SOFONI 3 - NYƐʔƐLƐ LI KÀYORO

Jerusalɛmu wi ìn loʔo Nyɛʔɛlɛ li yerime ma me

¹ Kaceʔe, mà po kranʔa mo ŋa má na hɛɛn cɔʔɔ be, tipeʔe bi ma ta.

² Mɛjɛn ki ìn dà loʔo yerime ma me. Ki ìn dàʔa ta bi yrɛmɛ kayoro loʔo de. Ki ìn ki ta kpo bì ki honriʔi pa Bajegɔ Nyɛʔɛlɛ na le. Ki ìn dàʔa ta bì flo wa ki Nyɛʔɛlɛ tanla le.

³ Ki kaʔa ga, ki lama kundiʔiyee pé nyɛ nɛ pa jariyee bee nyɛ pé na colo ge. Ki kundiʔiyee à pe po nɛ pa sanwyeʔe nyɛ gee ké na kara ca yaakwɔʔɔ na. Di ke in je tà yaʔa kpɛndo woro.

⁴ Ki Nyɛʔɛlɛ leyoo pé nyɛ makpɔʔɔmo fɛɛ mà po hɛɛn punŋumu fɛɛ kpo. Ki sraʔa farafɛɛ pé na deylɛʔɛ kran ge mà na krɛʔɛmɛ cɔʔɔ me.

⁵ Bajegɔ Nyɛʔɛlɛ sinli lí nyɛ wa klɛnhaʔa ki lama ni me. Klomo wò wa liì ni le. Lí na li kahranʔa ní li sinmi teri finmi na jɛfanʔa o jɛfanʔa. Li in je fleʔe ki woʔo na ge. Di, kiì nì kì bɛfu ní, hɛnkloŋo wi in je fɛrɛ cɛn.

⁶ Bajegɔ Nyɛʔɛlɛ à li yo: «Mí ma kloʔo ke tɔɔ hɛɛn pèè kpo, à pe kɔ mà pe gotiklonro jrɛʔɛrɛ cɔʔɔ de. Mí ma pe kaʔa namyɛʔɛ hanri, à ke ko hɛɛn fun. Hɛɛn wà nigbe wò na toro wa pe ma adi. Pe kyɛrɛ tí ma jaʔabu mà krɛʔɛ tomoyee, fɔ hɛn wà nigbe ìn gban bì glɛn wa ti ni adi.

⁷ À miʔi yo wa na lama ni mà yo: Nàʔa po Jerusalɛmu wi dí biʔi ta bì da fyaʔa ná na nɛ bì da yrɛmɛ kayoro nuru de, pe klɛnhaʔa ki ìn dì bi jaʔabu. Mí dá kayoro da yo mâ wa pe ma, ti ìn dì bi pe ta. Di pé na fyala na katipeʔe hanri.»

⁸ Ki kala na, Bajegɔ Nyɛʔɛlɛ à li yo: «Ye na han. Yeʔe cɛn ye yo ki wlɛʔɛ kí na pan wa, mí bi ba jɛ bì kiti kon we. Mɛjɛn mi diʔi kón màʔa yaʔa mà yo mí bi kluru nì, ní masara kpoʔolo deʔe nigbe na. Na lagbangbɔmo mí bi na nafunŋu yaʔa ki to pé na. Na lagbanma kwɔʔɔ ki bi tra tì bɛfu hogo.

Nyɛʔɛlɛ lí bi ba hɛɛn pe kluru krɛʔɛ de

⁹ Ki nyiŋi na, mí bi nosɛrɛ da kan kloʔo ke tɔɔ hɛɛn ma. Tí bi bo ylɛrɛ de, jango pè bɛfu pee Bajegɔ Nyɛʔɛlɛ li yele yeri le. Pee tunŋu ko lí kan dihon nigbe ní.

¹⁰ Na kpɔʔɔfɛɛ ní, ní na hɛɛn bee pé ma craʔa wa Etyopi klo lɔʔɔ kruʔu ma ge, pè bɛfu pé bi ba nadanma yrɛbɛ kan ná ma.

