Taitas 1 - V'nen P'as iv'i Turanien Trtarep' m'a Turanien M'dah

A Pul ivr ip'as an a Taitas

¹ Kana nv'i a Pul kav'i dui na m'akarienan Atua kav'i apuselan a Iesu Kristu, a ti m'ertu Atua itv'li sarar apavp'tir arna v'ahien p'asar kavrndu mamh v'nen dau kavsapa p'kl p'asan Atua.

² A ti p'vtrah turanien na silv'ien ikahiris naran. Silv'ien lera, Atua la iahap'il naran kinkin ha, itturan sarei naran nadep' idahei.

³ V'eti arna naran iviviln ani iv'iv'en v'nenan kani ti m'ertu avvrp'ep'ei. Atua la ilev'la nakd ha, Hin itaui al lm'ak a ti p'evrp'ep'a v'nen p'as lera.

⁴ Nulul a ruplet laha asnm, Taitas, kv'i a natk dau, sena ti v'ahien p'asad inap'amk. Nrn ti Atua, iv'i a Tetiad, m'ei a Mlinad, iv'i a Iesu Kristu, la ilev'la nakd ha, apartu vtmien anh, karrn istu anh, karani ti palak arna tamat.

P'klr elta arna sas

⁵ Sena si laha kana nlnh arna nut a Krit, a ti pamhmah a parei la iter uam ha, katu elta kinkin arna v'anu udlani, inep'a nut ntvr sarei anh inap'ei.

⁶ Patu m'ertu ipav'i elta ipavr ti silv'ienan iviviln arna nah nelnal. A naun ipamk uaki, a natn akvsapa v'ahien p'as pr, amavsip'len v'nenar a tetiar m'ei a uniar, m'ertu amavvr ti avan ptr.

⁷ Sena ti dui ipap'aur sas, silv'ienan ikviviln arna nah nelnal pr, sena ti ien parian Atua. Imav'i pthua, nln imahrer ipalahml, imav'i dui na m'nm'nien v'aha dui na thathien, imarn nam'er a nav'et.

⁸ V'eti ipamhmah a v'anudl nakl, kalap'as a si p'as udlani, v'ahienan ipap'as, p'kln ipaviviln, silv'ienan ipasapa p'kln Atua nakl, ipatukar si stu iter a nln nakl.

⁹ Ipauada mamh v'nen p'as dau la atv'iv'en sarei ani ha, a ti iparndu ti ipav'ana m'a m'ertu avmlani, kav'iv'en v'nen p'as anr a ti apavrndu si stuar.

Pav'ana hua m'er m'ertu v'nenar iap'as

¹⁰ Sena ti m'ertu istudau ahavrn ti apavsapa v'nen p'as, kavvrur si kaka nakl kavhap'il. Hir kinkin la avvr ti m'ertu apavan p'au pr anr ha, avnap'i lera.

¹¹ V'eti nakm pap'leskar pnr, sena ti hir avutakm a v'ahienar m'ertu udlani avlak a nl nam'el kinkin kavv'iv'en sei iaviviln, a ti apavlev' nav'et arna navanel stu lera.

¹² Hir kinkin iamk, la hir avvr ti iv'i pruvetar ha, ivr ti a, “M'ertu a Krit avhap'il nakl, kavnep'a si dm stu, kavhan tim'ah dav'a, np'r istu nakl.”

¹³ V'nen lera ivrdaui. Sena si lera, pav'ana hua m'er ipahua, a ti apavviviln arna v'ahien p'as.

¹⁴ Amavv'ah v'nen kakar m'ertu a Isrel m'a v'nen huar m'ertu la atvln sera v'nen dau ha.

¹⁵ Ipavr ti m'ertu avp'as, si udlani ipap'as asnr, v'eti ipavr ti nl m'ertu istu, ahavv'ah a Iesu Kristu, si udlani ipastu asnr, sena ti v'ahienar istu. Avan sei v'ahienar ivrkari.

¹⁶ Avvr ti avrndau Atua, v'eti pariar iv'iv'en ti avhap'il uaki. Atua ilep'lar, avluvn a v'nenan, ahavviviln a ti apavan pari p'as kinkin.