrama sarei kavv'i m'ertu avmlani nakl.

³ A Suta itav'a sarei kap'resin arna v'anu uraur. Ilak a nv' der lil iamk, kan pari hua sanar m'ertu uraur. Ilak asnr v'anudl, V'eti ialak arna tamat. Arm'ertu avutakm ani Kavsiv'i naran ilak arna der lil.

⁴ Navanel, la apav'el aranar kadav'a a Saiun ha, avrn istu, Sena ti m'ertu kinkin iahv'a ml, a ti ipav'a sanar tim'ah lilil, la attu sarei a ti apavani ha. M'ertu kinkin ialak asnr pn liuan ml. Arpris avm'im'in ihua. Atvutakm sarar uarav'aran (la avlak atlera ha), Aau, v'anu lil irn ti si udlani ihaau.

⁵ Arm'ertu, la avan naur m'ei ha, atvrama sarei kavv'i mlin. Arm'ertu, la avmlani ha, aviak a sei istudau. Sena ti a Mlin Eia itutakm sarei ani, Sena ti iten sera si stu istuduet. Hir a natn atvrav'a sarei kavp'resin arna v'anu uraur, Arna nahr arm'ertu avmlani.

⁶ Itauamu, a natn tav'etan a Saiun ip'eset, V'eti hilaha, si lera itruh sarei asnn. Armlinan atvrama sarei kavnep'a sera si dm iv'i tia, La ahavrndu ti apavpasla nina a ti apavhani ha. Avruh asn m'ertu itkr anr, V'eti nut huar ihei ml.

⁷ Naran a Serusalem ilak arna der, Aau, naran iunanut uaki nakl, Iv'ahur si p'sp'asan udlani, La iak anr itauamu ha. Naran arm'ertuan avrs al lm'ar arm'ertu avmlani, M'ertu ihei a ti ipasr lm'an. Arm'ertu, la avlep'lei ha, avlei, Sarei kavsip'lani, sena ti itars sarei a nadep'.

⁸ A Serusalem iten sera si stu, aau, sei iani istuet. Sena si lera, itama sarei kav'i sei, la iviviln a ti apasrani ha. Itauamu, arm'ertu udlani avv'ah ti iv'i si p'as iamk, V'eti hilaha avlep'lei, Sena ti atvla sarei naran imalmal. Aau, hilaha, im'im'in ihua katetvan tahn asnr.

⁹ Tkv iter arna kka klusan, Sena ti idav'ahur sei ipaiari naran idsilv' uam. Sena si lera, irs a nadep' dau. Laha, m'ertu ihei a ti ipamhmah ani. “U, Mlin Eia, pap'a kana, sena ti nlak arna der, Sena ti m'ertu imlen kana ip'tir eia, kahua!”

¹⁰ M'ertu ilep'lei a Serusalem itlmlm sera lm'an, A ti ipalav'r si p'sp'asan udlani. Sena ti itla sarar v'anudl, Naran avrav'a eim al nutetan, Aau, hir, la ktv'ana hua sarei m'er ha, Katvr sarei anr a ti amavrav'a eim kavp'tir asnr arm'ertuam.

¹¹ Arm'ertuan avm'im'in ihua, Avtala p'ret nakl. Atvtu sera si p'sp'asar a ti apavlev' tim'ah a ti apavsilv' uam. “Pap'a kana, U Mlin Eia, Kav'ahur kana, Sena ti m'ertu atvsip'len sera kana.

¹² ?Kam'i, la kvv'el kavv'siau a kana ha, iav'i sei asnm a ti der laha ier kana? Pap'a mamh kana, kav'ahur ti Aparndu ti aparn ipastu ipanep'a nut kana nrn istu inap'ei, v'aha ikahei. A Mlin Eia Itrp sera kana m'a si laha, Arna napn na ti nln irer istuduet.

¹³ Ittep'a sera nap' iamk asnk, iv'a al suk, Laha, ilev'la nut huar. Ittu sera nam'et iamk arna nadep', a ti ipauadar tlk, Sarei, iani ti nvav kana kam'alet. Iten sarei ti nlak mamk uaki, Nrn np'k dav'a, ier lihat.

¹⁴ Atua iv'et nahau m'a lm'an, Sarei, kahuda triuauahan, la iv'i si stuak ha, Arna vak. Iani ti nut huak ihei ml. A Mlin Eia itu kana al lm'ar arm'ertu La nkap'tir kamlanr ha.

¹⁵ A Mlin Eia itpas sarar ardu huak, la avlak asnk ha, Aau, itpas sarar a nv' tln. Itv'ara sarei anr arm'ertu, la atvp'lt sarei A ti apavrpep'nr malakalak ha. A Mlin Eia itpas sarei a natn tav'etan a Suta, la iv'i uarav'aran ha, Aau, itpas sarei inep'a nut apas krep inap'ei.

¹⁶ Sena si lera, kana nvalau. M'atak, aau, m'atak ilini, dav'a uin irarev' istudau. Sena ti hin, la irndu ti ipani ti p'esilv' ml ha, Ilak v'iv'a au a kana. Hir a natk avlak mamk uaki, Sena ti m'ertu imlen kana itsiv' sera kana.”

¹⁷ A Saiun ilmlm lm'an, V'eti m'ertu kinkin iamhmah ani. A Mlin Eia itv'ana sarei, v'nenan ivrur a Sikup. Itv'ana sarei, kavr ti arm'ertu avlak kavmldani nakl Apavv'i m'ertu apavmlani. A Serusalem itama sarei kav'i tkv stu iamk asnr.

¹⁸ “P'kln a Mlin Eia iviviln uaki, Sena ti iv'i kana np'tir kamlen v'nen huan. Arm'ertu udlani, pavrn sei nvri hilaha, Aau, pavp'a kana kavla ti nrn istu istudau. Uarav'aranak m'er malakalak Atvp'resin sarei arna v'anu uraur.

¹⁹ Nv'ara anr arm'ertu, la ntm'atr sarei m'er ha, V'eti avhap'il m'a kana. Arprisak m'er m'ertarep'ak Ahavm'im'in ml arna v'anu lil, sena ti atvram'a sarei. Aau, inap'i lera naran avtala tim'ah A ti apavsilv' uam.

²⁰ U, Mlin Eia, pala ti kana nlak karn istuet. Nrn istu arna m'im'ilk. Nlk itvavp'la sera hin, Sena ti ntv'i sera pthua istudau. Arna nut av'aran, tali han iani ti m'ertu itakal, V'eti eim al nmaha m'ertu, inep'a sera m'ien uaki nakl.

²¹ Atvrn sarei ti kana nm'im'in ihua, V'eti m'ertu kinkin iamhmah a kana. Arm'ertu avmlen kana atvv'rn sarei a ti nlak arna der, Laha, avrn ip'as, sena ti Nakm kten sera si laha. Pani ti napn, la ktvrp'ep'a sarei a ti ipama ha, ipama ipalahml sarei, A ti hir lera apavrama kavnep'a sera kana.

²² Nrn ti Nakm pala si stu udlani avani, Sarei, pani anr ipanep'a nut Kten sarei a kana inap'ei, Sena si stuak udlani. Sena ti nm'im'in ihua istudau, Laha, nrn np'k arna nlk.”