Mak 1 - V'nen P'as iv'i Turanien Trtarep' m'a Turanien M'dah

A Sun Paptais iendedp' alan a Iesu

¹ V'nen p'asan a Iesu Kristu, a Natn Atua, itudina hin inap'i laha.

² Itudina hin inep'a nut pruvet atvulul sarei ani inap'ei, kavvr ti a, “Parni, Kana p'etep'a dui ki ipamk ipav'i v'nenak katauamu anh a ti ipandedp' alam.

³ Dui iamk iv'ana eia arna nut kaka kavr ti a, ‘Kam'i pavandedp' a navanelan a Mlin Lil kavan alan ipaviviln mamh.’ ”

⁴ A Sun ien paptais arna nut kaka kavrp'ep'a v'nen p'as kavr ti a, “Pavvav nlm'i sena si stuam'i kavpaptais a ti Atua ipalev'la si stuam'i.”

⁵ Laha, m'ertu udlani a Sutia m'a Serusalem avrav'a asnn kavvrp'ep'a si stuar, laha a Sun ien paptais anr al nauei a Surtan.

⁶ Hin a Sun lera, heian iv'i nil kam'el, kav'u sitrav aani arna nila p'ak pluk. Suadan iv'i tapat m'a ns sukapak iter al lili nakl.

⁷ Hin ivrp'ep'a v'nen kavr ti a, “Ipatauatah a Kana, Dui iamk ipama, nut huan isiv' Kana. Kana nalil a ti p'esisihpu asnn kahsla susan.

⁸ Kana nen paptais a kam'i a nauei, v'eti Hin ipan paptais a kam'i a M'im'iln P'as.”

A Sun ien paptais an a Iesu

⁹ Arna naran lera, a Iesu iaan a Nasaret arna nut a Kalili. Laha, a Sun ien paptais ani al nauei a Surtan.

¹⁰ Laha, naran ima aut dan al nauei, iv'amk m'a ti ila ti nut eia iela hin, laha, M'im'iln P'as ima a nadep' aranan kanep'a sera navimar.

¹¹ Laha, nadl iamk iendan eia kadama a nadep' kavr ti a, “Nakm kv'i a Natk p'as. Nlap'as anh karn ip'as anh istudau.”

A Sitan iendinei a Iesu

¹² Iv'amk m'a ti M'im'iln P'as iani iv'a arna nut kaka.

¹³ Dav'a Hin ilak arna nut kaka napn inelv'a (40) asn si dm, laha a Sitan ihlhalei, v'eti ensel avlak asnn kavp'auri.

A Iesu ivrp'ep'adina v'nen p'as arna nut a Kalili

¹⁴ Itauatah a ti avtau a Sun al p'resin, a Iesu iv'a a Kalili kavrp'ep'a v'nen p'as ivrur v'anuan Atua,

¹⁵ kavr ti a, “Napn nen itama sarei. V'anuan Atua itmima sarei. Pavvav nlm'i kavv'ah v'nen p'as.”

A Iesu iv'ara anr dui arv'a avlev' tilau al nit nakl

¹⁶ Dav'a, a Iesu iv'el kasapa p'ak naui lil a Kalili kalei a Saimun m'a tv'aln, nahan iv'i Adru. Hir arsran nit al nauei, sena ti arv'i dui arlev' tilau al nit nakl.

¹⁷ Laha, a Iesu ivr anr kavr ti a, “Parsapa Kana. Kana p'ani ti parv'i dui na ti parlev' m'ertu.”

¹⁸ Laha, iv'amk m'a ti arln nitar karsapei.

¹⁹ Sarei, Hin iv'el isusupa kalei a Sim'is, iv'i a natn a Sep'eti, m'a tv'aln, nahan iv'i a Sun. Hir ml arlak al nauak karmhmah a nitar.

²⁰ Iv'amk m'a ti a Iesu iv'ara anr, arln a tetiar iv'i a Sep'eti m'a m'ertu na parei al nauak, karv'el karsapei a Iesu.

A Iesu isran m'im'iln stu iamk

²¹ Laha, kavv'el kavrav'a a Kapaniam. Naran Sapat ima Hin iv'a al nmah tamat kavrp'ep'a v'nen p'as.

²² Nelnal avtah ihuadau a sei ivri, sena ti naran iv'iv'en v'nen p'as anr, nut huan iak, Hin iuraur aranar tisa na v'nen hua.

