Sut 1 - V'nen P'as iv'i Turanien Trtarep' m'a Turanien M'dah

A Sut ivr ip'as anr m'ertu Atua iv'ara anr

¹ Kana nv'i a Sut, kav'i dui na parian a Iesu Kristu kav'i tv'aln a Sim'is. Ntep'a ruplet laha iv'alet asnm'i, kvv'i m'ertu Atua, iv'i a Tetiad, iv'ara a kam'i kauada kam'i sena ti kvp'lt m'ei a Iesu Kristu, kani ti kvp'as.

² Nrn ti Atua iparn istu a kam'i katu tamatan m'a vtmienan ipama kalil mau asnm'i.

Pavp'tir sena v'ahien p'as

³ Tv'alk nlap'as a kam'i, itauamu nrni istudau a ti p'ulul a v'nen laha ipav'alet asnm'i kavrur nut Atua ilev'la nakd inap'ei. V'eti hilaha nkulul ani pr kavri ipahua a kam'i a ti pavv'ana ipahua kavp'tir sena v'ahien p'as, la Atua ittu sarei iv'amk anr m'ertuan ha.

⁴ Sena ti m'ertu kinkin la avmlen Atua ha, avrama kavhap'il m'a kam'i, v'eti kaavledaur. Atua ittu sarar tituei a ti apavmln ipanap'i lera. Hir avvav v'nen ivrur vtmienan Atua kavani ti ima kav'i v'nen im'ahu a si stu iv'i mamihien, kavtetvan tahr an a Mlin Eia, la Hin uaki iv'i Atua ha, m'ei a Mlin Lilad, a Iesu Kristu.

M'ertu stu kinkin, tituei ier hilaha, ahavv'ah Atua kavsapa sei nlr uaki irni

⁵ V'nen laha, kam'i ktvrndu sarei, v'eti nrn ti pavv'ahuri ml. Atua ilev'lar m'ertu a Isrel arna nut a Itsip, v'eti itauatah iutakm a m'ertu ahavv'ahi.

⁶ V'eti ensel la ahavuada parei Atua itau anr itauamu ha, avruh kavln m'lnar. Hir Atua ilav'r kasranr al m'alk kahudar a sen apavp'resin dav'a ikahiris naran, kavtrah naran Atua ipav'ana hua m'er arna Napn Lilan.

⁷ Nut a Satam m'ei a Kamara m'a v'anu itertalu anr avnap'i lera. M'ertu arna nut lera avan si stu m'a tav'et nakl kavan si uraur ml inap'i lera, laha, der iarr sanan avrav'a al nep'v'en ikahiris naran, sena ti ipav'iv'en sei a m'ertu.

⁸ Arm'ertu lera avnap'i lera. Avm'atr kavla sei uaki, iani ti avan si stu nakl arna p'akr iv'i mamihien, kavsip'len kavman, kavv'ana stu kavvrur m'ertu lilil.

⁹ V'eti naran mlinar ensel, iv'i a Maikel, iv'ana m'ei a Sitan kavrur p'akn a Musis, hin idedrn a ti ipav'lv'al m'ei kavrp'ep'a si stuan, v'eti ivr ti a, “A Mlin Eia ipav'ana hua m'ah.”

¹⁰ V'eti hir avsip'len sei ahavrndaui, kavnep'a sera si dm avsapa v'ahienar uaki, kavutakm a hir aranan.

¹¹ U, der ipaiarr, sena ti atvsapa navanelan a Kein, katvvrvr ilahml kavrav'a arna si stuan a Peilam, sena ti avrn nam'er a nav'et, katvmln inap'ei a Kura la imlen Atua ha.

A Mlin Eia iputakm anr m'ertu udlani la ahavv'ahi kavmlani ha

¹² Hir avnep'a sera nav'et itutuah a nv' nata, kavutakm a tim'ah na vtmienam'i naran avp'lt m'a kam'i, kavmsnen hir uaki, ahavmamih. Avnep'a p'knaran tva iauirma nu, nalen itvi uaki iv'el, kavnep'a nai itsiv' sera naran na ti ipavan, navan ihei, kavnep'a ti avram'a iv'aru, kavnep'a nai adenlei.

¹³ Avnep'a nahu na nata imaur, si stuar inep'a tup'ia nata la iv'iv'en sei avmamih ani ha, kavnep'a sera msi iv'el, v'eti Atua iten sera m'lnar iv'i nut m'alk kadam't istudau ikahiris naran.

¹⁴ Hin a Inuk iv'i saru na nl nam'elan Atam, ivrp'ep'a v'nen kavrurr, kavr ti a, “Pavlei, a Mlin Eia ima m'er m'ertu p'asan inelnal.

¹⁵ Sena ti ipav'ana hua m'a m'ertu udlani kutakm a m'ertu stu asnr sena si udlani avani istu, sena ti ahavv'ah Atua, kav'ana hua m'er sena v'nen stu udlani m'ertu stu avvri kavmlani.”

Arna naran itauatah, m'ertu apavvtma didilin anr m'ertuan Atua, kavsapa si stu avrni uaki arna nlr

¹⁶ Hir avka der nakl kavsip'sip'l iel kavsapa si stu nlr irni uaki kavukl hir istudau arna v'nenar kavv'ana ilalm asnr m'ertu sena ti apavlev' sei asnr.

¹⁷ V'eti tv'alk nlap'as a kam'i, nrn ti pavv'ahur v'nen p'as apuselan a Mlin Lilad a Iesu Kristu avvri tituei.

¹⁸ Kavvr ti arna naran ipatauatah m'ertu apavvtma didilin a p'klm'i kavsapa si stu avrni uaki arna nlr, sena ti ahavv'ah Atua.

¹⁹ M'ertu avnap'i lera apavruh asnm'i kavsapa sei nlr irni uaki. M'im'iln P'as ialak a nlr.

Pavuada v'ahienam'i arna vtmienan Atua

²⁰ V'eti tv'alk nlap'as a kam'i, pavm'akar a ti pavhua mau arna v'ahien p'asam'i kavtu tamat arna nut hua na M'im'iln P'as.

²¹ Pavuada v'ahienam'i arna vtmienan Atua kavtrah a Mlin Lilad, a Iesu Kristu, a ti iparn istu a kam'i katu silv'ien ikahiris naran a kam'i.

²² Pavrn istu anr m'ertu kinkin isiv' m'ertu uraur.

²³ V'eti m'ertu uraur pavuadar kavlev'lar al nep'v'en, kavdedrn, kavlep'la p'kl stuar, la inep'a klus m'i mtamt nar iter aranan ha.

Atua uaki iv'i Mlin kalil istudau

²⁴ Atua uaki irndu ti ipauada kam'i kani ti mkavrars. Hin uaki ipani ti pavp'tir arna nah si p'sp'asan kavp'as udlani kavrn ipap'as ipastudau.

²⁵ Atua iamk uaki, irndu sei kalev'la nakd. Nakd p'vani ti nahan ipav'a eia kavvrp'ep'a ti Hin uaki iv'i Mlin kalil istudau, nut hua udlani iv'i nkan, hilaha dav'a dav'a ikahiris naran. Amen.