SOFONI 1 - NYƐʔƐLƐ LI KÀYORO

¹ Juda kluʔu masanaŋa Josyasi ŋa Amo najɛ wi nyiŋi na, Bajegɔ Nyɛʔɛlɛ li dá ki kayoro yo Kusi najɛ Sofoni ma we. Kusi wi to wi dá bo Gedaliya nì. Gedaliya to wɔ̀ɔ po Esekyasi nì.

Nyɛʔɛlɛ lí bi jan tra tì bɛfu ní

² Bajegɔ Nyɛʔɛlɛ li dá yo: «Mí bi tra yrɛbɛ pì bɛfu cɔʔɔ bì pi laʔa wa tra na de.

³ Mí bi hɛnwyee ní, ajobo nì kajɛnʔɛ ní, ní nyugbɔmo fyɔɔ ní pì bɛfu kpo pi kɔ. Mí bi hɛnkloboo ní pe asunmu plɛn bì pe cɔʔɔ pe punŋumu kaʔa kala na le. Mí bi hɛɛn pè bɛfu kpo bì pe kɔ naʔa tra na de. Bajegɔ Nyɛʔɛlɛ à li yo ban.»

Nyɛʔɛlɛ lí bi jan Juda nì, ní Jerusalɛmu nì we

⁴ «Mí bi na kyɛʔɛ jrɛʔɛ bìʔi pa Juda kluʔu nì, Jerusalɛmu kaʔa woo pè bɛfu na, bee pé na Baali asunŋu kpɔʔɔ naʔa ki kaʔa ga ni ge, mà plɛn ki tungɔɔ ní be, ní ki sraʔa farafɛɛ ní be Mí bi pè bɛfu kpo bì pe nyini naʔa ki kaʔa ga ni ge.

⁵ Hɛɛn bee pé na kunbiʔi kanni wa namuru yrɛbɛ tanla ba pí na kpɛnmɛ pari mâ na pi kpɔʔɔ kpo wa goro yuru na de, mí bi ki woo kpo be, bee pé na kpɔbu ki yrɛbɛ tanla mà na pè klan Bajegɔ Nyɛʔɛlɛ li yele na le, mà na pè klan kpo peè tapoboo pe asunmu na be,

⁶ bee ní pé ma kruʔu wa Bajegɔ Nyɛʔɛlɛ ma le, ní bee ní poò na Bajegɔ Nyɛʔɛlɛ ca le, mâ po poò na pe honriʔi pa li na ge, mí bi pè bɛfu kpo.»

⁷ Ye pyèrí wa Bajegɔ Nyɛʔɛlɛ li yɛʔɛ ma ge, mɛjɛn li wlɛʔɛ kí na nori. Bajegɔ Nyɛʔɛlɛ lí ma sraʔa kondo we mòo yaʔa, à li li hɛɛn yɛli be bee li yeri ge.

⁸ Bajegɔ Nyɛʔɛlɛ à li yo: «Kundiʔiyee ní, masanaŋa wi najɛɛ ní, ní bee ní pé na klo la kpasyoro ni, mí bi ki woo pè bɛfu kmo Bajegɔ Nyɛʔɛlɛ li sraʔa farawlɛʔɛ na.

⁹ Ki wlɛʔɛ na ge, hɛɛn bee pé na yeri ná toro yrɛbɛ yugu na, jango bì ya pe asunmu goro nyi klomo masaʔa ní, ní tihromo woʔo ní, mí bi ki woo pè bɛfu cɔlɔ.»

¹⁰ Bajegɔ Nyɛʔɛlɛ à li yo: «Ki wlɛʔɛ na, pé bi ba taʔarakpɔʔɔ loʔo wa fyɔɔ pe goyɛʔɛ na ge. taʔarakpɔʔɔ bi baa nyini wa tindinyee na be.

¹¹ Noʔoma kaʔa nulala woo, yee gbele gbanʔa, mɛjɛn yawafɛɛ pè bɛfu pé bi ba gu. Hɛɛn bee pe dáa wɛrifiʔi tugu ge, pè bɛfu pé bi ba gu.

¹² Ki nyiŋi na, hɛɛn bee pé nyɛ fyonriʔi na nɛ pa dufɛn nyɛ ŋa wí to ciloli ge. Bee pé naʔa nyu wa pe lama ni me mâ yo: ‹Bajegɔ Nyɛʔɛlɛ li ìn bi kakmaʔa gi, ná kiì ban, kapeʔe hanri ge, mí bi Jerusalɛmu kaʔa dere tì bɛfu nyari kwɔʔɔ ní bì ba pè bɛfu sari.›

¹³ Yrɛbɛ kolifɛɛ pé bi ba pe krɔʔɔ tyɛʔɛhaʔa dere krɔʔɔ koli ge. Pe goro pa ti grɛʔɛ tomoyee. Pé bi ba goro fan, di poò ba je wa ti ni. Pé bi ba hrɛsɛn nagɔyee fali, di poò ki hrɛsɛn nyumu mà jɔ.»

¹⁴ Bajegɔ Nyɛʔɛlɛ li nafunŋu wlɛgbɔʔɔ kí ma no. Kí ma no, Kí na fyala na pan. Ki panma kala na, dihongonʔo konŋoo bi baa nyini. Ali hɛɛn bee braʔafɛɛ pe konŋoo ké bi da nyini kpo, pa pe da haʔama ca.

¹⁵ Ki wlɛʔɛ kí bi ba bo lagbanma woʔo. Kí bi ba bo cɔlɔkpɔʔɔ wlɛʔɛ bì bo nɛ cromo wlɛʔɛ kpo. Kí bi ba bo kuʔu wlɛʔɛ bì bo cɔʔɔmo woʔo kpo. Kí bi ba bo yebliʔi wlɛʔɛ ceŋge bì bo yebliwɔlɔ wlɛʔɛ bì bo fawɔrɔ ní, ní lɔli wlɛʔɛ.

¹⁶ Ki wlɛʔɛ na, pé bi baa mlagmoo wyeʔe wyerime nuru, ní mlanʔa taraʔa ní. Kí bi baa hanri fanŋa kyɛrɛ nì, ní gunru tiklonro ní da tí na kyɛrɛ kɛli tiì kala na.

¹⁷ Bajegɔ Nyɛʔɛlɛ à li yo: «Mí bi hɛɛn pe dihon kon pe na, pa pe da danri nɛ pa fyoon nyɛ be. Mɛjɛn pé ma tipeʔe hanri Bajegɔ Nyɛʔɛlɛ na le. Pe disyan kí bi ba wo namyɛʔɛ kè bɛfu na nɛ pa taplɔʔɔ nyɛ ge. pe wre kuru pa ti grɛʔɛ nɛ pa kakraba nyɛ be.»

¹⁸ Pe wɛrifiʔi nì, ní pe tɛ nì pòo gban bì pe syɔ Bajegɔ Nyɛʔɛlɛ li nafunŋu wlɛʔɛ na ge. Klo lì bɛfu li nafunŋu kwɔʔɔ kí bi ba li hogo, mɛjɛn lí bi ba klo lama hɛɛn pè bɛfu hogo dedege na ge.