PITUNBEE 1 - NYƐʔƐLƐ LI KÀYORO

Jesu wí ma Nyɛʔɛlɛ li Nyìli li batɛmu kayoro yo

¹ Teofile, wa na sɛbɛkplɛɛ ni we mi dá ki bɛfu nyoŋo má kan, ga Jesu wi da báa hanri mâ na hɛɛn krɛʔɛ be mà kpe ki hlinyiŋi na,

² fɔ mà bâ no wlɛʔɛ ga na Nyɛʔɛlɛ li dɔɔ́ jrɛʔɛ móò luʔu namuru ni de. Sanni lí buu luʔu, wɔ̀ɔ wi kayoro kan de Nyɛʔɛlɛ li Nyìli li fanŋa nì ge kpɛn wi pitunbee ma be, bee wi dá fara ge má yo pe da ti hanri ge.

³ Wi kùʔù kruʔu ma, wɔ̀ɔ na wì teri pé na kafafaʔagaa ni gee ké bi gân peʔe cɛ́n pé yo wí nyɛ nyuwyeʔe na ge. Pe dáa wi nyaʔa nyiŋi nyiŋi wlɛrɛ too syɛn kpafoʔo ni. Wɔ̀ɔ na Nyɛʔɛlɛ li masaʔa kaʔala kayoro nyu de pe kan.

⁴ Wlɛʔɛ kà na wi gáa li pé ni, wɔ̀ɔ pé po: «Yò gá jɛ naʔa Jerusalɛmu kàʔà ni ge. Di na To wi nofele la mi dá li kayoʔo yo ye ma ge, ye da li hanni.

⁵ Mɛjɛn Jan wi dá hɛɛn batise be nyumu ní, di nà wlɛrɛ cɛnri bi ga gɔ́ ge, Nyɛʔɛlɛ pa li ba ye batise Nyɛʔɛlɛ li Nyìli ní.»

Jesu wi luʔumu kayoro namuru ni de

⁶ Ki kala na le, pitunbee ní Jesu ní pe gâ gboʔolo nyiŋi ga na ge, pitunbee à pe Jesu yugu we mà yo: «Wò fɔlɔ, ki nyiŋi kiì gi ga má bi ba nì bí Israyɛli klo woo tɛnŋɛ be pe klo na le yo?»

⁷ Wɔ̀ɔ pé po: «Nyiri nì ti kpaforo ní de da To Nyɛʔɛlɛ li da gón li fandaʔa nì ge, ki ìn jori ye ti cɛn.

⁸ Di yé bi ba sye ta, nyiŋi ga na Nyɛʔɛlɛ li Nyìli lí gà ba je ye ni ge. Ga yé ma cɛn na namyɛʔɛ na ge, pa ye baʔa tyɛʔɛ hɛɛn na be wa Jerusalɛmu kàʔà ni ge, mà plɛn Jude klo lì bɛfu ní, ní Samari klo nì le fɔ bì yà no wa tra kanŋaa na ge.»

⁹ Wi gâ ki kaʔa yo kɔ ge, Nyɛʔɛlɛ à luu jrɛʔɛ mòo luʔu namuru ni de. Pa pe gáa wi wele ge, à faʔa kà ma bɔ́ɔ̀ ton pé na.

¹⁰ Pa pe da gâ nyɛʔɛ kán ge wa namuru ni de nóo wele wɔ́ɔ na sye ge, pe kacɛnlɛ à pe hɛɛn syɛn nya pe yeré be pè tanla drefiri nì, mà yo:

¹¹ «Galile klo woolo, nyaʔa ma po wa á ye yeré ná wele wa namuru ni de? Ki hɛn ŋa pé na yeri Jesu we, Nyɛʔɛlɛ luú jrɛʔɛ be ye ni móò luʔu ge, wí gà hru bì ban nɛ, nɛ pa yé moo nya wɔ́ɔ na sye namuru ni pomo ma na ge.»

Pé ma hɛn wà kpe Judasi wi nolo ni le

¹² Ki nyiŋi na, à pe jɛ angolo la na pé na yeri olife tiri angolo ge mà hru mà kɛri Jerusalɛmu kàʔà ni ge. Ki angolo liì nì Jerusalɛmu kàʔà nì ge ki kpafoʔo kí nyɛ cilo pyɔ nigbe.

