Isrel 1 - V'nen P'as iv'i Turanien Trtarep' m'a Turanien M'dah

Atua iv'ana m'a nakd itauatah dau aranan a Natn

¹ Tituei, Atua iv'ana m'er a pupuad arna naran kinkin arna navanel ururaur arna drlr pruvet.

² V'eti hilaha, arna napn itauatah dau, Atua iv'ana m'a nakd aranan a Natn la itaui ti si udlani ipav'i nkan ha. Hin ien nadep' udlani arna nut huan a Natn.

³ Hin a Natn ier arna si p'sp'asan Atua, kav'i m'lk duan Atua, kauada si udlani arna nut hua na v'nenan. Naran itlev'la sera si stuad, Hin ilak arna m'ldaun Atua Lil ilak eia.

⁴ Hin ilil mau kasiv' ensel udlani. Atua itaui ti nahan ipav'a eia kasiv'r udlani.

A Natn Atua ilil mau kasiv' ensel udlani

⁵ ?Sena ti Atua ivri v'aran an ensel kinkin, kavr ti a, “Nakm kv'i a Natk, dika kiak asnk?” Kavri ml, kavr ti a, “Kana p'ev'i a Tetian, Hin ipav'i a Natk?”

⁶ Kavri ml, naran itau a Natn titiamu a ti ipama arna nadep' ka, kavr ti a, “Enselan Atua udlani apavpatei pr”.

⁷ V'eti naran ivrur ensel, ivr ti a, “Hin iani ti enselan avrama kavnep'a sera nalen, kani ti m'ertu na m'akarienan avrama kavnep'a sera nap' iluluv'en”.

⁸ V'eti naran ivrur a Natn, ivr ti a, “U Atua, Nakm palak arna napl p'asan a Mlin Lil dav'a dav'a ikahiris naran. Arna v'anuam kv'iv'en nut huam arna p'kl viviln.

⁹ Klap'as a p'kl viviln nakl kalep'la si stu. Sena si lera, Atua la iv'i Atuam ha, itu ueil aranam, iv'i ueil na ti parn ipap'as ipastudau kav'iv'en ti klil mau kasiv' tv'alm”.

¹⁰ Kavri ml, kavr ti a, “Nakm, Mlin Lil, ktu pla nadep' naran na ap'u, kan p'knaran udlani a lm'am.

¹¹ Si lera udlani ipamln, v'eti Nakm palak uam. Si lera udlani ipama katrtarep' inep'a nut heia m'ertu ima kav'i mnaun inap'ei.

¹² Nakm pahp' si udlani lera ipanep'a nut m'ertu ihp' heian inap'ei, kavavi ipanap'i lera. V'eti Nakm knap'amk nakl, napnam ikahiris naran kinkin”.

¹³ ?V'eti Atua ivri v'aran an ensel kinkin, kavr ti a, “Palak arna m'ldauk, dav'a ti p'ani ti m'ertu udlani avlep'lah apavlak a nv' tlm?”

¹⁴ Ihei, iavr anr ensel kinkin. Hir avv'i m'im'iln na m'akarienan uaki, la Atua itap'er ha, a ti apavmhmah a m'ertu la Atua irn ti ipalev'lar ha.