Malakai 1 - V'nen P'as iv'i Turanien Trtarep' m'a Turanien M'dah

Arm'ertu a Isrel avtu sakrivais stu an Atua

¹ V'nen laha iv'i si dv idan asn a Mlin Eia, a Malakai ivrp'ep'ei.

Atua ilap'as an a Isrel

² A Mlin Eia iv'ana, kavr ti a, “Kana vtmienak itiak sarei asnm'i. V'eti kam'i kvvr ti a, ‘?Vtmienam itiak sarei asnm'em' inap'i?’ ” A Mlin Eia ivr ti a, “?A Isau iv'i tv'aln a Sikup, v'aha ihei? Vtmienak itiak sarei asn a Sikup,

³ v'eti ntlep'la sarei a Isau. Ntrp sera ptha lililan m'a nadep'an, dav'a itstu sarei katv'i nadep'ar lip'ah didi na nut kaka.”

⁴ Aau, a Itum itv'ana sarei, kavr ti a, “Atlev'la sera ultinam'em' udlani, v'eti kam'em' p'vm'alet ml kavhlur nut m'ertu ihei.” V'eti a Mlin na m'rnur iv'ana, kavr ti a, “Apavhl sei, v'eti Kana p'ekasri a nadep'. Apavr ti utar ipav'i V'anu na Si Stu. A Mlin Eia nln iparer anr m'ertu lera, ikahiris naran.

⁵ M'etam'i apavlei, sarei pavvr ti a, ‘Nahan a Mlin Eia itama sarei kalil, itsiv'r dari na v'anu a Isrel.’

Uvrin stu

⁶ Dui iani ti nahan a tetian iv'a eia nakl. Aau, m'ertu na m'akarien iani inap'i lera m'a mlinan. ?Ipavr ti Kana nv'i a Tatei, sena v'ata kaavani ti nahak iv'a eia nakl? ?Ipavr ti Kana nv'i Mlin, sena v'ata kaavpata Kana nakl? A Mlin na m'rnur ivr si lera anr pris, la avlep'la nahak ha. V'eti kam'i kvvr ti a, ‘?Ntvlep'la sera naham inap'i?’

⁷ Kam'i kvtu uvrin, la iaviviln arna nahk ha, arna tiv' na sakrivais, v'eti kvvr ti a, ‘?Ntvan sera sei iaviviln inap'i?’ Kvani, inep'a ti kvvr ti a, ‘Tiv'an a Mlin Eia iav'i sei ki.’

⁸ ?Naran kvtu sakrivais iv'i m'etapis, kaavrndu ti iv'i si stu? ?Naran kvtu sakrivais iv'i si slm tln istu, v'aha im'at, kaavrndu ti iv'i si stu? !Pavtaui a kavmanam'i! ?Hin iparn ipap'as a kam'i, v'aha ipanap'i? ?Hin iparn ipap'as a ti ipav'ana m'a kam'i, v'aha ikahei?” A Mlin na m'rnur ivr si lera.

⁹ Sarei, a Mlin na m'rnur iv'ana, kavr ti a, “V'eti hilaha pavmiman sei an Atua, a ti iparn istu a kam'em'. ?V'eti naran kvan si lera nakl m'a lm'am'i, kvv'ah ti iparn ipap'as a ti ipav'ana m'a kam'i?”

¹⁰ A Mlin na m'rnur iv'ana, kavr ti a, “?Hin ak asnm'i ipap'leskar liu, a ti nap' ipaiak arna tiv' na sakrivaisak, v'eti ipav'en vn uaki? Kana nalap'as a kam'i ki. Nkalev' uvrin ipadan al lm'am'i.

¹¹ Sena ti, ipatudina hin naran neiel itpeia dav'a ti naran ipatpl, nahak ipalil asnr v'anudl. Apaval sida p'as arna nahak arna nut udlani. Apavtu uvrin p'as a Kana. Sena ti nahak ipalil asnr v'anudl.” A Mlin na m'rnur iv'ana, kavr si lera.

¹² Sarei, a Mlin na m'rnur iv'ana, kavr ti a, “V'eti, kam'i kvsip'len nahak, sena ti kvvr ti a, ‘Tiv' na sakrivais itstu uaki. Sarei, navan m'a tim'ahan iv'i sei apasip'lani uaki.’

¹³ Sarei ml, kvvr ti a, ‘!U, nvrn np'm'em' sanan!’ Kvsip'lani nakl. !Kvuirv'a sei ktvv'nah sarei, m'a sei tln istu, m'a sei im'at, a ti pavtaui ipav'i uvrin! ?Kvv'ah ti p'elev' si lera nakl al lm'am'i?” A Mlin Eia ivr si lera.

¹⁴ Sarei, a Mlin na m'rnur iv'ana, kavr ti a, “V'eti m'ertu na hap'ilien, la iak a pua na sivsiv iamk, kan turanien ha, v'eti itu sakrivais, la itstu sarei ha, an a Mlin Eia--hin ipalak a nv' nl reran Atua. Sena ti Kana nv'i Mlin Lil iamk. Arm'ertu na v'anu ururaur nakl apavdedrn a nahak.”