¹³ Pe gâ je wa, à pe yâ luʔu mà je wa namuru go pyɔ ŋa ni pe dá bo na kori ge. Hɛɛn bee pe dá bo we ge, pé bee: Pyɛri nì, Jan nì, Jake nì, Andre nì, Filipe nì, Toma nì, Baritelemi nì, Matye nì, ní Jake nì ŋa Alife pyɔ we, Simo nì ŋa wi dá bo naʔa ca wi klo li kò lì kân ge, ní Jude nì ŋa Jake pyɔ we.

¹⁴ Ki hɛɛn pè bɛfu mà plɛn cɛɛ ní be, ní Mari ní we ŋa Jesu wi no we, ní Jesu wi cyɛɛn ní be à pe kpoʔolo mà pe kân Nyɛʔɛlɛ li nyɛrimi ma me lademe ní.

¹⁵ Wlɛrɛ tà dà gâ doro, sɛrifɛɛ à pe po pé ma kpoʔolo. Bee pe dá bo wa pe dá hɛɛn too noli nyoʔo kɔ ge. Pyɛri wɔ̀ɔ jɛ mà yere be pe nulala ni le mà yo:

¹⁶ «Na woolo, ki dá yala ki nyoŋomo mi fùnŋù ma Nyɛʔɛlɛ li Nyìli li da glú mâ yo wa Dafide wi nò nî Judasi wi kala na le, ŋa wi da bâ glu Jesu wi cofɛɛ pe yɛʔɛ̀ ma ge mâ po pe kloʔò cɛʔɛfɔlɔ we.

¹⁷ Àʔa hín bo wi dá bo wò plɛnfɔlɔ wà wi mà wò tunŋu ki namyɛʔɛ kà ta.

¹⁸ Ki kruʔu ma wɔ̀ɔ bâ kere syɔ wi kapeʔe sràʔà gbejanra nì de mà yâ do mà culu. Wi lala à li ja. Wi lama yrɛbɛ pì bɛfu à pi nyini mà craʔa.

¹⁹ Hɛɛn pè bɛfu bee pe dá bo wa Jerusalɛmu kàʔà ni ge, pa pe da gáʔà cɛn ge, à pe báa ki kere yeri pe hɛnrɛ ni de ‹Akɛlidama.› Ki na po pé yo: ‹Kere da ni pe dá disyan wo ge.›

²⁰ Mɛjɛn kí nyɛ wa nyoŋoʔo Ŋuru Sɛbɛ ni we mà yo: ‹Wi kasyɛn ki kò waʔafe. Hɛn wà wò gá go waʔa nî.› mà yo nɛ: ‹Hɛn wà bí tunŋu kpe ge.›

²¹ Ki kala na, bee pe dá bo wò nì su, nyiŋi ga na wò fɔlɔ Jesu wi dá bo wò nulala ni le,

²² mà kpe nyiŋi ga na Jan wi dáa batɛmu kayoro nyu de fɔ mà bâ no wlɛʔɛ ga na Nyɛʔɛlɛ li dá Jesu jrɛʔɛ we be wo ni móò luʔu namuru ni de, kí ma yala wà bi haʔá wo na bì da Jesu wi nyɛmanyinimi kayoro nyu de hɛɛn ma be.»

²³ Sɛrifɛɛ à pe hɛɛn syɛn fara. Ki woo pé bee: Josɛfu ŋa pé na yeri Barisabasi mâ noo yeri nɛ Jusitusi ge wiì nì, ní Macasi nì.

²⁴ Ki kruʔu ma à pe Nyɛʔɛlɛ nyɛri le mà yo: «Wò fɔlɔ, mo ŋa má nyɛ pè bɛfu pe dihon cɛnfɔlɔ we, ŋa má ma fara kɔ ki hɛɛn syɛn ŋa ni we,

²⁵ ma ki woo tyɛʔɛ we wo na, jango wi po be Judasi wi nolo ni le pitunŋu, wi da ki tunŋu ko ge ga Judasi wi dá yaʔa be mâ kɛri deʔe ga na wí yala wi po ge.»

²⁶ À pe nyaʔala le pé kan. À li Macasi fara we. À poo haʔa wa pitunbee kɛ̂ mà kɛ nigbe na we.