Sim'is 1 - V'nen P'as iv'i Turanien Trtarep' m'a Turanien M'dah

A Sim'is ivr ip'as anr nl nam'el inal lman iru a Isrel

¹ Kana nv'i a Sim'is, kav'i m'ertu na m'akarienan Atua, m'ei a Mlin Lilad a Iesu Kristu. Nulul a ruplet laha ipav'alet asnm'i, kvv'i nl nam'el inal lman iru a Isrel, kavlak unanut arna nadep' ka. Kana nvr ip'as a kam'i.

V'ahien p'as arna naran na der

² Tv'alk udlani, naran der kinkin ipaier kam'i, pavv'ah ti iv'i sei pavrn ipap'as sanan uaki.

³ Sena ti kvrndu ti naran apandina kam'i, iani ti kam'i pavp'tir ipahua arna v'ahien p'asam'i.

⁴ V'eti kam'i pavp'tir ipahua dav'a dav'a ti der, la iendina kam'i ha, ipani ti pavp'as udlani, kavlini a si p'sp'as udlani kvrni.

⁵ V'eti ipavr ti kam'i kinkin iarndu sei, ip'as a ti ipamiman an Atua, la ituvn a sei anr m'ertu udlani ha, iav'ana hua. Laha, ipatu si lera ani.

⁶ V'eti naran ipamimani, ipav'ahi pr, imahrs arna v'ahienan nakl. Sena ti m'ertu irs arna v'ahienan, hin inep'a nalen na nata, la isapa navanel nalen itvi unanut ha.

⁷ M'ertu lera imav'ah ti ipalev' si kinkin asn a Mlin Lilad.

⁸ Dui v'ahienan iru ikap'tir mamh arna navanel kinkin.

Tv'ald ialil m'a tv'ald sian istudau apavrn ipap'as a sei Atua iani anr

⁹ Tv'ald kinkin, la ialil ha, iparn ipap'as, sena ti Atua iani ti ima eia.

¹⁰ V'eti tv'ald, la sian istudau ha, iparn ipap'as naran Atua iani ti v'ahienan iv'a a nadep', sena ti hin ipam'a ipanep'a sera plaua na nina.

¹¹ Sena ti naran neiel itvei aranan, dav'a nut ivuv istudau, laha nina lera im'aran, plaua nen irs, si p'sp'asan udlani ihiris. Dui sian istudau ipanap'i lera. Ipam'a arna p't nut na navanelan.

P'kl Kristin naran sei iendinei

¹² Dui ip'tir naran sei iendinei, iparn ipap'as, sena ti naran itendina sarei, hin ipalev' manu na silv'ien, la a Mlin Lilad itturan sarei anr m'ertu avlap'as ani ha.

¹³ Ipavr ti m'ertu kinkin nln iendinei a ti ipan si stu, imavr ti a, “Atua iendina kana”, sena ti si stu iarndu ti ipandinei Atua. Hin ikahandina m'ertu kinkin a ti ipan si stu.

¹⁴ V'eti nlr m'ertu udlani iendinar uaki karv'r a ti apavan si stu.

¹⁵ Laha, naran nl stuar itkar sarei, dav'a ipalev' a natn, iv'i si stu. Dav'a, naran si stu itlil sarei, itu navan iv'i m'ien.

¹⁶ Tv'alk nlap'as a kam'i istudau, mavv'ah v'nenar m'ertu avhap'il m'a kam'i.

¹⁷ Si p'sp'as udlani m'a si p'as udlani nviak ani idan eia. Idan asn a Tatei, iv'i Mlin na nut ren udlani. Hin ikavav p'kln naran kinkin, ianep'a m'lk neiel la ivav hin nakl ha.

¹⁸ Sena ti Hin irni, ilev' nakd arna v'nen viviln, a ti p'vv'i a natn, inep'a ti nvv'i nava nki itauamu arna si udlani iani.

Nld imahrer ipalahml

¹⁹ Sena si lera, tv'alk nlap'as a kam'i istudau, ip'as a ti m'ertu udlani apavv'rn a sei ipalahml, kavvr sei ikalahml. Nlr imahrer ipalahml.

²⁰ Sena ti m'ertu ahavrndu ti apavan pari p'asan Atua arna nl rer.

Mavrn v'nen hua uaki v'eti pavan pari nen

²¹ Sena si lera, kam'i pavsran si stu udlani m'a p'kl stu irndu ti ipama aut nakl, kavlev' v'nen Atua ittu sarei a nlm'i, arna p'kl v'len. V'nen lera irndu ti ipalev'la kam'i.

²² V'eti kam'i mkvv'i m'ertu mkvsapa v'nenan Atua pr, mkavv'i m'ertu mkvv'rn ani uaki, kavhap'il m'a kam'i.

²³ Sena ti ipavr ti m'ertu kinkin iv'rn a v'nenan Atua uaki, v'eti iahani, hin inep'a sera dui iamk ip'a m'lk nahn al klas.

²⁴ Sena ti ip'a nahn, kav'el. V'eti ilahml sarei ivnapn a nut nahn inap'ei.

²⁵ V'eti m'ertu ip'a v'nen hua p'asa m'ertu dau, kasapei nakl, kav'i m'ertu iv'rn a sei iavnapn ani, v'eti ien pari nen, m'ertu lera Atua ipamhmah ani arna parian.

²⁶ Ipavr ti kam'i kinkin iv'i m'ertu avrla ti iv'ah Atua, v'eti iap'aur nm'n, m'ertu lera ihap'il m'a nln. V'ahien p'asan iv'i si vn uaki.

²⁷ V'ahien p'as, la ip'as kaviviln arna nahn Atua iv'i a Tatei ha, iv'i ti pavrav'a asnr mardel la a tetian ihei ha, m'er tvtanu, kavmhmah anr arna der iarr. P'kl na nadep' ka mkavsapei nakl.