MARIKE 1 - NYƐʔƐLƐ LI KÀYORO

Jan Batise kayoro

¹ Kayotanʔa ga kí na nyu Jesu Krisi Nyɛʔɛlɛ Pyɔ na we, ki hlihaʔa kí ga:

² Ki dá bo nɛ pa tí nyɛ wa nyoŋoro Esayi Nyɛʔɛlɛ leyoo wi sɛbɛ ni we mâ yo: Welé, mì Nyɛʔɛlɛ mí ma na pitunŋu troʔo we ma yɛʔɛ̀ ma, ŋa wí bi yàá ma kloʔò yɛli ge.

³ Wiì wi wí na wi àkpolo wa le wa sinbriʔi ni ge naʔa pin: Ye yè fɔlɔ wi kloʔò kpari ge, yeʔe sìn.

⁴ Jan ŋa wí na hɛɛn batise, wɔ̀ɔ hín nyini wa sinbriʔi ni ge na batɛmu kayoro jari de, da tí bi hɛɛn kan pe kruʔu wa pe kapere ma de tí yaʔa pé kan ge.

⁵ Jude klo hɛɛn pè bɛfu ní, ní Jerusalɛmu kàʔà hɛɛn pè bɛfu ní, à pe na nyini na sye wì krugu na pe kapere tanli de. Wɔ̀ɔ hín na pe batise wa Jurudɛn lɔʔɔ ni ge.

⁶ Jan wi dreʔe ki dá bo nyoʔomɛ joro ni. Wi anuʔulu à li po hlɛʔɛ nì, wɔ̀ɔ lí pwɔ hɛnŋɛɛ ni ge. Wɔ̀ɔ na kabɛrɛ ka ní hrɛnʔɛ ní.

⁷ Wi dá bo naʔa jari mà yo: «Wà na pan wa na kruʔu ma, ŋa wi fanŋa ki kpɔʔɔ́ na woʔo na ge. Mi ìn bi gban bì hoʔo bì wi sabara haʔala de wi na.

⁸ Mì mí ma ye batise nyumu ní di wiì wí bi ba ye batise Nyɛʔɛlɛ li Nyìli ní.»

Jesu wi batɛmu nì, ní wi pomawleʔe ní

⁹ Ki nyiŋi na ge Jesu wi dá jɛ Nasarɛti kàʔà ma Galile klo ni le mà pan Jan krugu. Jan wɔ̀ɔ bɔ́ɔ̀ batise wa Jurudɛn lɔʔɔ nî ge.

¹⁰ Wi gáa nyini wa nyumu ni me, wɔ̀ɔ wele wa namuru ni de mà nyɛʔɛlɛ nya lí na nyɛri. Nyɛʔɛlɛ li Nyìli à li jɛ wa na pan wí ma nɛbo kòtolo li.

¹¹ À pe na ákpolo nuru wa namuru ni de, à li yo: «Mo we, na Piglaan wi má ni. Má na na glanʔa ceŋge.»

¹² Nyɛʔɛlɛ li Nyìli à li Jesu kpe mà kɛri wí ni sinbriʔi ni.

¹³ Wɔ̀ɔ yâ da wa wlɛrɛ too syɛn. Sotanri wi dáa ki ca wi kapeʔe hanri. Wi dá bo sinbriʔi ni, nya ajobo pí na kori deʔe ga na ge. Mlɛŋɛyee à pe na hanri wí kan.

Jesu wí ma fyɔcaa ticɛrɛ yeri

¹⁴ Pe da gâ Jan le we wa kaso nî kɔ ge, Jesu wɔ̀ɔ kɛri Galile klo ni le mà yáa Nyɛʔɛlɛ kayotanʔa jari ge,

¹⁵ mà yo: «Nyiŋi ga pe dí bo na hanni kí ma no. Nyɛʔɛlɛ li masaʔa àʔa na nori. Ye kruʔu wa yè kapere ma de, ye pà kayotanʔa na ge.»

¹⁶ Jesu wi báa doro Galile nyugbɔmo tanla me, wɔ̀ɔ Simo nya ní Andre nì, Simo wi conlo we, pé na pe faʔa wa ge wa nyugbɔmo ni me, mɛjɛn pe dá bo fyɔcaala.

¹⁷ Jesu wɔ̀ɔ pé po: «Ye pà ná na. Mí bi yà ye wa ye da hɛɛn ca nɛ pa yé na fyɔɔ ca pomo ma na ge.»

¹⁸ À pe na jrɛʔɛ kpo mà pe faʔa wa ge be mà pa wí na.

¹⁹ Pe gâ hɛnʔɛrɛ wa yɛʔɛ̀ ge, à pe Sebede pii nya Jake nì wi conlo Jan nì, pe dá bo nyumu kɔrɔ ni na pe faʔa hanri ge.

²⁰ Jesu wɔ̀ɔ pé yeri kpo. À pe pe to Sebede yaʔa we be tungɔɔ ní be wa nyumu kɔrɔ ni ge mà pa wí na.

Gbosyo fɔlɔ kayoʔo

²¹ À pe kɛri Kapɛrinamu kàʔà ni ge. Fyonriwlɛʔɛ ki gâ dyɛʔɛ, Jesu wɔ̀ɔ yâ je Juwifiyee sɛrigo ni ge mà na pe krɛʔɛ.

