TICLIMI 1 - NYƐʔƐLƐ LI KÀYORO

Nyuwyeʔe kí nyɛ yugu fun

¹ Ticlimi fɔlɔ wi kayoro, ŋa Jerusalɛmu kaʔa masanaŋa we, mâ po Dafide wi najɛ wi ge.

² Ticlimi fɔlɔ wɔ̀ɔ yo: Yraʔa kì bɛfu kí nyɛ waʔafe, mà po waʔafé. Yraʔa kì bɛfu kí nyɛ waʔafe.

³ Hɛɛn pé na pè teʔe na tungbanʔa ga kò naʔa tra na de, di poò na tonro taʔa waʔa ni.

⁴ Nà kluʔu kà bi doró, kà na pan nɛ wa ki woo pe kruʔu ma ge, di tra ti ín je wa bì grɛʔɛ.

⁵ Yaa ki na nyini, mà gà jè mà fyala mà kɛri ki nyinihaʔa na ge, jango bì ya nyini fonŋo.

⁶ Tiflɛʔɛ ki naa funnu na sye yaa prama kamolo namyɛlɛ na mà wa ma krɛʔɛ na sye ki prama kaligi namyɛlɛ na le. Ki na wa na krɛʔɛ nyiŋi kì bɛfu na na sye ki klolɛrɛ tìì ni.

⁷ Lɔkpandoro tì bɛfu tí na fo na jin wa nyugbɔmo ni me, di mí je nyi. Lɔkpandoro ti nyumu mí na fo na jin wa nyugbɔmo ni, mà na hunnu na sye wa mi jɛhaʔa na ge nɛ fonŋo.

⁸ Teʔe kpangbanŋa nyɛ kaʔa kè bɛfu na. Hɛnwyee pyɔ wòo gban bìʔi cɛn bìʔi yo. Nyɛlɛ li in je din wleʔe na ge fyeu. Nakpolo li in je din loʔomo na me

⁹ Yraʔa ga ki da glú mà po wa. Kiì tege bi bo wa nɛ fonŋo. Yraʔa ga ki da glu mà hanri fan kíì bi baa hanri. Yraʔa kà wò naʔa fonŋo yaa ki noʔo na ge.

¹⁰ Nà yraʔa kà bí da ge, hɛɛn pe na yo: «Afonŋo wele ga ge,» di kí na po ki yraʔa ki da glú mà po wa nyiŋi ga na ki toro ge.

¹¹ Hɛɛn pe in je da honri kaʔa gee na ke toro kɔ ge. Bee pe na pan wa wò kruʔu ma ge, pee pe kruʔu ma wóo pe ìn bí baa lama tun ki woo pe kaʔa ní ge.

Ticlimi fɔlɔ wi kaʔa cɛnmɛ

¹² Domì ŋa ticlimi fɔlɔ we, mí ma krɛʔɛ Israyɛli kluʔu woo pe masanaŋa wa Jerusalɛmu ni we.

¹³ Mi dí na lama honri me naʔa tra na mà kaʔa kè bɛfu kɔrɔsi na ticlimi nì gee ké na hanri naʔa ge. Ki tunŋu kì bɛfu kí nyɛ teʔe woʔo Nyɛʔɛlɛ lí maʔa kan hɛɛn ma be, jango kiì pe teʔe.

¹⁴ Mí ma tunŋu kì bɛfu nya ga kí na ko naʔa tra na de. Wele, kì bɛfu kí nyɛ waʔafe, nɛ pa tiflɛʔɛ prɔmo nyɛ me.

¹⁵ Mɛjɛn yraʔa ga kí ma kolo, kòo gban bì sin. Hɛn wóo gban bì yraʔa ga tonli koò nyɛ wa ge.

¹⁶ À miʔi yo wa na lama ni me mà yo: Wele, mí nyɛ kpangbanŋa, mà toro masaa bee na pé nyɛ naʔa Jerusalɛmu klɛnmɛ ni me, mà cligi pè bɛfu na. Na dihon wí ma ticlimi nì, kacɛnmɛ kpangbanma ta ceŋge.

¹⁷ Ee, mi dáa kacɛnmɛ nì, ní ticlimi ca na dihon wì bɛfu ní, jango bì letɔrɔ ní ticere cɛn bì pì kon pi na. Di mí maʔa cɛn mà yo pii yoo kpo pí nyɛ tiflɛʔɛ prɔmo mi.

¹⁸ Mɛjɛn hɛn nòo po ticliŋi ceŋge ge wi lama mí naa wlele wí na ceŋge kpo, Hɛn ŋa wí bi kacɛnmɛ fafaʔa ta, pɔɔ lagbanma fafaʔa ta kpo.