Rut 1 - V'nen P'as iv'i Turanien Trtarep' m'a Turanien M'dah

A Rut m'ei a Naumi

¹ Laha, arna naran armlin avv'ana hua avsilv', m'em'erien iak arna v'anu. Laha, dui iamk a P'etliem arna nut a Suta iv'a kalak arna v'anu a Muap, hin m'ei a naun, m'er a natn dui arru.

² Naha dui lera iv'i a Elimelek. Nahan a naun iv'i a Naumi. Nahar a natn dui arru arv'i a Malun m'ei a Kiliun. Hir avv'i m'ertu a Evrata arna nut a P'etliem arna nut a Suta. Laha, avrav'a arna nut a Muap, kavlak atlera.

³ Sarei, a Elimelek, iv'i a naun a Naumi, im'a. Laha, im'a kaln a Naumi m'er a natn dui arru.

⁴ Hir arlev' tav'etar asnr tav'et a Muap. Naha tv'aln iv'i a Urpa, tv'aln iv'i a Rut. Avlak atlera dav'a ihih pai inal.

⁵ Sarei, a Malun m'ei a Kiliun arm'a ml. Sarei, tav'et lera ilak mamk uaki. A natn dui arru m'ei a naun ihei ml.

⁶ Laha, iv'el m'er a v'lian arru, a ti ipahum'alet dan a v'anu a Muap. Sena ti irn v'nen naran idlak uam a Muap a ti a Mlin Eia itmhmah sarei a m'ertuan katu tim'ah anr.

⁷ Sena si lera, iv'el kaln nut ilak, a ti ipam'alet ml arna nut a Suta. Laha, a v'lian arru arsapei.

⁸ Laha, a Naumi ivr anr a v'lian arru, kavr ti a, “Parhau, karm'alet a utar a uniam'i p'sev'. Nrn ti a Mlin Eia ipamhmah a kam'i, inep'a nut krmhmah a kana m'er ardu la atvram'a sarei ha inap'ei.

⁹ Nrn ti a Mlin Eia ipan tamat asnm'i, a ti parlak p'as a utar a naum'i.” Laha, avrvrev' hir kavkis, kavtakal.

¹⁰ Sarei, arvr ani, karvr ti a, “Nrvrdaui, kam'em' p'ersapah kavrahau a utar m'ertuam.”

¹¹ V'eti a Naumi ivr ti a, “V'lei, parm'alet. ?Parsapa kana sena v'ata? ?Kana p'elev' a natk dui ml a ti aparv'i a naum'i?

¹² Parhum'alet ml, v'liak. Sena ti kana ntrtarep' dau, nkahtr asn dui ml. ?Ipavr ti p'ev'ah ti p'elak asn dui ipamk dika, kalev' a natk dui,

¹³ kam'i parlaksrah kana a ti a natk dui apariak dav'a karlil? ?Kam'i paruada kam'i a ti a naum'i ikahei ipap'arei? Natk tav'et, ikahei. Nrn istu istudau sanam'i, sena ti a Mlin Eia ittu der aranak kamlen kana.”

¹⁴ Sarei, avtakal ml. Laha, a Urpa irev' a rinan karkis m'ei, v'eti a Rut iuadei.

¹⁵ Laha, ivr ti a, “Palei, a thiam itm'alet sarei a utan asnr duanan, m'ei atuan. Pam'alet kasapei a thiam.”

¹⁶ V'eti a Rut ivr ti a, “Matp' kana a ti p'elnh, imahei ti nkasapah ml. Sena ti nut nakm pav'a, kana p'av'a. Nut nakm palak, kana p'elak. Arm'ertuam apavv'i arm'ertuak. Atuam ipav'i Atuak.

¹⁷ Nut pam'a, kana p'am'a. Arna nut lera apatin kana. Nrn ti a Mlin Eia iputakm a kana, kan si uraur aranan ml, ipavr ti si kinkin ipatupr nakd, v'eti m'ien uaki ipatupr nakd.”

¹⁸ Naran ila ti hin ihua arna v'ahienan a ti ipasapei, iav'ana ml m'ei.

¹⁹ Sarei, arru karv'el dav'a karier a P'etliem. Ariar a P'etliem, laha m'ertu udlani arna v'anu lil avtah anr istudau. Laha, artav'et avvr ti a, “?A Naumi hilaha?”

²⁰ V'eti ivr anr kavr ti a, “Mavvr Naumi (Si p'as) a kana, pavr Mara (Si haau) a kana, sena ti Atua na Nut Hua Udlani iani ti nrn istu arna silv'ienak.

²¹ Naran nruh atlaha silv'ienak ilini a si p'sp'as, v'eti a Mlin Eia iani ti nm'alet ml a utak, sei iani ti silv'ienak ipap'as ihei ml. ?Kvvr Naumi a kana sena v'ata, sena ti Atua Na Nut Hua Udlani ienp'ilen kana, kani ti der ier kana istudau?”

²² Laha, a Naumi im'alet ml m'ei a Rut, iv'i a v'lian kav'i tav'et a Muap. Arru arandan a Muap, karv'a a nut a P'etliem, naran arm'ertu avnerdida uit.