YOMƐʔƐ 1 - NYƐʔƐLƐ LI KÀYORO

¹ Dafide najɛ Salomo, ŋa Israyɛli kluʔu woo pe masanaŋa we, wi yomɛʔɛlɛ.

Sɛbɛ wi yugu

² Jango hɛn wi ticlimi cɛn me, wi mi plòʔó, Wi ticlimi kayoro cɛn de.

³ Bì krɛʔɛjɛnmɛ ta, bì kayocɛnŋɛ cɛn ge, ní sinmi ní, ní kaceʔegee ní ge,

⁴ jango bì ticlimi kan bee ma poò na kaʔa cɛnni ge, bì kacɛnmɛ nì ní kaʔa crɛʔɛmɛ kan najɛɛ ma be.

⁵ Ticlimi fɔlɔ wii nurú, jango kà bí da hari wa wi ticlimi na me, mɛjɛn ŋa wí ma cligi ge, kí ma yala wii danrí pomo ma na ki ticlimi mi po wí ma,

⁶ jango bì da yomɛʔɛ ní kayoro ti kɔrɔ cɛnni we, bì hɛnticlibee pe kayoro ní pe kahraʔa cɛn ge.

⁷ Bì da fyàʔá wò Fɔlɔ na we, kiì gi kí nyɛ ticlimi hlihaʔa ge, di letɔʔɔ kiì gi kí na cèʔé ticlimi kayoro ma de ní krɛʔɛmɛ nì me.

Maa mà kɔrɔsi hɛnpee ní be

⁸ Na najɛ maa nurú ma to wi krɛʔɛmɛ ma me. Mò ga je ma no wi yrɛmɛ kayoro ma de.

⁹ Mɛjɛn tí bi bo kmara masaʔa jala wa ma yugu na ge, bì bo nɛ pa drekmaʔa nyɛ ga má ma le ma na ge.

¹⁰ Na najɛ, kapere hanrifɔlɔ nà wà bí da ma fanla, mò ga yereʔe na.

¹¹ Nà pe yo maa sye pè krugu, bì yo ye ya hrà, ye hɛn wà han, ye bɔɔ kpo, ná kiì ban ye gɔlɔ pɛri hɛn wà yɛʔɛ ma ŋa wóo na tipeʔe hanri, ye bɔɔ cò ge.

¹² Nà pe yo ye pe jɔ nyɛmɛɛ ye pe kɔ ge, nɛ pa kuu kaʔa kɛrɛfiyee nyɛ be, bì pe jɔ nɛ pa pe hin kpo le wa fanʔa ni pomo ma na ge.

¹³ Di pa ye pɛgbanra yrɛbɛ tyɛnʔɛ kè bɛfu ta bì pi kpe bì ya yè goro nyi de.

¹⁴ Nà pe yo ma je wa pe kpoʔolomo ni me, di yé bi da ye gbejanra teri deʔe nigbe na,

¹⁵ na najɛ, mò gáa blɛn bi da danri pé ni, ma ma noʔolo fara wa pe kloro ni de.

¹⁶ Mɛjɛn pe ceʔe ké na fe na sye katipeʔe kee krugu. Pé nyɛ ticaʔabaa wa hɛnkpoʔo ni ge.

¹⁷ Nà pe gɔlɔ pɛri kajɛnlɛ na li yɛʔɛ na, paʔa bo pé ma li pɛri fa.

¹⁸ Ki hɛɛn pé na hrala, jango bì ya ŋa kpo ge pee tapoboo bɛ. Pe na hra pee pe nyigee kee na.

¹⁹ Hɛɛn bee pé ma cori bì da dun hɛɛn pèè na bì da pe yrɛbɛ syo pe ma ge. Pe kloro tí nyɛ bamɛ ge. Pé bi ba gu ki pomo ma miì na.

Ticlimi mí yereʔe ní, ní mi yrɛmɛ ní

²⁰ Ticlimi mí na taʔara wa kaʔa, namyɛʔɛ na ge, mà na mi akpolo wa le wa gbendeʔe dere na de.

²¹ Pé na taʔara wa hɛnfafaʔabaa kpoʔolohaʔa na ge. À pe na ki taʔaraʔa nuru ge wa kaʔa goyɛrɛ na de, mà yo:

²² «Yèé letɔɔ be, ticlimi mí bi ga ye glan nyaʔa nyiŋi na? Katanmafɛɛ, yé bi ga laʔa katanma kaʔa na ge nyaʔa nyiŋi na? Letɔɔ, yé bi da jeʔe kacɛnmɛ ma me su yo?

²³ Ye hrù ye ba na yrɛmɛ loʔo me, pa mi na nyili trigi le ye na ceŋge, bì ye krɛʔɛ na kayoro ní de.

²⁴ Mɛjɛn mí ma taʔara ma ye yeri. Ye in ki ta bì loʔo ná ma. À mi na kyɛʔɛ yrigi ye ma, hɛn wɛ in ki wele.

²⁵ Di yé ma ce na yrɛmɛ mì bɛfu ma. Yoò naʔa ca bì ja loʔo na krɛʔɛmɛ ma me.

²⁶ Ki kala na mí bi baa ye tyɛʔɛ wlɛʔɛ ga na yé bi baa jɔlɔ ge. Nyiŋi ga na fyara kala là bí ba ye ta ge.

²⁷ Fyara kakpɔʔɔlɔ nà ke ga ba ye ta nɛ pa tiflɛgbɔʔɔ nyɛ, cɔlɔʔɔ nàʔa ba no ye na nɛ pa nyufafaʔa nyɛ ma mi na fo ge, teʔe nì cɔlɔʔɔ ní nà pi ga ba do ye na nyiŋi ga na, pa mi da ye tyɛʔɛ ki nyiŋi na ge.

²⁸ Ki nyiŋi na pa pe da gbele nà krugu ɛn di pa mi byeri pe na. Pa pe da na ca deʔe kì bɛfu na di, pòo na nya.

²⁹ Mɛjɛn pé ma ce kacɛnmɛ ma me. Pe ìn wò Fɔlɔ wi fyara tiì wele bì fya.

³⁰ Pe ìn di jori na yrɛmɛ na me, à pe na mi faʔara.

³¹ Ki kala na, pé bi pe nadanma hranma tonro wiì ta. Pe dihonyee pé bi nyi pee pe yrɛmɛ miì nì.

³² Kalabajɛnyee pe punŋumu mí bi pe kpo. Letɔɔ pe bayereme yeʔeke mí bi pe cɔʔɔ.

³³ Di hɛn ŋa wí bi loʔo ná ma ki woo pɔɔ glɛn nyimi na, bì bo frɛmɛ na, ki woo wòo da fyaʔa katipeʔele la na.»