SOFONI 2 - NYƐʔƐLƐ LI KÀYORO

Bee pé na pè cɛrɛ pe yerime

¹ Yèé bee fɛrɛ funfɛɛ be, ye yè kpoʔolo deʔe nigbe na. Ye yè po, ye yè wele,

² sanni kala la li da glú mâ yo lí bi funŋu, sanni ki wlɛʔɛ kí bi doro ticaʔaga nɛ pa nya waʔaga nyɛ ge, sanni Bajegɔ Nyɛʔɛlɛ li nafungbɔʔɔ kí bi do ye na ge, sanni li nafunŋu wlɛʔɛ kí bi fo bì je ye ni ge.

³ Yèé tra hɛɛn bee yé na yè cɛrɛ, yèé bee yé na Bajegɔ Nyɛʔɛlɛ li krɛʔɛmɛ kpin mâ na tanri mí na ge. Yee li ca. Yee sinmi ní macrɛmɛ ca. Nàʔa po ban, pa ye hrahaʔa ta Bajegɔ Nyɛʔɛlɛ li nafunŋu wlɛʔɛ na ge.

Kayogbanra ma yo yaajɛhaʔa klòʔò kan ge

⁴ Gasa kaʔa kí bi grɛʔɛ tomo. Asikalon woʔo kí bi grɛʔɛ dewaʔaga nyumu fun deʔe. Asidɔdi woo be pé bi ba pe prɔ yaagbanʔa na.

⁵ Hɛɛn bee pe klɛ́n wa nyugbɔmo tanla ní Krɛti woo ní, tipeʔe bí pe ta. Kayoʔo ga Bajegɔ Nyɛʔɛlɛ li dá yo mà wa Filisite klo ma la lí nyɛ Kana wolo le, kiì ga ge mà yo: «Mí bi ma cɔʔɔ. Hɛn wɛ ìn bi go wa ma ni adi.

⁶ Kloʔo gee wa nyugbɔmo tanla ké bi ba grɛʔɛ ajobo naʔahaʔa, ní mbara naʔafɛɛ korohaʔa ní mbara syɛnhaʔa kpo.»

⁷ Ki nyugbɔmo tanla kloʔo ké bi ba grɛʔɛ Juda kluʔu woo bee pe koro pee deʔe. Pé bi baa pe mbara naʔa de wa. Pé bi baa sye bì yaa syɛn wa Asikalon goro ni yebliʔi ni ge. mɛjɛn Bajegɔ Nyɛʔɛlɛ la pe Nyɛʔɛlɛ lí bi baa pe kɔrɔsi bì nyugara ta pe na bì pe fara wa nklomo ni me.

Kayogbanra ma yo yaajɛhaʔa klòʔò kan ge

⁸ «Mí ma Mowabi kluʔu woo pe tyɛʔɛgɛɛ kayoro ní. Amo kluʔu woo pe faʔarama kayoro loʔo de. Pé ma na hɛɛn tyɛʔɛlɛ be mà jɛ mà pe klo kanŋaa krɛʔɛ ge.

⁹ Ki kala na, sye wì bɛfu fɔlɔ Bajegɔ Nyɛʔɛlɛ la Israyɛli kluʔu woo pe Nyɛʔɛlɛ à li yo: Na wyeme yele kala na le, Mowabi wí bi ba hanri nɛ pa Sodɔmu kaʔa nyɛ. Amo kluʔu kí bi ba grɛʔɛ nɛ pa Gɔmore kaʔa nyɛ ge. Huru tí bi fin wa pe dere tì bɛfu na. Kɔ wí bi pe tra dere tì bɛfu ton bì go wa su. Na hɛɛn bee pé ma ko nyuwyeʔe na, pé bi baa pe tanri. Na hɛɛn bee pe ko nyuwyeʔe na, pé bi ba ki woo ta be krɔʔɔ.»

¹⁰ Kí bi ba bo pe makpɔʔɔmo sraʔa, mɛjɛn pé ma Sye wì bɛfu fɔlɔ ŋa Bajegɔ Nyɛʔɛlɛ li hɛɛn tyɛʔɛlɛ be mà na pè kpɔʔɔ.

¹¹ Bajegɔ Nyɛʔɛlɛ lí bi bo fyakpɔrɔ yraʔa pé ma ceŋge. Mɛjɛn lí bi ba tra ti asunmu pì bɛfu cɔʔɔ pi kɔ. Ki nyiŋi na, hɛɛn pè bɛfu nigbe nigbe pé bi baa li kpɔʔɔ, bì pe yaʔa wa pe klotala ni le, ali hɛɛn tyɛnʔɛ gee ke klɛ́n wa kloʔo gee ni nyugbɔmo mí ma ke kɛli, á ke po leʔe ge.

Kayogbanra ma yo yaa prama kaligi namyɛlɛ ní kamolo namyɛlɛ kloʔo kan ge

¹² «Yèé bee Etyopi woo be, yé bi gu kpo na mlanʔa kpele fanŋa ni ge.»

¹³ Ki kruʔu ma, Bajegɔ Nyɛʔɛlɛ lí bi ba li kyɛʔɛ haʔala bìʔi wa yaa prama kamolo namyɛlɛ na bì Asiri klo woo kpo be. Lí bi ba Ninife kaʔa krɛʔɛ ge dewaʔaga nyumu fun deʔe, bìʔi krɛʔɛ nɛ pa sinbriʔi deʔe nyɛ ga kí nyɛ waʔafe deʔe gi ge.

¹⁴ Ajodara pa ti da sye bì yaa syɛn wa. Ki nulala ni le, ajobo tyɛnʔɛ kè bɛfu, ali koyriri ní, ní kajɛnrɛ ti tɔ da nì tí na kara ka ge, tí bi da glɛn wa goro yuru na. Kajɛnʔɛ ké bi baa gbele wa pe goro finɛtriyee na be. Kaʔa ki fanma yugu paʔa jɔʔɔ. Pé bi ba sɛdre tiri kle bì ti fara wa goro na de.

¹⁵ Ki kala na, makpɔʔɔmo kaʔa ga ki da glɛ́n frɛmɛ na, mâ po ki lama hɛɛn pe dáa ki honri mà yo pé ma klɛn nyimi na, mà naʔa nyu kpo mà yo pe nyoʔo wò wa, wele, pé ma cɔʔɔ mà ku. Kí ma krɛʔɛ nya ajobo hrahaʔa. Hɛn o hɛn ŋa wí bi doroʔo tanla, pè bɛfu pe naa wofyeʔele wyeriʔi na, mà na kyɛrɛ tonni wa pe noro na na kafonlo waʔa na.