Maika 1 - V'nen P'as iv'i Turanien Trtarep' m'a Turanien M'dah

A Mlin Eia ipav'ana hua m'ei a Isrel, kav'ana hua m'ei a Suta

¹ V'nen laha iv'i v'nenan a Mlin Eia, ima asn a Maika, la iv'i dui a Mureset ha. V'nen ima asnn arna naran a Sutam, Ahas, m'ei a Esekaia, avv'i mlin a Suta. V'nen ilei ivrurr a Sameria m'ei a Serusalem.

V'nen ipaier a Isrel

² !Kam'i arm'ertu udlani, pavrn v'nen laha! !U nadep' ka, m'a si udlani iter aranan, pav'rn! A Mlin Atua ipav'i Hin la ipavrp'ep'a sei kamlen kam'i ha, aau, a Mlin Eia ipav'ana dan al nmah tamat p'asan.

³ Sena ti, palei, a Mlin Eia iv'el dan arna nut ilak nakl. Ipama auei kapasr nut eia nakl arna nadep' ka.

⁴ Ptha lilil apavrama kavv'i nauei a nv' a Mlin Eia. M'ihual apavtupr hir inep'a sera nut kandel irarev' inap'ei naran nap' iari. Apavnep'a sera nauei naran irarev' dan arna ptha lil iamk.

⁵ Si udlani laha iv'a sena ti a Sikup iluvn a v'nen huan Atua, kav'i sena si stua nl nam'el a Isrel. ?A Sikup iluvn a v'nen huan Atua inap'i? ?Kavrndu ti iv'i sei iani a Sameria? ?Nut eia a Suta avrater ip'i? ?Kavrndu ti avrater a Serusalem?

⁶ Laha, Atua iv'ana, kavr ti a, “Sena si lera, p'ekakapr v'anu lil a Sameria kani ti ipav'i m'ev' lil ipamk arna m'lden. Ipav'i nut apalu nahau na krep aranan uaki. P'etp'sranr nav'et na nut lera al m'ihual, kalev'la sei dav'a ti apalar nakalamu na nmah uaki.

⁷ P'ekakaprr aitular (la atri ha). Sarei, sei ilav'i sena pari na tav'et na navanel, p'etu nap' ani, ipahapu. Kana p'ani ti itulan udlani apavrars a nadep' kavrater vn. Sena ti ilev' sei m'a uliena tav'et na navanel, apatum'alet a sei, ipav'i uliena tav'et na navanel ml.”

A Maika ipatakal sanar arm'ertu a Isrel m'ei a Suta

⁸ Sena si lera, p'etakal eia kavalau eia. P'elev'la klusak, aau, p'emalmal. P'evalau eia kanep'a sera lip'ah didi. P'ern istu kavalau inep'a sera m'anh avr ti iv'i ustrits.

⁹ Sena ti attr sera p'akn, itstu sarei, akamhmah ani ml. Sena ti itama sarei a Suta. Itama sarei asn pn liu na v'anu, asnr m'ertuak--aau, itama sarei a Serusalem.

¹⁰ Mavrp'ep'ei arna nut a Kat, mavvalau ki. Pavm'atr al neiev' arna nut a Pet Avra.

¹¹ Arm'ertu avlak a Savir, pavv'el kavsiv' nut, v'eti pavmamih sena ti kvmalmal. M'ertu ilak a Sanan iahma av'aran. Nut a Pet Esel itakal. Nut a ti ipap'tir ihei ml, mkalev'lei ml.

¹² Sena ti m'ertu ilak a Marut ilaksrah si p'as, v'eti der lil ima kaier pn liu a Serusalem, ima dan asn a Mlin Eia.

¹³ U m'ertu klak a Lakis, pahuda mamh kat na naur, a ti arhus, la avrndu ti apavvrvr ipalahml ha, apavrv'i. Sena ti nut lera iv'i nut a natn tav'et a Isrel iendinei ti ipan si stu, aau, sena ti atpasla sarar si stuan a Isrel arna nut lera.

¹⁴ Sena si lera, patu sei anr m'ertu a Mureset Kat. Laha, arm'ertu na nl nam'elan Aksip apavhap'il m'er mlin a Isrel.

¹⁵ V'eti nakm, la klak a Maresa ha, a natm, la ipalev' nadep'am ha, ipaiak uam. Laha, si p'sp'asan a Mlin a Isrel ipama arna nut Atalam.

¹⁶ Patrla nilm udlani, pama kav'i nama, sanar a natm, la klap'as anr istudau ha. Aau, pani ti pav'i nama inep'a sera m'anh lil avr ti iv'i np'el, sena ti apavruh asnm kavp'resin arna v'anu uraur.