MISYE 1 - NYƐʔƐLƐ LI KÀYORO

¹ Nyiŋi ga na masaa Yotamu nì, Ahasi nì, ní Esekyasi nì pe dáa Juda klo sinni le, Bajegɔ Nyɛʔɛlɛ à li yo anyaʔa ni Misye nì ŋa Morekɛti kàʔà woo we mà Samari kàʔà nì, ní Jerusalɛmu kàʔà nì ti kala tyɛʔɛ le wi na.

Bajegɔ Nyɛʔɛlɛ lí na li hɛɛn pe baʔahaʔa kayoro nyu

² Yèé klòʔó hɛɛn yè bɛfu, ye da nurú. Ee, tra ní bee ní pé nyɛ wa ti nî ye nagruʔu can ye lòʔó. Wò Fɔlɔ ŋa Bajegɔ Nyɛʔɛlɛ lí bi jɛ wa li sràʔá gokmaʔa ni bì ba yo ye nì bì yè kapere tyɛʔɛ de ye na.

³ Welé, Bajegɔ Nyɛʔɛlɛ lí ma jɛ wa li korohaʔa na ge. Lí na trigi na tanri wa tra ti jrɛʔɛmɛ dere na de.

⁴ Angoro tí na tɛɛlɛ wa li noʔo na nɛ pa hùnmù ma nyɛ pé ma tyɛʔɛ kwɔʔɔ tanla mi naa dɛɛlɛ ge. À ti na fo na tri nɛ pa nyumu nyɛ ma mí na fo angogo yugu na ná tri ge.

⁵ Ki woʔo ga kì bɛfu kí na hanri Israyɛli kluʔu woo pe ceme ní, ní pe kapere kala na. Han wi wí ma kan Israyɛli kluʔu woo á pe to wa kapere ni de? Samari kàʔà kiì gi. Han wi wí ma Juda klo woo kan, á pe na sunnu ge? Jerusalɛmu kàʔà kiì gi.

⁶ Bajegɔ Nyɛʔɛlɛ à li yo: «Kiì kɔsɔ na, mí bi ba Samari kàkpɔ̀ʔɔ̀ hanri nɛ pa ŋglɛnrɛ da nyɛ pé ma ti kpoʔolo wa kere lama ni me. Pé bi ba hrɛsɛn tiri fali wa. Mí bi ba ki kàʔà ki ŋglɛnrɛ kloʔó bì ti wa wa angogoo kpafoʔo ni ge. Pé bi ba ki noʔo dere nya de.

⁷ Ki kàkpɔ̀ʔɔ woo pe gbosuu pè bɛfu pa pe ba jaʔabu. Pe sràʔá go akanra tì bɛfu pa ti ba hogo. Mí bi ba pe gbosuu pè bɛfu cɔʔɔ. Kyɛnrɛ sraʔa ga pe dá da wa pe sràʔá goro ni de pe bɛnfɛɛ pa pe ba ki woʔo kpe bì yàá ki kyɛnrɛ sraʔá kanʔa pee pè ma ki podeme miì na.»

Tipeʔe ma Jerusalɛmu kàʔà ta ge

⁸ Ki kala na, domi Misye, mí bi ba gbele bì da yoolo bì bo waʔafe sabara fun, jango bì da na kayaga teri hɛɛn na be. Mí bi baa daʔara nɛ pa sanwyele nyɛ le, bì da jɛn nɛ pa kajɛnʔɛ ga nyɛ pé na yeri cruʔu ge.

⁹ Mɛjɛn Samari kàʔà ki namoʔo kí nyɛ namopranʔa gi. Ki kpɔʔɔ́ fɔ mà no wa Juda klo na le mà no wa Jerusalɛmu kàʔà goyɛʔɛ na, ga ni na hɛɛn pé na kori ge.

¹⁰ Yò gaʔa jari wa Gati kàʔà ni ge. Yò gaa gbele wa Aka kàʔa ge. Bɛti Leyafra kàʔà woo, ye da dun yee glòʔó tra na jango bì yè kayaga tyɛʔɛ pe tɔɔ na be.

¹¹ Syafiri kàʔà woo yee doro ŋklomo ni. Ye po waʔafe. Fɛrɛ ti ton ye na kpo. Tisana kàʔà woo pe ìn biʔi ta bì nyini. Bɛtɛsɛli kàʔà woo pé na kuu konlo wa. Pe ìn bi gban bì ye syɔ adi.

¹² Maroti kàʔà woo pé na hiʔiri fyara na de na syɔmo ca, mɛjɛn Bajegɔ Nyɛʔɛlɛ lí ma tipeʔe troʔo, àʔa no wa Jerusalɛmu kàʔà goyɛʔɛ na ge.

¹³ Lakisi kàʔà woolo, ye syon kɔrɔrɔ pwɔ wa syongidayee na be. Ye da glú mà Jerusalɛmu kàʔà woo kan, à pe kapeʔe hanri ki kplɛʔɛ na ge. Mɛjɛn pé ma Israyɛli klo woo pe kapere nya de wa yèé ni.

¹⁴ Ki tɔ na, Juda klo woo, kí ma yala ye ba làʔá Morekɛti Gati kàʔà na ge. Akisibi kàʔa kí bi ba grɛʔɛ lama wleleme deʔe Israyɛli klo masaa ma be.

¹⁵ Maresya kàʔà woo, mí bi kundiʔi fonŋo troʔo má kan Israyɛli kundiʔi kpandoo pé bi yà hra wa Adulamu wi angowyekpɔ ni.

¹⁶ Juda klo woolo, ye yè yujoro konlo de. Ye yè yuru kpori de yè pii kala na, bee pé na ye glanʔa ge. Ye yè krɛʔɛ yuwaʔaga fɛɛ nɛ pa kakaʔa nyɛ ge, mɛjɛn yè bɛnfɛɛ pé bi da sye pé ni ŋklomo ni.