Taniel 1 - V'nen P'as iv'i Turanien Trtarep' m'a Turanien M'dah

A Taniel m'er tv'aln avan sei a Mlin Eia ivr ti apavani

¹ Arna nitla pai na ti a Sehuiakim iv'i mlin a Suta, hin a Nepukatnesa, iv'i mlin a Papilun, ima a Serusalem kamlani, kani ti m'ertu ikahv'a eim al v'anu lil, m'ertu ikahv'a av'aran nen.

² Laha, a Mlin Eia itau a Sehuiakim, iv'i mlin a Suta, al lm'an. Sarei, itaur si kinkin uraur ani, avv'i sei am'akar m'ei al nmah tamat. Laha, ilev'lar kauirv'a arna v'anu a Sinar, kataur al nmah tamatan atuan. Ilev'lar sei, la am'akar m'ei ha, lera, kataur al nmahan atuan, iv'i nmah atu si p'sp'as a nln nakl.

³ Sarei, a mlin (iv'i a Nepukatnesa) iv'ana m'ei Aspenas, iv'i m'ertu ip'aurr tamav, kavr ani ti ipalav'r m'ertu a Isrel kinkin, m'er arki avv'i a natn a mlin, m'er arm'ertu lilil kinkin.

⁴ Ardu lera apavv'i malakal, akavstu arna nut kinkin, p'akr apavp'eset, sarei, apaviak a v'ahien p'as, kavrndu sei, aau, apavrndu ti apavv'ahur sei, kavrndaui ipalahml sarei uaki. Sarei, apavrndu ti apavm'akar al nmahan a mlin. Sarei, arm'ertu na v'anu a Kaltia lera apavv'iv'en anr nut apavv'ana arna v'nenar, sarei, apavv'ana arna pukar nakl, dav'a ti apavrndaui.

⁵ Sarei, a mlin itaui ti apaviak a tim'ah p'sp'asan a mlin, m'a naui m'iel hin im'ni nakl, aau, apaviak ani arna napn udlani. Sarei, itaui ti m'ertu apavv'iv'en sei anr, pai ipatl. Naran pai lera apavv'siau, apavm'akaran a mlin.

⁶ Laha, hin a Taniel, a Hananaia, a Misael, m'ei Asaraia, avv'i hir kinkin, la avdan arna nl nam'el a Suta ha.

⁷ Sarei, mlinar tamav itau naha m'dah anr. Laha, itu nahan a Taniel iv'i a Peltasasar, katau nahan a Hananaia iv'i a Satrak, katau nahan a Misael iv'i a Misak, katau nahan Asaraia iv'i a Apetniku.

⁸ Sarei, a Taniel iak a v'ahien iamk, a ti ikautakm a hin m'a tim'ah p'sp'asan a mlin, m'a naui m'iel, la a mlin im'ni nakl ha. Sena si lera, imiman an a mlinar tamav, kavr ti iarn ti iputakm a hin.

⁹ Laha, Atua iten sarei ti a mlinar tamav lera ilap'as an a Taniel, karn ti ipamhmah ani.

¹⁰ Sarei, a mlinar tamav iv'ana m'ei a Taniel, kavr ti a, “Kana ndedrn an a mlin, la ittu sera tim'ah m'a nauei nakl sanam'i. ?Sena ti ipavr ti ipala ti naham'i akavp'as kanep'a sarar nahar malakal paiar inap'amk m'a kam'i, v'eti ipanap'i? Ipavr ti ipanap'i lera, nsarei a mlin ipalev'la ptk, kana p'am'a.”

¹¹ Laha, a Taniel iv'ana m'a dui lil, la a mlinar tamav ittu sarei a ti ipap'aurr a Taniel, a Hananaia, a Misael m'ei Asaraia ha, kavr ani, kavr ti a,

¹² “Pandinar m'ertu na m'akarienam napn ipanal. Pam'ahu a ti apavtu tim'ah na pitvet uaki a kam'em', kavtu naui p'rei uaki a kam'em'.

¹³ Sarei, kam'em' p'vp'tir arna nahm, sarei, arm'ertu apavp'a mamh p'akm'em'. Sarei, pani ti armalakal, la avhan tim'ah p'sp'asan a mlin ha, apavp'tir, pavp'a p'akr. Sarei, pan sei a kam'em', nv'i m'ertu na m'akarienam, ipanep'a nut nakm kv'ah ti iviviln.”

¹⁴ Sarei, irn ip'as a v'ahien lera, sarei kandinar napn inal.

¹⁵ Sarei, naran napn inal av'siau, nahr avp'as, avmrmr kasiv'r malakal udlani, la avhan suadar, la iv'i tim'ah p'sp'asan a mlin ha.

¹⁶ Inap'i lera, dui, la ip'aurr ha, ilev'lar si p'sp'asan a mlin, m'a naui m'iel (la attu sarei a ti apavm'ni ha) asnr, katau tim'ah na pitvet uaki anr.

¹⁷ Laha, Atua iani ti malakal arv'a (4) lera avrndu sei mau, kavrndu sei aulul ani arna puk, kaviak a v'ahien p'as nakl. Sarei, a Taniel irndu ti ipavrp'ep'a sei m'ertu ilei naran isp', m'a sei m'ertu ilei naran im'atr.

¹⁸ Laha, naran napn attu sarei av'siau, naran a mlin itvr sarei ti apavani ti apavrav'a eim, a mlinar tamav iuirv'ar eim, avrav'a asn a Nepukatnesa.

¹⁹ Sarei, a mlin itu v'nen hapr anr nakl. Laha, ahavpaslar m'ertu kinkin avnap'ar a Taniel, a Hananaia, a Misael, m'ei Asaraia. Sena si lera, avm'akar arna nahn a mlin nakl.

²⁰ Laha, naran a mlin iendinar, a ti iparndu ti aviak a v'ahien p'as, kavrndu sei, v'aha ihei, v'eti ipasla ti avrndu sei isiv'r tiet udlani, m'er m'ertu udlani la avvrur nal nakl, la avlak arna v'anuan ha. Avp'as mau kavsiv'r iv'anal.

²¹ Laha, a Taniel iani inap'i lera, dav'a ti iv'i pai itauamu na ti a Sairus iv'i mlin.