Suil 1 - V'nen P'as iv'i Turanien Trtarep' m'a Turanien M'dah

Der lil ipaier a Suta

¹ V'nen laha iv'i v'nenan a Mlin Eia, la ima asn a Suil (iv'i a natn a Petuel) ha.

Si kinkin ikahei arna nadep'

² !Kam'i arm'ertarep', pavrn si laha! !Kam'i arm'ertu kvlak arna v'anu, pavv'rn mamh! ?Si kinkin inap'i laha ittu sera hin naran kinkin arna naran kam'i kvsilv', v'aha inap'i? ?V'aha arna naran na ti a tetiam'i avsilv'?

³ Pavvrp'ep'ei anr a netm'i. Aau, a netm'i apavvrp'ep'ei anr a natr, m'er a natr anr a natr, la apavtauatah anr ha.

⁴ Sei tapat (la iha sei ha) itln sarei, tapat (la itetv ha) ithan sarei. Laha, sei tapat (la itetv ha) itln sarei, tapat (la ivrvr arna nadep' ha) ithan sarei. Sarei, sei tapat (la ivrvr arna nadep' ha) itln sarei, tapat (la ihan si udlani ha) ithan sarei.

⁵ Kam'i arm'ertu na m'nm'nien, pavthal kavvalau. Kam'i arm'ertu kvlap'as a ti pavm'n naui m'iel, pavtakal. Pavtakal sena naui m'iel m'dah, sena ti attrla sarei, ikaiarr pnm'i.

⁶ Sena ti v'anu iamk itama sarei eia, a ti ipamlen v'anuak. V'anu lera ihuet, akaspanr m'ertu nen. Lun avnep'a sera lu laiun, aau, lun avlil kavnep'a sarar lu laiun, la nln ireret ha.

⁷ Itsran sera nahuak, itstu sarei. Itutakm sarei a p'alakak. Itlev'la sera raun, katsran sarei. Laha, ranan atvtva sarei.

⁸ Patakal kanep'a sera uarav'aran ittu sera selpak arna p'akn, la itakal sanan a naun itlev' sarei naran iv'i vitar ha.

⁹ Attrla sarar uvrin iv'i uit m'er uvrin iv'i nauei, si lera ihei ml al nmah tamatan a Mlin Eia. Arpris, la avan parian a Mlin Eia ha, avvalau kavrn istu.

¹⁰ Arpitvet atvstu sarei. Nadep' ivalau, sena ti uit itstu sarei, sena ti naui m'iel m'dah itm'am'a sarei, sena ti ueil ihei ml.

¹¹ Arm'ertu avm'akar al pitvet, pavmamih. Arm'ertu avm'akar m'a nahau na krep, pavtakal. Pavtakal sena uit m'a pali, sena ti sei apalav'i al pitvet itstu sarei, ihei ml.

¹² Nahau na krep itm'am'a sarei. Raun ihei arna p'alak. Laha, inap'i lera m'a paplimus, m'a m'tu, m'a apul--nai udlani, ra avrasi al pitvet ha, atvm'am'a sarei. Nvrdaui, arm'ertu na nadep' ka ahavrn ip'as ml, inep'a ti atvm'am'a sarei.

Aparn istu sena nadep'

¹³ Kam'i arpris, pavv'u sitravam'i kavrn istu. Kam'i la kvm'akar asn tiv' na sakrivais, pavtakal. Kam'i, la kvm'akaran Atuak ha, pavrama kavtu selpak arna p'akm'i kavm'atr lihat ipanap'i lera. Sena ti m'ertu akavuirv'ar uvrin iv'i uit m'er uvrin iv'i nauei kavrav'a al nmah tamatan Atuam'i.

¹⁴ Pavtaui ti m'ertu imahan sei. Pavv'ara anr m'ertu, a ti apavrama kavp'lt arna nahn Atua. Pavlav'r m'ertarep' m'er arm'ertu avlak arna v'anu, apavrama asn nmah tamatan a Mlin Eia, iv'i Atuam'i. Aau, apavrama kavv'ara an a Mlin Eia.

¹⁵ !Usa sena napn nvruri! Sena ti napnan a Mlin Eia itv'i ti ipama ra. Ipama, kav'i napn na ti a Mlin Eia, la ihua ihuadau ha, iputakm a sei ipastudau.

¹⁶ ?Kaavrndu ti attrla sera tim'ah, laha, akalei ml? ?Kaavrndu ti attrla sera si p'sp'as arna nmah tamatan Atuad, a ti akarn ipap'as ml?

¹⁷ M'et na si sei itm'am'a sarei al neiev' hua. Nmah, la atuda tim'ah a nln ha, atvstu sarei. Nmah lilil sena tim'ah atvrars sarei a nadep'. Inap'i lera, sena ti uit itstu sarei.

¹⁸ Laha, si slm avvalau. Arpluk avunanut stu, sena ti nina ihei a ti apavhani. Aau, arsivsiv avlak uaki, inep'a ti atrp sarar.

¹⁹ U Mlin Eia, nv'ara anh hilaha. Sena ti nap' itlev'la sera nina arna m'lden, aau, nap' itier sarar nai udlani al lili.

²⁰ Laha, si slm arna m'lden avv'ara anh, sena ti naui udlani atvm'am'a sarei, nap' itlev'la sera nina arna m'lden.