TYƐʔƐMƐ 1 - NYƐʔƐLƐ LI KÀYORO

Kayokplɛrɛ

¹ Kaʔa gee ké ma yala ké ba hanri ticaʔaga ge, Nyɛʔɛlɛ li dá ki woʔo tyɛʔɛ ge Jesu Krisi na we, jango wi ke tyɛʔɛ wi tungɔɔ na be. Wi dá wi mlɛŋɛ tun wa wi tungɔɔ Jan ma we mà yâ ke tyɛʔɛ wí na.

² Kaʔa gee Jan wi dá nya ge, wi na ke kayoʔo nyu ge naʔa. Wɔ̀ɔ Nyɛʔɛlɛ li kayoro ti kayoʔo yo ní kanyɛmɛ ma nì Jesu Krisi wi dá yo ge.

³ Hɛn ŋa wí na Nyɛʔɛlɛ li kayoro nyu wa ki sɛbɛ ŋa ni we ní bee ní pé na ti nuru mâ na ti kpɔʔɔ ge, ki woo pa pe frɛmɛ ta, mɛjɛn ti funŋunyiŋi kí na nori.

Jan wí ma sɛrigoro nasyɛn syeri

⁴ Mì Jan, mí bi ki sɛbɛ ŋa troʔo we sɛrigoro nasyɛn ma, da tí nyɛ wa Asi klo ni le. Frɛmɛ ní, ní nyimi bí bo ye mà, pí na jrɛʔɛ wa Nyɛʔɛlɛ ma le, la lí nyɛ wa ge mâ po li da glú mâ po wa, á li na pan wa ge. Pí na jrɛʔɛ wa kpo nyìgée nasyɛn gee ma ké nyɛ wa masaʔa aconʔo ki yɛʔɛma ni we.

⁵ Pi ní na jrɛʔɛ wa nɛ Jesu Krisi ma, ŋa wí ma Nyɛʔɛlɛ li kanyɛmɛ yo me mâ po kaʔa funŋufɔlɔ we. Wiì wi ŋa wi da glú mâ nyɛ mâ nyini kuu ni be. Wiì wi ŋa wí nyɛ drunya klòʔo fɛɛ pe kundiʔi we. Wó noo glanʔa, wɔ̀ɔ wo syɔ wò kapere ma de wi kùʔù fanŋa ni ge,

⁶ mà nì mà wo hanri masaʔa jango wo po wi To Nyɛʔɛlɛ li sràʔá farafɛɛ. Kpɔʔɔmo nì, sye ní pi po wí ma nyiŋi kì bɛfu na. Ki po ban.

⁷ Yè wèlé, wí na pan wa fara ni de. Hɛɛn pè bɛfu pé bi bɔɔ nya, ali bee pe dɔɔ sún ge. Hɛɛn pè bɛfu bee pé nyɛ naʔa tra na de, pa pe da gbele wi kala na le. Ee, ki po ban.

⁸ Wò fɔlɔ Nyɛʔɛlɛ liì maʔa yo mà yo: «Mí nyɛ Alifa mà po Omega. Mi nyɛ Kplɛ̀ɛ mà po Tanʔaŋa.» Wiì wi ŋa wí nyɛ wa mâ po wi da glú mâ po wa ge, wɔ́ɔ na pan wa ge. Sye wì bɛfu fɔlɔ wi.

Krisi wí ma wì tyɛʔɛ Jan na we

⁹ Mì Jan ŋa wí nyɛ yè woo we wò kpoʔolomo kala na Jesu Krisi nì we. Wó na cɔlɔ teme na mà po teme na wa wi masaʔa ni ge, ní lagunmu ní me. Mi dá bo wa klo là ni wa nyumu nulala ni le. Pé na ki klo yeri le Patimosi. Pe da ná co mà na troʔo wa ki deʔe na ge Nyɛʔɛlɛ kayoro yomo kala na ní Jesu wi kayoʔo jarimi kala ní le.

¹⁰ Nyɛʔɛlɛ li Nyìli li da jé ná ni wò fɔlɔ wi wlɛʔɛ na ge, à mi ákpolo kpangbanla loʔo wa na kruʔu ma ge nɛ pa wyeʔe wyereme nyɛ me.

¹¹ À li yo: Ga má na nyaʔa ge, maʔa nyòŋó sɛbɛ wà ni, moo troʔo wa sɛrigoro nasyɛn ma. Tí da: Efɛse, Simirine, Pɛrigamu, Tyatire, Saride, Filadɛlifi, ní Lawodisi nì we.

¹² À mi wa mà krɛʔɛ mà wele jango bi ŋa nya wí na nyu ná ni ge. Pa mi gâ wa mâ krɛʔɛ mâ wele, à mi fiklanyee pahara nasyɛn nya. À pe po tɛ fiklanyee bɛ.

¹³ Awyeʔe kà dà bo wa ti nulala ni le. Àʔa hɛn lɛ́ we. Dreʔe ga ki dá bo wí na àʔa po tiklonʔo fɔ mà bâ no wa wi tɔwɛrɛ na de. À tɛ anuʔulu ma po wí na pwɔlɔ wi digiyɛʔɛ na ge.

¹⁴ Wi yugu nì, ní wi yujoro ní pi dá bo na fligi nɛ pa mbajoʔo nyɛ ge. Ki na po pé yo na fligi pere, pere. Wi nyɛʔɛ pii à pe po nɛ pa kwɔʔɔ nyɛ ga kí na nyi ge.

¹⁵ Wi tɔwɛrɛ ti dá kanyɛrɛ lɛ̀ de da pé ma tɛʔɛlɛ kwɔʔɔ na ge, à ti no mà na nyi fyɛ fyɛ. Wi àkpolo li dá bo nɛ pa nyufafaʔa tunnumu nyɛ me.

¹⁶ Wi dá ŋoŋoo nasyɛn co wa wi kaligyɛʔɛ ni ge. Yɛrɛ syɛn mlaʔa kpele dá bo na nyini wa wi nò nî mà po tanla. Wi yɛʔɛ̀ àʔa na fligi nɛ pa yaagbanʔa nyɛ ga kí na hogo ge.

¹⁷ Mi gɔ́ɔ̀ nya nyiŋi ga na ge, à mi taʔa mà to wì tanla mà po nɛ pa kpo nyɛ we. Wɔ̀ɔ wi kaligyɛʔɛ pa ge na na mà yo: «Mò gáa fyaʔa. Mɛjɛn mí nyɛ kplɛɛ mà po tanʔaŋa.

¹⁸ Mí nyɛ nyuwyeʔe na. Mi dá gu, di welé, mí nyɛ nyuwyeʔe na nyiŋi kì bɛfu na. Mí ma fanŋa ta kùʔù nì, ní kuu kaʔa na ge.

¹⁹ Ki kala na, kaʔa gee ma dá nya ge, ní ŋaŋa woʔolo ní ge, ma plɛ̀n gee ní ké bi baa hanri ke kruʔu ma ge, ma ke nyòŋó.

²⁰ Ŋoŋoo nasyɛn ŋa má ma nya wa na kaligyɛʔɛ ni ge, ní tɛ fiklanyee nasyɛn nì we, ke kahrala lí la: Ŋoŋoo nasyɛn ké nyɛ sɛrigoro nasyɛn mlɛŋɛyee bɛ. Fiklanyee nasyɛn pé nyɛ sɛrigoro nasyɛn wi.