Sup 1 - V'nen P'as iv'i Turanien Trtarep' m'a Turanien M'dah

¹ Dui iamk ilak arna v'anu a Us, nahan iv'i a Sup. Dui lera ip'as istudau, p'kln iviviln. Iv'i dui idedrn an Atua, katetvan tahn a si stu nakl.

² A natn dui avsaru, a natn tav'et artl.

³ Laha, iak a sivsiv avv'i 7,000, m'er kam'el avv'i 3,000, m'er pluk la arruru nakl ha, avnelnal iv'alm' (500), m'er prapar na tuki avnelnal iv'alm' (500). M'ertu istudau avlak al nmahan. Inap'i lera, dui lera iv'i dui lil iamk, isiv'r arm'ertu udlani la avlak arna Is ha.

⁴ Laha, a natn dui avan tim'ah lil a utar nakl, hir udlani p'sev' avani arna napn atvtu sarei a ti apavani. Sarei, avv'ara anr a v'nr a ti apavrav'a kavhatat kavm'nm'n m'er.

⁵ Sarei, naran napn na tim'ah lil atvhiris sarei, a Sup itap'er m'ertu a ti apavmhmah anr a ti apavan parian Atua. Sarei, ithal m'etav'aran nrnren katu uvrin aali an Atua, kaspanr isapar a natn. Sena ti a Sup ivr ti a, “Imahei ti a natk dui atvan sera si stu, v'aha atvv'ana stu m'ei Atua a nlr.” A Sup iani inap'i lera iel.

A Sup iv'i dui p'as iamk

⁶ Dav'a, arna napn iamk, arm'ertuan Atua avrav'a a ti apavp'tir arna nahn a Mlin Eia. Laha, a Sitan iv'a kap'tir asnr.

⁷ Sarei, a Mlin Eia ivr an a Sitan, kavr ti a, “?Nakm kdan ip'i?” Laha, a Sitan ivrprani, kavr ti a, “Kana nunanut uaki arna nadep' ka. Nv'a ki laha, sarei kam'alet kadav'a a ki laha arna nadep'.”

⁸ Sarei, a Mlin Eia ivr an a Sitan, kavr ti a, “?Nakm ktv'ahur sera m'ertu na m'akarienak, iv'i a Sup? M'ertu uraur ihei inap'ei arna nadep' ka. Iv'i dui iamk ien si p'as istudau, p'kln iviviln. Iv'i dui idedrn an Atua, katetvan tahn a si stu nakl.”

⁹ Laha, a Sitan ivrpren a Mlin Eia, kavr ti a, “A Sup lera idedrn an Atua. ?V'eti nsarei iani uaki, iav'i sena si kinkin?

¹⁰ Nsarei Nakm kttu sera naml iamk imldani, kamldan nl nam'elan, m'a si udlani iv'i nkan, iv'a arna tv'eliel udlani. Nakm ktmhmah sarei ani, kattu sera sei ani naran ien parei m'a lm'an. Sian istuduet arna v'anu.

¹¹ V'eti hilaha, Nakm pah lm'am kaier si udlani iv'i nkan. !Sarei, hin ipap'tir arna nahm kav'ana stu m'ah uaki!”

¹² Sarei, a Mlin Eia ivr an a Sitan, kavr ti a, “Palei, si udlani, la iv'i nkan ha, iter a nv' nut huam. V'eti maier p'akn.” Sarei, a Sitan iruh arna nahn a Mlin Eia.

Der lil ier a Sup

¹³ Dav'a, arna napn iamk, hir a natn dui m'er a natn tav'etan a Sup avhatat kavm'nm'n al nmaha tv'alr iamk, iv'i titiamu nar.

¹⁴ Sarei, m'ertu iamk iv'a asn a Sup, kavr ti a, “Arpluk avv'el kavrv' sei itr nadep' nakl. Sarei, artuki avp'tir asnr kavhan suadar.

¹⁵ Sarei, arm'ertu a Sapia avrama kavlev'lar udlani. Aau, avtrpep'nr arm'ertu na m'akarien m'a tali han. !Kana uaki nruh asnr a ti p'vrp'ep'ei anh!”

¹⁶ Naran iv'ana uam, nki uraur iv'a asnn, kavr ani, kavr ti a, “Nap'an Atua iendan arna nut eia, katu nap' anr sivsiv m'er arm'ertu na m'akarien, dav'a kakap'nr. !Kana uaki nruh asnr a ti p'vrp'ep'ei anh!”

¹⁷ Sarei, naran iv'ana uam, nki uraur iv'a asnn, kavr ani, kavr ti a, “Arm'ertu a Kaltia avp'lt arna nut itl, sarei, avrama kavv'nahr kam'el udlani. Aau, avtrpep'nr arm'ertu na m'akarien m'a tali han. !Kana uaki nruh asnr a ti p'vrp'ep'ei anh!”

¹⁸ Sarei ml, naran iv'ana uam, nki uraur iv'a asnn, kavr ani, kavr ti a, “A natm dui m'er a natm tav'et avlak a utan a tv'alr, la iv'i titiamu nar ha,

¹⁹ sarei, nalen lil iamk iendan arna nut kaka karpr kka nmah iv'a, sarei irs aranar malakal lera. Inap'i lera, atvram'a sarei. !Kana uaki nruh atlera, a ti p'vrp'ep'ei anh!”

²⁰ Laha, a Sup ip'tir kaiapr klusan, kakr niln arna ptn. Sarei, irs a nadep' kapatei Atua.

²¹ Sarei, ivr ti a, “Naran ndan al v'atn a uniak, nmalmal uaki. Sarei, naran p'em'alet ml, p'emalmal uam. A Mlin Eia ittu sera sei a kana, sarei, a Mlin Eia itlev'la sera sei. Nrn ti nahan a Mlin Eia ipav'a eia uaki.”

²² Arna si udlani lera, a Sup iahan si stu kinkin, iavr ti a Mlin Eia iten sera si stu kinkin.