Suna 1 - V'nen P'as iv'i Turanien Trtarep' m'a Turanien M'dah

A Suna iarn ti ipan sei Atua ivri

¹ Laha, v'nenan a Mlin Eia ima asn a Suna, iv'i a natn Amitai. Laha, Atua iv'ana, kavr ti a,

² “Pilaph, kadav'a a Nineva, la iv'i v'anu lil iamk ha, sarei kavrp'ep'a v'nen hua ipamk atlera, sena ti si stuar itama sarei eia asnk.”

³ V'eti a Suna ip'tir a ti iparuh arna nahn a Mlin Eia kadav'a a Tasis. Laha, iv'a auei a Supa, kapasla nauak iamk, itv'i ti ipav'a a Tasis. Sarei, iul alan, kadav'a arna nauak, a ti ipasapar m'ertu lera kadav'a a Tasis, a ti iparuh arna nahn a Mlin Eia.

Nata ihua

⁴ V'eti a Mlin Eia itep'a nalen lil iamk, iv'el kaier nata lera. Laha, nalen lil lera itv' nata dav'a ti itv'i ti nauak ipamrmaur.

⁵ Laha, arm'ertu avm'akar arna nauak avdedrn. Sarei, hir udlani p'sev' avv'ara an atuar. Sarei, avsran si udlani iter arna nauak al nata, a ti ikahdv ipanep'a itauamu. V'eti a Suna itav'a sarei auei arna nut auei dau na nauak, katm'atr sarei arna nadep', hin itm'atr dul.

⁶ Sarei, m'ertu ip'aur nauak iv'a asnn, kavr ani, kavr ti a, “?Dui na m'etrien, kan v'ata? Pilaph, kav'ara an Atuam. Nsarei Atuam ipav'ahur nakd, a ti nkavram'a.”

⁷ Laha, avvrvr a hir, kavvr ti a, “Avrama, p'van hlhal, a ti p'vrndu ti der lil, la itier nakd ha, itier nakd sena hin ak.” Laha, avan hlhal, sarei, iv'iv'en ti iv'i a Suna.

⁸ Sarei, avv'ana m'ei, kavvr ti a, “!Pavrp'ep'ei a kam'em'! ?Der laha itier sera kam'em' sanan a hin ak? ?Nakm kan pari v'ata? ?Kdan ip'i? ?Kv'i m'ertu ip'i? ?Arm'ertuam avv'i m'ertu v'ata?”

⁹ Sarei, ivr anr, kavr ti a, “Kana nv'i m'ertu a Isrel. Aau, kana ndedrn an a Mlin Eia, iv'i Atua na nut eia, la ien nata m'a nadep' ka.”

Avsran a Suna al nata

¹⁰ Inap'i lera, ardu lera avdedrn istudau, kavr ani, kavr ti a, “?Nakm kten sera si laha sena v'ata?” Sena ti avrndu ti itruh sarei arna nahn a Mlin Eia, sena ti itvr sarei anr.

¹¹ Sarei, avvr ani, kavvr ti a, “?P'van v'ata anh, a ti nata ipalak ms sanad?” Sena ti nata ima kahua mau.

¹² Laha, ivr anr, kavr ti a, “Paua kana kasran kana al nata. Sarei, nata ipalak ms sanam'i. Sena ti nrndu ti nalen lil laha iv'a sena sei kana nani.”

¹³ V'eti ardu lera avrv' nai na nauak ihua, a ti apavm'alet kavier aelan kinkin, v'eti ahavrndu ti apavani, sena ti nata ima kahua mau, irpr ihua.

¹⁴ Sena si lera, avv'ara an a Mlin Eia, kavvr ti a, “Nvtu tamat anh, U Mlin Eia. Mam'ahu a ti kam'em' p'vram'a sena silv'iena dui laha. Mav'ana hua m'a kam'em', inep'a ti ntvkasr sera di m'ertu, la idahan si stu kinkin ha. Sena ti nakm, U Mlin Eia, kten sera sei ktv'ah sarei a ti ipaviviln a nut kv'ahi inap'ei.”

¹⁵ Inap'i lera, avuei a Suna kavsrani al nata. Sarei, nata iahua ml, ilak ms uaki.

¹⁶ Sarei, ardu lera avdedrn an a Mlin Eia istudau. Sarei, avtu sakrivais an a Mlin Eia, kavturan sei ani.

Tilau lil

¹⁷ Laha, a Mlin Eia itendedp' sera tilau lil iamk, a ti ipadrlm' a Suna. Laha, a Suna ilak a nl tilau lera napn itl, lihat itl.