Rum 1 - V'nen P'as iv'i Turanien Trtarep' m'a Turanien M'dah

A Pul ivr ip'as anr nelnal

¹ Kana nv'i a Pul kav'i m'ertu na m'akarienan a Iesu Kristu. Atua itv'ara sarei a kana a ti p'ev'i apusel kattu sera kana a ti p'evrp'ep'a v'nen p'asan Atua.

² Tituei Atua ituran a v'nen lera kavr anr dui na v'nenan arna Paivul p'asan.

³ Kavrur a Natn iv'i a Iesu Kristu kav'i a Mlin Lilad. Arna p'akn hin iak arna nl nam'elan a Divt.

⁴ V'eti Atua itaui a ti iv'i a Natn, katu nut hua ani, kani ti ithal ml arna m'ien arna M'im'iln P'as.

⁵ A Iesu ittu sera vtmienan a kam'em' kani ti nvv'i apuselan, a ti m'ertu arna v'anu udlani apavsapa v'ahien p'as, a ti nahan ipav'a eia.

⁶ A Iesu Kristu iv'ara a kam'i inap'amk m'er.

⁷ Ntep'a ruplet laha iv'alet asnm'i udlani kvlak a Rum, la Atua ilap'as a kam'i ha, kav'ara a kam'i a ti pavv'i m'ertuan. Nrn ti Atua, iv'i a Tetiad, m'ei a Mlin Lilad a Iesu Kristu apartu vtmien m'a tamat a kam'i.

A Pul ivr ti irn ti ipav'alet asnr arna nut a Rum

⁸ Itauamu, nvr ip'as an Atuak aranan a Iesu Kristu sena kam'i udlani, sena ti avrur v'ahien p'asam'i arna nadep' udlani.

⁹ Sena ti Atua, la nm'akaran arna nlk udlani arna v'nen p'asan a Natn ha, hin itrndu sera ti nvrur kam'i iel arna tamatak, narnrn kana naran.

¹⁰ Kamiman ani ti ipamhmah alak a ti p'ama asnm'i hilaha arna navanel kinkin, ipavr ti Atua irni.

¹¹ Sena ti nrn nam'er a ti p'ela kam'i katu sia M'im'iln P'as kinkin a kam'i a ti pavp'tir ipahua.

¹² Kap'lt m'a kam'i karn ip'as m'a kam'i arna v'ahien p'as la kam'i kvp'lt m'a kana aranan ha.

¹³ Tv'alk, narn ti kam'i mkavrndu ti arna napn istudau nrn ti p'ama asnm'i, v'eti si kinkin itukar navanelak nakl ier dika. Nrn ti nava pariak ipaiak asnm'i ml, ipanep'a nut itu hin inap'ei asnr v'anudl uraur.

¹⁴ Kana nkvrp'ep'a v'nen p'as pr anr m'ertu a Kris m'er m'ertu avlak al lili, anr m'ertu avrndu sei m'er m'ertu ahavrndu sei.

¹⁵ Sena si lera, nv'ahuri ihua arna nlk karn ti p'evrp'ep'a v'nen p'as ml asnm'i la kvlak a Rum ha.

M'ertu iviviln arna nahn Atua ipasilv' arna v'ahien p'as

¹⁶ Sena ti kana namamih a v'nen p'asan a Kristu, sena ti iv'i nut huan Atua a ti ipalev'la m'ertu udlani avv'ahi, m'ertu a Isrel itauamu, sarei, m'ertu a Kris.

¹⁷ Sena ti v'nen p'as lera iv'iv'en p'kl vivilnan Atua arna v'ahien p'as kani ti m'ertu ip'tir arna v'ahien p'as, inep'a nut Paivul ivri inap'ei kavr ti a, “M'ertu iviviln arna nahn Atua ipasilv' arna v'ahien p'as.”

Atua nln irer a si udlani iaviviln

¹⁸ Sena ti Atua iv'iv'en nl reran idan eia kadama arna si stu udlani m'a si udlani iaviviln m'ertu avani, kavtukar v'nen viviln a si stuar.

¹⁹ Sena ti si udlani m'ertu apavrndau Atua aranan, itater sarei arna nahr, sena ti Atua itv'iv'en sarei anr.

²⁰ Sena ti si tutuahan Atua naran ien nadep' dav'a ier dika, m'ertu apavledaui arna sei iani. Si lera iv'iv'en ti nut huan ikahiris kav'iv'en ti iv'i Atua dau. Sena si lera akavvr si kinkin ml.

²¹ Sena ti naran avrndau Atua, ahavpatei sena ti iv'i Atua, v'aha ahavvr ip'as ani. V'eti v'ahienar ima kastu inep'a ti ptr ihei ml, v'ahienar ididilin kadama kanep'a m'alk.

²² Avvr ti avrndu sei, v'eti avrama kavdilin uaki.

²³ Avvav si p'sp'asan Atua la ikahiris naran kinkin ha, ima kav'i aitul kinkin avani inep'a m'ertu m'a m'anh m'a si dm m'a sei iharev' arna nadep'.

²⁴ Sena si lera Atua im'ahu anr a ti apavan sei nlr irni uaki kavsapa p'kl stu iv'i mamihien kavutakm a p'akr m'a hir.

²⁵ Hir avvav v'nen duan Atua ima kav'i hap'ilien kavpata sei avani ilil mau kasiv' Atua la ien nadep' ha. Hin apapatei dav'a ikahiris naran. Amen.

²⁶ Sena si lera, Atua im'ahu a ti apavsapa p'kl stu iv'i mamihien. Sena ti tav'etar avvav p'kl Atua itaui kavsapa p'kl Atua iataui.

²⁷ Dui avnap'i lera, kavln p'kl viviln na dui m'a tav'et kavrn nam'er a dui uraur. Dui avan si stu m'a dui, iv'i mamihien. Laha, der iarr iviviln a p'kl stuar.

²⁸ Hir ahavrn ti apavrndau Atua ml arna v'ahienar. Sena si lera Atua im'ahu anr a ti apavsapa v'ahien stuar kavan si stu la iaviviln ha.

²⁹ Hir avlini a p'kl stu, kavan si stu m'a tav'et, kavrn nam'er a ti apavan si stu, kavrn sia tv'alr, kavlep'la m'ertu. Nlr ipr tv'alr iel, avrpep'n m'ertu, kavv'lv'al, kavhap'il, kavtala a navanel a ti apavutakm a m'ertu kavuv'en m'ertu uraur.

³⁰ Kavani ti naha m'ertu uraur ipav'a a nadep', kavlep'lei Atua, kavsip'len m'ertu, kavukl hir, kavrur hir, kavtala a navanel na si stu. Ahavsapa v'nenar a tetiar m'ei a uniar.

³¹ Ahavrndu navanel p'as kinkin, kavkapr turanienar. Ahavlap'as a m'ertu arna nl nam'elar, ptr ihua, ahavrn istu a m'ertu uraur.

³² Hir avrndu ti Atua ittu sera v'nen huan a ti m'ertu la apavan si lera ha, iviviln a ti apavram'a. V'eti avani uam, kavrn ip'as a m'ertu la avani ha.