Israyɛli hɛɛ bee pe koró ge

¹¹ Ki wlɛʔɛ na ge, Israyɛli mɛ ìn bi ba fɛrɛ ta bì klomo ta na namyɛlɛ na le. Hɛɛn bee pé nyɛ lafiʔimi nì makpɔʔɔmo ní ge. Mí bi pe nyini wa ma kpafoʔo ni ge. Mɛ ìn bi da mà kpɔʔɔ wa adi na angoylɛʔɛ yugu na ge.

¹² Hɛn ŋa wí na wì cɛrɛ mâ po fanŋa fun ge, ki woo bee pé ma pe honriʔi pa Bajegɔ Nyɛʔɛlɛ na le. Mí bi pe yaʔa wa ma kpafoʔo ni ge.

¹³ Israyɛli woo bee pe koró pe ìn bi baa klomo hanri adi, pe ìn bi baa flɛnʔɛ. Fanlanma kayoro ìn bi baa nyini wa pe noro ni de. Di pé bi baa li bì da fyonri. Hɛn wɛ ìn bi ba fyara lege pé ni adi.»

Jerusalɛmu wi fyonriʔi tama kayoʔo

¹⁴ Sinyo kaʔa, maa daʔara lafiʔimi nì. Israyɛli, maa yɔʔɔri gbanʔa. Jerusalɛmu, ma po lafiʔimi nì, maa yɔʔɔri ma dihon wì bɛfu ní.

¹⁵ Bajegɔ Nyɛʔɛlɛ li dá kiti kayoʔo ga yo ma kala na le. Lí moo yaʔa. À li ma bɛnfɛɛ laʔa be má na. Israyɛli, ma masanaŋa, Bajegɔ Nyɛʔɛlɛ liì tapolo lí nyɛ wa ma kpafoʔo ni ge. Tipeʔe kɛ ìn bi ma ta adi fyeu!

¹⁶ Ki wlɛʔɛ na, lí bi baʔa yo Jerusalɛmu ma we bì yo: «Sinyo kaʔa, mò gáa fyaʔa. Ma kyɛrɛ ti fanŋa kò ga gɔ.

¹⁷ Bajegɔ Nyɛʔɛlɛ la ma Nyɛʔɛlɛ lí nyɛ wa ma kpafoʔo ni ge. Ma Syɔfɔlɔ braʔa fɔlɔ wi. Lí nyɛ lafiʔimi nì mà po frɛmɛ ní ma kala na le. Lí bi byeri ma glanʔama mi kpangbanma kala na le. Lí bi bo lafiʔimi nì bì da ŋu ma kala na le.

¹⁸ Hɛɛn bee pé nyɛ yɛpɛnʔɛ ní mâ po pe ìn dà gban bí kpoʔolomo ylɛmɛ mà hanri ma hɛɛn fafaʔabaa pé na hanri ge, mí bi pe kpoʔolo deʔe nigbe na. Pé ma nyini wa mo ni. Faʔarama kacleʔe ki dá bo pé ma tiluʔugu ceŋge. Mí bi ba fɛrɛ laʔa de pe na.

¹⁹ Ki nyiŋi na, mí bi ba pè bɛfu cɔlɔ bee pe dáa ye cɔlɔ ge. Mí bi ceʔe nigbe nigbe fɛɛ pwɔʔɔ be. Hɛɛn bee pe dá brɔ ge mí bi pe hanri pe hrù, pe pan nɛ. Fɛrɛ ti da dón na hɛɛn na be wa kloʔo gee ni ge. Mí biʔi hanri pee pe sonni, pee pe kpɔʔɔ wa ki kloʔo ni ge.

²⁰ Ki nyiŋi na, mí bi ba ye kpoʔolo deʔe nigbe na, bì ban ye nì wa yè goro ni de. Nàʔa po mí ma wa yèé ni be hɛɛn bee nuŋu pe da jo yè yɛʔɛ na, mí biʔi hanri yè kpɔʔɔmo ta ceŋge ní sonmo nì, wa tra heme hɛɛn pè bɛfu kpafoʔo ni.» Bajegɔ Nyɛʔɛlɛ à li yo ban.