Nehum 1 - V'nen P'as iv'i Turanien Trtarep' m'a Turanien M'dah

Atua irn istu a m'ertu, karp m'ertu

¹ V'nen laha ivrur si dv ipav'a aranan a Nineva. Iv'i puk ivrur sei hin a Nehum, iv'i m'ertu a Elkus, ilei.

Atua nln irer anr arm'ertu avmlani

² Atua ip'ausus m'ertu. A Mlin Eia itum'alet a sei a m'ertu. A Mlin Eia itum'alet a sei, aau, nln irer nakl. A Mlin Eia ipatum'alet a sei aranar m'ertu avan naur m'ei. Ituda mamh nl reran, a ti iparpr m'ertu avmlani uam.

³ A Mlin Eia iarakn a ti iparp m'ertu arna nl reran, v'eti ihua ihuadau. Ikam'ahu a ti arm'ertu na si stu apavruh asn v'nen huan. A Mlin Eia ien sei Hin prki irn ti ipani, ipavr ti iv'i nalen lil v'aha nu lil, p'knaran avnep'a sera ieneiev' arna tln uaki.

⁴ Iv'ana hua m'a nata kani ti im'am'a. Iani ti nauei udlani avm'am'a, nauei iararev' ml. Nut a Pesan m'ei a Karmel arma karm'am'a. Sarei, plaua na nut a Lepanun ima kastu.

⁵ Ptha lilil avvrdedrn arna nahn. Mrnut avrama kavnep'a sera nauei asnn. Nadep' ka idudul eia naran ip'tir asnn. Aau, nadep' ka m'er arm'ertu udlani avlak aranan avrama kavnep'a sera nauei.

⁶ ?Hin ak irndu ti ipap'tir arna nahn naran nln ireret? ?Hin ak irndu ti ipalak a nv' nl reran, la ililet ha? Itp'sran nl reran inep'a sera nap'. Ilev'lar nav'et lilil kasranr a nadep'.

⁷ Atua ip'as, iv'i nut hua arna napn na der lil. Hin irndaur m'ertu la avv'ahi ha.

⁸ V'eti Hin ipalev'la nut ipamk, akalei ml, ipanep'a sera uiniv' itavkar si udlani. Laha, m'alk ipatkr anr arm'ertu avmlani.

⁹ ?Kvvrvr a kam'i a ti pavmlen a Mlin Eia sena v'ata? Hin ipahiris ani pr, ikav'i sei ml. Der lil ikap'tir ipav'aru.

¹⁰ Sena ti naran apavdedhar kavnep'a sera lu makau, aau, naran apavm'nm'n kavnep'a sarar m'ertu na m'nm'nien, ipalev'lar, apavnep'a sera nina m'lih, la itm'am'a sarei ha.

¹¹ M'ertu iamk idan asnm, iv'i m'ertu iak a v'ahien iamk, a ti ipamlen a Mlin Eia. M'ertu lera iv'iv'en sei anr m'ertu uraur nakl, v'eti iv'i m'ertu stu iamk.

¹² A Mlin Eia iv'ana inap'i laha, kavr ti a, “Avlak p'as kavstudau, v'eti ipatrlar ipanap'i laha naran iv'el kasiv' nut. Ntrp sarah, v'eti nkarph ml.

¹³ Sena ti hilaha p'eprus triuauahanan, ikahter aranam ml. P'erdus nahau iuadah.”

¹⁴ A Mlin Eia ittu sera v'nen hua iamk, iarh. Laha, ivr ti a, “Akavrp'ep'a naham ml. P'etrusus aitul iv'i nai, m'a aitul ani a aian vuv, kalev'lar al nmahar atuam. Sarei, p'ehl tah a ti apatinh a nln, sena ti kv'i si stuet iamk.”

¹⁵ Palei, m'ertu la iv'el arna ptha lilil ha, kauirma v'nen p'as, kavrp'ep'a ti tamat ipama. U Suta, pasapa tim'ah lilil attu sarei. Pan sei ktturan sarei. Sena ti m'ertu stu ikav'el kasiv' nadep'am ml, sena ti ntrla sarei, akalei ml.