²² Wi krɛʔɛmɛ mi da pé fo, mɛjɛn wi dá bo na krɛʔɛ nɛbo sye nyɛ wí ma. Ki ìn bo nɛ pa Furu sɛbɛ cɛnfɛɛ nyɛ be.

²³ Cɛncɛnbo gbosyo fɔlɔ à wà na jin kpo pe sɛrigo ni ge mà taʔara mà yo:

²⁴ «Nyaʔa nyɛ wò kpafoʔo ni, Jesu Nasarɛti kàʔà pyɔ? Má ma pan bì ba wo punŋu yo? Miʔi cɛn hɛn ŋa wi má ni ge. Nyɛʔɛlɛ li hɛnkmaa wi má ni.»

²⁵ Jesu wɔ̀ɔ yo wí ni gbanʔa mà yo: «Ma pyèrì. Ma nyini wa ki naŋa ni we.»

²⁶ Gbosyo wɔ̀ɔ naŋa kpoʔoro we gbanʔa ceŋge mà taʔara mà nyini wí ni.

²⁷ Àʔa hɛɛn pè bɛfu fo. À pe na pè yugu mà yo: «Ki woʔo ga gɛɛ? Nyaʔa krɛʔɛfonmo mi pé na tanli ge? Sye nyɛ wí ma fɔ wí na gbosuu jin be, à pe noo kpɔʔɔ.»

²⁸ Wi yele à li nyari mà je deʔe kì bɛfu na wa Galile klo ni le.

Jesu wí ma yabaa fafaʔa pwɔʔɔ

²⁹ Pe gâ nyini wa sɛrigo ni ge, à pe kɛri Simo nì, Andre nì pe kasyɛn ma ge. Jake nì, Jan nì pe dá bo pé ni.

³⁰ Simo wi cɔ wi no wi dá bo wi syɛ́n. Wre ti dá bo wí na tifuru. À pe yáʔà yo Jesu ma we.

³¹ Wi gâ no wa, wɔ̀ɔ wí co kyɛʔɛ na ge mòo jrɛʔɛ, wɔ̀ɔ pwɔʔɔ kpo mà jɛ na hanri pé kan.

³² Ki yaakwɔʔɔ na ge, yaa ki gâ je kɔ ge, hɛɛn à pe na pan wí kan yabaa pè bɛfu ní, ní gbosuu fɛɛ ní be.

³³ Kàʔà hɛɛn pè bɛfu à pe pan mà bâ gboʔolo be wi goyɛʔɛ na ge.

³⁴ Wɔ̀ɔ yabaa fafaʔabaa pwɔʔɔ yajɛnʔɛ fafaʔagaa ma mà gbosuu fafaʔabaa prɔ. Wi ìn dàʔa ta gbosuu pe da nyu, mɛjɛn pe dɔɔ cɛ́n.

Jesu wi krɛlɛ Galile klo ni

³⁵ Ki kpɛntoʔo jɛfantutuʔu na ge, wɔ̀ɔ jɛ mà kɛri deʔe kà na sinbriʔi ni mà yáa Nyɛʔɛlɛ nyɛri le wa.

³⁶ Simo nì, hɛɛn bee ní pe dá bo wì krugu ge, à pe na pè fyala Jesu wi cama na me.

³⁷ Pe gɔ́ɔ̀ nya ge, à poo po: «Hɛɛn pè bɛfu pé na ma ca.»

³⁸ Wɔ̀ɔ pé po: «Ye pan wo nyari kyɛpiri ni de, jango bì yà kayoro tà jari wa kpo, mɛjɛn mi dí nyini naʔa kiì na.»

³⁹ Wɔ̀ɔ jɛ na sye Galile klo lì bɛfu ni na Nyɛʔɛlɛ kayoro jari de wa Juwifiyee sɛrigoro ni de na gbosuu prɔ be.

Jesu wí ma yanyɛʔɛ fɔlɔ pwɔʔɔ

⁴⁰ Yanyɛʔɛ fɔlɔ à wà ma pan wì krugu mà bâ kunbiʔi kán wì tanla noo nyɛri nyugara nì de mà yo: «Nà maʔa ta, pa ma gban bì na pwɔʔɔ.»

⁴¹ Wi nyugara à ti wa Jesu na we, wɔ̀ɔ kyɛʔɛ haʔala ge mà màʔà wi na mà yo: «Mí maʔa ta. Ma pwɔʔɔ.»

⁴² Yanyɛʔɛ àʔa nyini wí ni kpo. Wɔ̀ɔ pwɔʔɔ.

⁴³ Jesu wɔ̀ɔ yo wí ni gbanʔa mòo troʔo,

⁴⁴ mà yo: «Mò gá kà yo hɛn ma, di ta sye ma ya mà tyɛʔɛ Juwifiyee sraʔá farafɔlɔ wà na. Ma gbanma kala na le, ma sraʔá fara ŋa Mowisi wi dá yo ge, jango peʔe cɛn pe yo má pwɔʔɔ.»

⁴⁵ Di ki fɔlɔ wi gâ nyini, wɔ̀ɔ yáa ki jari ceŋge fɔ Jesu wí jé gban bì je kàʔà kà ni adi kpɛnmɛ na. Wɔ̀ɔ na nyìní sinbriʔi ni. Hɛɛn pe naa jrɛʔɛ namyɛʔɛ kè bɛfu na na pan wì krugu.