Esra 1 - V'nen P'as iv'i Turanien Trtarep' m'a Turanien M'dah

A Sairus ivrp'ep'a v'nen hua iamk

¹ Arna pai itauamu na ti a Sairus iv'i mlin a Pesia, a ti v'nenan a Mlin Eia, la a Seremaia itvrp'ep'a sarei ha, ipatu hin, a Mlin Eia iuha m'im'iln a Sairus, iv'i mlin a Pesia. Laha, ivrp'ep'a v'nen hua iamk, v'nen lera iv'a arna nut udlani arna v'anu. Sarei, iulul ani arna ruplet iamk, kavr ti a,

² A Sairus, a mlin a Pesia, ivri inap'i laha, kavr ti a, A Mlin Atua na nut eia ittu sarar v'anu udlani arna nadep' ka a kana. Ittu sera v'nen hua iamk a kana, a ti p'ehl nmah ipamk sanan a Serusalem, la iter a Suta ha.

³ ?Hin ak asnm'i udlani iv'i m'ertuan? Atuan ipalak m'ei, sarei, ipav'el kadav'a eia a Serusalem, la iter a Suta ha. Ipahl nmahan a Mlin Atua a Isrel (Hin iv'i Atua dau), arna nut a Serusalem.

⁴ Ipavr ti m'ertu kinkin ilak a nut kinkin naran iv'el kadav'a atlera, arm'ertu na v'anuan apavsr lm'an m'a kul, m'a silva, m'a ultin nakl, m'a si slm. Si lera ipasiv' nav'et arm'ertu avrn ip'as a ti apavtaui sena nmahan Atua la iter a Serusalem ha.

Arm'ertu avlak arna v'anu ururaur avm'alet a Serusalem

⁵ Laha, armlin na nl nam'elar arm'ertu a Suta m'er arm'ertu a P'ensamin avp'tir. Sarei, arpris, m'er arm'ertu a Livai, m'er arm'ertu, la M'im'iln Atua itm'akar sarei a nlr ha, avp'tir, a ti apavv'el kavrav'a a ti apavhl nmahan a Mlin Eia la iter a Serusalem ha.

⁶ Laha, arm'ertu udlani, la avlaktalu anr ha, avmhmah anr istudau m'a dis aani a silva, m'a kul, m'a ultin, m'a si slm, m'a si p'sp'as nakl. Si lera isiv' nav'et avrn ip'as a ti apavtaui.

⁷ Sarei, a Sairus, iv'i a mlin a Pesia, iuirma sei, la arpris avan parei nakl m'ei ha, al nmah tamatan a Mlin Eia, iv'i sei a Nepukatnesa itlev'la sarei a Serusalem itauamu, kattu sarei al nmah tamatan atuan.

⁸ Inap'i lera, a Sairus, a mlin a Pesia, itaui ti a Mitretat, iv'i dui ispan nav'et nakl, ipan parei lera. Sarei, ispan si udlani, katau an a Sespasa, iv'i dui lil iamk a Suta.

⁹ Ispani inap'i laha: plet aani a kul avneltl (30), plet aani a silva avv'i tausen iamk (1,000), talei avnelru pln isav'et (29),

¹⁰ dis aani a kul avneltl (30), dis aani a silva (v'eti avnep'a sarar arki aani a kul) avv'i 410, m'a si uraur avv'i tausen iamk (1,000).

¹¹ Naran avspan si udlani avv'i kul m'a silva, avla ti avv'i 5,400. Si udlani lera a Sespasa ilav'i a Papilun kauirv'a a Serusalem, hin m'er arm'ertu udlani la avlak arna v'anu iav'i nkar ha.