Emus 1 - V'nen P'as iv'i Turanien Trtarep' m'a Turanien M'dah

Atua ipav'ana hua m'er v'anu

¹ A Emus iv'i m'ertu a Tekua iamk, ip'aurr sivsiv atlera. V'nen laha iv'i sei ilei, ier v'anu a Isrel, naran a Usaia iv'i mlin a Suta, m'a naran a Serupuam, la iv'i a natn a Suas ha, iv'i mlin a Isrel. Itu hin pai iru itauamu na naran nami imi.

² Laha, iv'ana, kavr ti a, “A Mlin Eia itprn dan a Saiun, kav'ana eia dan a Serusalem. Nina, la arm'ertu avp'aurr sivsiv avrav'a aranan nakl ha, itakal. Sarei, nut eia na ptha lil a Karmel im'am'a kastu.”

A Tamaskas

³ A Mlin Eia iv'ana inap'i laha, kavr ti a, “A Tamaskas ien si stu artl, aau, ien si stu arv'a. Sena si lera, nkavav v'ahienak a ti nkarpi ml. Sena ti atvrp sera nut a Kiliat m'a sei am'akar m'ei, la avani a aian ha, aau, atvrp sarei ihuet.

⁴ V'eti Kana p'etep'a nap' ipav'a eim al nmahan a Hasael, ipalr nmahan a mlin a Pen Hatat, kahiris anr.

⁵ P'ekapr nai lil na pn liu a Tamaskas, katrla m'ertu, la ilak al m'ihual nahan iv'i Aven ha. Apavlev'lar arm'ertu a Siria, apavrav'a kavp'resin arna v'anu a Kir.” A Mlin Eia iv'ana, kavr si lera.

A Kasa

⁶ A Mlin Eia iv'ana inap'i laha, kavr ti a, “A Kasa ien si stu artl, aau, ien si stu arv'a. Sena si lera, nkavav v'ahienak a ti nkarpi ml. Sena ti hir avuadar arm'ertu udlani kavani ti avp'resin, a ti apavtaur al lm'ar arm'ertu a Itum.

⁷ V'eti Kana p'etep'a nap' ipaier naml lil a Kasa, ipalev'lar nmahar mlin udlani atlera.

⁸ P'etrlar m'ertu avlak Astut, katrla hin, la iuada napilaktan a mlin kadan arna nut Askelun ha. P'evav lm'ak, sarei karp nut a Ekrun. Sarei, duanar arm'ertu a Vilistia apavram'a udlani.” A Mlin Atua iv'ana, kavr si lera.

A Taia

⁹ A Mlin Eia iv'ana inap'i laha, kavr ti a, “A Taia ien si stu artl, aau, ien si stu arv'a. Sena si lera, nkavav v'ahienak a ti nkarpi ml. Sena ti hir avuadar arm'ertu udlani kavani ti avp'resin, a ti apavtaur al lm'ar arm'ertu a Itum, ahavv'ahur turanien atvan sarei m'er tv'alr.

¹⁰ V'eti Kana p'etep'a nap' ipaier naml lil a Taia, ipalev'lar nmahar mlin udlani atlera.”

A Itum

¹¹ A Mlin Eia iv'ana inap'i laha, kavr ti a, “A Itum ien si stu artl, aau, ien si stu arv'a. Sena si lera, nkavav v'ahienak a ti nkarpi ml. Sena ti itkr a tv'aln m'a tali han. Iarni ti iparn istu a m'ertu, aau, isran v'ahien lera. Laha, iapr sei dav'a, sena ti nln irer, aau, iuada mamh nl reran (la ililet ha), ialni naran kinkin.

¹² V'eti Kana p'etep'a nap' ipaier nut a Teman, ipalev'lar nmahar mlin udlani a Pusra.”

Amun

¹³ A Mlin Eia iv'ana inap'i laha, kavr ti a, “Armertu Amun avan si stu artl, aau, avan si stu arv'a. Sena si lera, nkavav v'ahienak a ti nkarpr ml. Sena ti aviapr v'atr tav'et, la aviak a mardel ha, arna nut a Kiliat, a ti apavani ti nadep'ar ipalil mau.

¹⁴ V'eti Kana p'etep'a nap' ipaier naml hua lil a Rapa, ipalev'lar nmahar mlin udlani atlera. Arm'ertu apavv'ana eia sp'n arna napn a ti apan naur, nalen lil ipav'a nut ipamk, sarei kam'alet ml, arna napn a ti p'etep'a nalen lil.

¹⁵ Laha, a mlinar ipav'a kap'resin arna v'anu uraur, hin m'er arm'ertu lililan apavp'resin ipav'amk.” A Mlin Eia iv'ana, kavr si lera.