TITE 1 - NYƐʔƐLƐ LI KÀYORO

Syeriʔi

¹ Mì Pɔli ŋa Nyɛʔɛlɛ tungɔɔ ní Jesu Krisi pitunŋu we, mí bi ki sɛbɛ troʔo we mo Tite ma we. Krisi wí ma na tun jango bì da bee hari Nyɛʔɛlɛ lí ma fara ge, kà bí da hari wa pe pama na me, bì nì bì da kanyɛmɛ teri me pe na, ma mí ma yala Nyɛʔɛlɛ kloʔó ní ge,

² jango pe honriʔi pa nyuwyeʔe bajegɔ na we. Nyɛʔɛlɛ la loò na flɛn ge li dá ki nofele kon le wo ma sanni nyiri tí bi hli ge.

³ Di nyiŋi ga kí ma yala ge, à liʔi tyɛʔɛ hɛɛn na be li kayoro fanŋa ni ge, da wò Syɔfɔlɔ Nyɛʔɛlɛ lí ma kan ná ma mâ yo bì da ti nyu ge.

⁴ Ee, mí bi ki sɛbɛ ŋa troʔo we mo Tite ma, mo ŋa má nyɛ na pitaʔa mà yala wò bɛfu pama ní me. Wò To Nyɛʔɛlɛ ní, ní wò fɔlɔ Jesu Krisi nì pe frɛmɛ ní nyimi kan ye ma.

Tunŋu ga Pɔli wí ma kan Tite ma we

⁵ Mi da má yaʔa wa Krɛti klo ni le jango ma da kaʔa ke tɔɔ tyonri ge, gee ke dá go bajonrigee ge, mâ nì ma sɛrigo lagwɔɔ tɛnŋɛ wa kyɛrɛ̀ tì bɛfu ni. Ma lama to na kayoro da nì mi dá yo má kan ge tí da:

⁶ Kí ma yala yɛklu wi po baʔahaʔa fun. Wi po cɛlɛ nigbe fɔlɔ. Wi pii pe po pé ma pa Krisi na we. Hɛɛn pò gáa pe kayoʔo nyu ge bì yo pé nyɛ kyɛnrɛ hanrifɛɛ, ná kiì ban, bì bo piyɛri jeele.

⁷ Mɛjɛn yɛklu pɔɔ gâ bo Nyɛʔɛlɛ li tunŋu kaʔa conrifɔlɔ ge, fɔ kí ma yala wi po baʔahaʔa fun. Wò gá bo yugbanʔa fɔlɔ. Wò gáa nàʔà taʔa ticaʔaga. Wò gá bo hunjɔɔ. Wò gá bo tihɛnʔɛŋɛ. Wò gáa tonro ca pomo ma na moò sinmi ge.

⁸ Di kí ma yala wi po nabonmoo trigifɔlɔ. Ga kí nyɛ kmaʔa ge ki dɔɔ glànʔá. Wi po ticlimi fɔlɔ. Wi po sinŋi. Wi po ylɛɛ. Wi wì como cɛn.

⁹ Wi kayofiri co de kmaʔa da tí ma yala krɛʔɛmɛ nì me, jango wi gbàn wi da dihon kanʔa hɛɛn ma be krɛʔɛjɛnmɛ ní me, wi da kakara fɛɛ pe punŋumu deʔe teri ge pe na.

¹⁰ Mɛjɛn hɛɛn fafaʔa nyɛ wa, bee pé na yugu fun kayoro nyu mâ na hɛɛn fanla be. Pe fafaʔa nyɛ Juwifiyee bee pé ma krɛʔɛ sɛrifɛɛ ge.

¹¹ Kí ma yala wo pe noro ton de, mɛjɛn pé na hɛɛn krɛʔɛ kaʔa gee ní ke ìn yala ge. Ali pe na gbàn mà heme ma wlele mì bɛfu ge, jango bì tonro ta pomo ma na moò sinmi ge.

¹² Ali pee tapoboo pe leyoo wà dàʔa yo mà yo: «Mà kpe ki hlinyiŋi na, Krɛti klo woo pé nyɛ akpoflɛɛn mà po ajotihrobo mà po fungbɔʔɔ fɛɛ bee pé nyɛ tinyamaa ge.»

¹³ Kayocɛnŋɛ gi. Ki kala na, ma pe yɛri gbanʔa jango pe po pama ní ma mí nyɛ sinmi ge.

¹⁴ Pò gáa ba Juwifiyee pe migoro na de ní hɛɛn bee furu kayoro ní, pé na kruʔu wa kanyɛmɛ ma me.

¹⁵ Bee ma pé nyɛ ylɛɛ ge, yrɛbɛ pì bɛfu pí nyɛ ylɛbɛ. Di bee ma pé nyɛ tipee mâ po pama wò nyɛ pé ma ge, yraʔa kà wò pe yɛʔɛ̀ na ge ylɛʔɛ. Ali pe honriʔi nì, ní pe lama ní pí ma kran tipere ní de.

¹⁶ Pé naʔa nyu mà yo pé ma Nyɛʔɛlɛ cɛn le. Àʔa hín bo pe kahranŋaa ké naʔa teri hɛɛn na be mà yo pé ma li ce. Pé nyɛ tipee ceŋge mà po baloʔoboo. Pòo gban bì yraʔa kà hanri ga kí nyɛ kmaʔa ge.