²³ Al nmah tamat lera dui iamk ilak, m'im'iln stu ilak a nln. Hin iv'ara eia kavr ti a,

²⁴ “Paln kam'em', Iesu a Nasaret. ?Kma a ti pan v'ata a kam'em'? Kma a ti putakm a kam'em'? Kana nrndauh. Kv'i Dui P'asan Atua lahara.”

²⁵ V'eti a Iesu iv'ana hua m'ei kavr ti a, “Pap'nh. Paruh a nln aulera.”

²⁶ Iv'amk m'a ti m'im'iln stu lahara iani ti im'em'a, laha, hin iv'ara eia a nadl lil karuh a nln.

²⁷ Laha, nelnal avtah ani ihuadau kavmimiman a hir kavvr ti a, “?V'ata hin lera? ?Iv'i v'nen uraur v'ata? Sena ti iv'ana arna nut huan, laha m'im'iln stu avrn v'nenan kavruh.”

²⁸ Ilahml sarei, avvrur a Iesu istudau arna v'anu udlani arna nut a Kalili.

A Iesu ien mamh a rinan a P'ita

²⁹ Laha, avrama av'aran al nmah tamat kavrav'a a utan a Saimun m'ei Adru, hir a Sim'is m'ei a Sun arsapar.

³⁰ V'eti a rinan a Saimun im'at kam'atr arna pasan, laha avvruri asn a Iesu ilahml.

³¹ Laha, a Iesu ima kauada lm'a tav'et lera kani ti ip'tir, iv'amk m'a ti m'etien lera ihiris, hin iv'a kap'aurr.

A Iesu ien mamh nelnal

³² Knarev' lera, naran neiel ittpl sarei, nelnal avuirma tv'alr kinkin, nki avm'at, nki m'im'iln stu ilak a nlr kauadar ihua.

³³ Nelnal udlani arna v'anu lera avrama kavp'lt asn karliu na nmah.

³⁴ A Iesu iani ti nelnal kinkin, m'etien ururaur iuar, avrama kavp'as ml, kasran m'im'iln stu avstudau. M'im'iln stu lahara avledaui, v'eti Hin iam'ahu a ti apavvr si kinkin.

A Iesu ivrp'ep'a v'nen p'as arna nut a Kalili

³⁵ Arna m'etav'aran nrnren, naran nut idahren dau, ithal kadama av'aran kadav'a arna nut iamk m'ertu ihei, katu tamat atlera.

³⁶ V'eti a Saimun, hir m'er m'ertu avlak asnn avv'el kavtala ani dav'a,

³⁷ Kavlei kavvr ani kavvr ti a, “M'ertu udlani avtala anh.”

³⁸ V'eti a Iesu ivr anr kavr ti a, “P'vrav'a arna v'anu ururaur, sena ti nrn ti p'evrp'ep'a v'nen p'as atlera, sena ti Kana ndan eia kadama a nadep' sanan.”

³⁹ Dav'a Hin ivrp'ep'a v'nen p'as al nmah tamatar arna v'anu udlani arna nut a Kalili kani ti m'im'iln stu avruh.

A Iesu ien mamh dui iamk lep'ersi iuei

⁴⁰ Dav'a dui iamk lep'ersi iuei, ima kasisihpu asnn kavr ani ihua kavr ti a, “Ipavr ti krni, nakm krndu ti pani ti Kana p'ep'as ml.”

⁴¹ Ivri laha, a Iesu irn istu ani kah lm'an kaier p'akn kavr ani, kavr ti a, “Kana nrni. Pap'as ml hilaha.”

⁴² Iv'amk m'a ti ivri, m'etien stu lahara ilni, hin ima kap'as ml.

⁴³ V'eti a ivr ani ihua katap'ei iruh ilahml,

⁴⁴ kavr ani, kavr ti a, “Pav'ahah ti mavrp'ep'a si kinkin asn m'ertu kinkin v'eti pav'el kadav'a kav'iv'en p'akm asn pris, katu sei v'nen huan a Musis itaui, sena ti m'etienam lera ithiris, kav'iv'en anr a ti ktp'as ml.”

⁴⁵ V'eti aulera iv'el kavrur si lera istudau, kavrpapr v'nen udlani iunanut, kani ti a Iesu iarndu ti ipav'a kav'iv'en Hin asn nelnal arna v'anu lil, v'eti ilak nakl arna nut kaka. Dav'a nelnal avaan arna nut udlani kavrav'a asnn.